Je, unaweza kufa kwa kutoa mimba?

Katika jamii nyingi, kuna mazungumzo ya chinichini kuhusu utoaji wa mimba. Watu wengi hujiuliza, “Je, mtu anaweza kufa kwa kutoa mimba?” Jibu ni ndiyo — hasa pale ambapo mimba inatolewa bila ushauri wa kitaalamu au katika mazingira yasiyo salama. Makala hii inalenga kutoa elimu ya afya kwa umma kuhusu hatari zinazoweza kutokea baada ya kutoa mimba, hasa ikiwa imefanyika kinyume na miongozo ya kitabibu.

Utoaji wa mimba usio salama ni nini?

Utoaji wa mimba usio salama ni tendo la kuondoa mimba kwa kutumia mbinu zisizokubalika kitaalamu, pasipo uangalizi wa mtaalamu wa afya aliyehitimu. Mbinu hizi mara nyingi hufanyika kwa kificho, nyumbani au na watu wasiokuwa na mafunzo ya kitabibu.

Je, mtu anaweza kufa? Ndiyo — Na hizi ndizo sababu kuu:

1. Kutokwa na damu nyingi

Ikiwa damu nyingi itapotea baada ya kutoa mimba, na mgonjwa hatapatiwa matibabu ya haraka, anaweza kupata mshtuko wa damu (shock) na kupoteza maisha.

2. Kuingia kwenye damu kwa sumu ya bakteria

Utoaji wa mimba usio salama unaweza kusababisha bakteria kuingia katika mfuko wa uzazi, na kusababisha maambukizi yanayoenea mwilini. Bila matibabu ya haraka, hali hii ni hatari kwa maisha.

3. Kutobolewa kizazi

Wakati mwingine vyuma au vifaa visivyofaa hutumika kutoa mimba, na huweza kuchoma au kutoboa kizazi, kusababisha damu kuvuja ndani ya tumbo.

4. Mimba kutokamilika kutoka

Mabaki ya mimba yaliyosalia kwenye mfuko wa uzazi huweza kuleta maambukizi au kutokwa na damu bila kukoma.

5. Matumizi ya dawa au vitu visivyo salama

Wengine hutumia miti shamba, kemikali au vidonge bila maelekezo sahihi. Hii ni hatari na inaweza kusababisha sumu mwilini au kushindwa kwa viungo muhimu kama ini au figo.

Wakati gani uonane na daktari haraka?

Baada ya kutoa mimba, hasa ikiwa haikufanyika kwa uangalizi wa kitaalamu, kuna dalili muhimu zinazoweza kuashiria kuwa afya yako iko hatarini. Ikiwa utapata dalili yoyote kati ya hizi, usisubiri , tafuta matibabu ya haraka katika hospitali au kituo cha afya:

Kutokwa na damu nyingi kupita kawaida

Damu nyingi inayochuruzika bila kukoma au kujaa pedi nzima kila dakika chache ni hatari. Inaweza kuashiria kutoboka kwa kizazi au mabaki ya mimba.

Maumivu makali ya tumbo yasiyopungua

Maumivu yanayozidi na hayapungui hata baada ya kutumia dawa yanaweza kuwa ishara ya maambukizi au jeraha ndani ya kizazi.

Harufu mbaya kutoka ukeni

Harufu kali isiyo ya kawaida huashiria maambukizi ya bakteria. Ikiwa haijatibiwa, huweza kusababisha sepsis (maambukizi mwilini kote).

Homa au kutetemeka mwili

Hii ni dalili ya mwili kupambana na maambukizi. Hali hii huhitaji antibiotiki za hospitali haraka.

Kizunguzungu au kupoteza fahamu

Inaweza kuashiria upotevu mkubwa wa damu au mshtuko wa mwili (shock), hali inayoweza kuua haraka bila msaada wa kitabibu.

Mapigo ya moyo kwenda kasi au kushindwa kupumua vizuri

Hii ni dalili ya dharura inayoweza kuashiria mshtuko wa damu au sumu mwilini.

Nini cha kufanya ikiwa kuna hali ya dharura?

• Tafuta msaada haraka katika kituo cha afya kilichosajiliwa.

• Usifiche historia ya tukio kwa wahudumu wa afya hili linaweza kusaidia kuokoa maisha.

• Wasiliana na daktari wa afya ya uzazi kwa ushauri kuhusu njia salama za uzazi wa mpango ili kuzuia mimba zisizotarajiwa.

Hitimisho

Kutoa mimba bila uangalizi wa kitaalamu ni hatari sana. Inaweza kusababisha maambukizi, kuvuja damu, ulemavu wa kizazi na hata kifo. Elimu kuhusu afya ya uzazi ni muhimu kwa kila mtu. Kama kuna sababu za kiafya au kijamii zinazokufanya kufikiria kutoa mimba, ongea na mtaalamu wa afya kwa ushauri salama.