Ufanye nini unapohisi mimba haijatoka kwa misoprostol?

Swali la msingi

Juzi usiku nilitumia misoprotol 4 yani 2 niliweka chini ya ulimi nyingine nikaweka ukeni baada ya masaa machache zilitoka damu kidogo sana zikakata. Samahan tena ila mimi nahisi kama mimba yangu ya wiki tatu bado haijatoka, natakiwa nifanye nini maana hadi muda huu damu hazijatoka tena.

Majibu

Pole sana kwa hali unayopitia. Hali unayoieleza inaweza kuashiria kuwa mimba haijatoka kikamilifu au haikuanza kutoka kabisa, hasa kama ulikuwa kwenye hatua za mwanzo za ujauzito (chini ya wiki 9–12). Natambua kuwa leo ni siku ya 4 na damu zilitoka kwa siku moja tu tena kidogo. Kabla ya kukushauri vizuri, hapa kuna mambo muhimu kufahamu;

1. Dalili zinazoashiria mimba imetoka kikamilifu

• Kutokwa na damu nyingi (huanza kutoka ndani ya saa 1–6.) kama hedhi nzito kwa masaa kadhaa hadi siku.

• Maumivu ya tumbo kama ya hedhi au zaidi (wakati mimba inatoka).

• Baada ya siku chache, damu hupungua na kuisha taratibu ndani ya wiki 1–2.

• Dalili za mimba (kichefuchefu, matiti kujaa, uchovu) huanza kupungua au kuisha.

Ikiwa damu haikutoka kama inavyotarajiwa, kuna uwezekano:

• Dozi haikutosha.

• Mimba iko nje ya mji wa mimba.

• Au mwili haujaitikia dawa vizuri.

2. Dalili zinazoashiria mimba bado haijatoka au imetoka sehemu

• Kutokwa damu kidogo au hakuna damu kabisa baada ya dawa.

• Dalili za mimba bado zipo.

• Maumivu makali ya tumbo yasiyoisha.

• Harufu mbaya sehemu za siri.

• Homa au kutetemeka.

• Kutokwa damu inayokatika kisha kurudi tena kwa wingi baada ya siku kadhaa.

3. Hatua unazoweza kuchukua sasa

a) Piga picha ya kizazi kwa kipimo cha mionzi sauti (ultrasound)

Hii itathibitisha kama mimba bado ipo, imetoka sehemu au yote, au kama ni mimba ya nje ya mfuko wa uzazi (ambayo ni hatari).

b) Muone mtaalamu wa afya haraka

Anaweza kukushauri kutumia dozi ya pili ya misoprostol au njia nyingine kama upasuaji mdogo wa kusafisha kizazi. Usijaribu kutumia dawa zaidi bila ushauri wa kitaalamu, kwani unaweza kupata madhara kama kutokwa na damu nyingi au maambukizi.

4. Wakati gani wa kumwona daktari haraka?

Kama unapata homa, harufu mbaya sehemu za siri, maumivu makali yasiyopungua, au kuvuja damu nyingi (kubadili zaidi ya pedi 2 zilizojaa kwa saa), onana na daktari haraka.

Rejea za mada hii:

1. World Health Organization. Medical management of abortion. Geneva: WHO; 2018. Imechukuliwa 20.04.2025 kutoka: https://www.who.int/publications/i/item/9789241550406

2. Raymond EG, Harrison MS, Weaver MA. Efficacy of misoprostol alone for first-trimester medical abortion: A systematic review. Obstet Gynecol. 2019;133(1):137–47. doi:10.1097/AOG.0000000000003023

3. Ngo TD, Park MH, Shakur H, Free C. Comparative effectiveness, safety and acceptability of medical abortion at home and in a clinic: A systematic review. Bull World Health Organ. 2011;89(5):360–70. doi:10.2471/BLT.10.084046

4. Gynuity Health Projects. Instructions for using misoprostol alone to end a pregnancy. New York: Gynuity Health Projects; 2020. Imechukuliwa 20.04.2025 kutoka: https://gynuity.org/resources/instructions-for-using-misoprostol-alone-to-end-a-pregnancy

5. Aiken ARA, Digol I, Trussell J, Gomperts R. Self reported outcomes and adverse events after medical abortion through online telemedicine: Population based study in the Republic of Ireland and Northern Ireland. BMJ. 2017;357:j2011. doi:10.1136/bmj.j2011

6. Ipas. Medical abortion using misoprostol alone: A guide for health-care providers. Chapel Hill: Ipas; 2021. Imechukuliwa 20.04.2025 kutoka: https://www.ipas.org/resource/medical-abortion-using-misoprostol-alone