Maumivu makali chini ya kitovu baada ya kutoa mimba kwa dawa

Maelezo na swali la msingi

Nina miaka 28. Nilikuwa na mimba ya mwezi mmoja na wiki. Jumapili nilitumia dawa za kutoa mimba, damu pamoja na mabonge yalitoka. Nilipata pia dawa za antibiotics kwa ajili ya kusafisha. Hata hivyo, kuanzia jana usiku, tumbo linaniuma sana chini ya kitovu, maumivu ni makali lakini damu haitoki sana. Sina homa wala harufu mbaya ukeni. Nifanyeje?

Majibu

Ufahamu wa msingi

Baada ya kutumia dawa za kutoa mimba (kama Misoprostol na/au Mifepristone), mwanamke anatarajiwa:

• Kutokwa damu kwa siku chache hadi wiki moja

• Kuona mabonge ya damu (tishu)

• Kupata maumivu ya tumbo ya muda mfupi

Lakini wakati mwingine, kuna changamoto zinazoweza kutokea ambazo huhitaji uangalizi wa karibu wa kitabibu.

Maumivu makali chini ya kitovu bila Homa: nini chanzo?

1. Mimba kutokamilika kutoka

• Maelezo yako yanaashiria kuwa huenda si tishu zote za mimba zilitoka vizuri.

• Hali hii huleta maumivu makali ya tumbo, hasa chini ya kitovu, na damu huwa haitoki sana tena.

• Hii ni mojawapo ya sababu kuu za maumivu makali baada ya kutoa mimba.

2. Mijongeo wa misuli ya mji wa mimba

Baada ya kutoa mimba, kizazi hujaribu kujisafisha na kurudi kwenye hali ya kawaida kwa kujongesha misuli, hali hii inaweza kuleta maumivu, lakini kama ni makali sana, inaweza kuashiria shida zaidi.

3. Kuanza kwa maambukizi ya ndani ya kizazi

Wakati mwingine, maambukizi huanza taratibu bila dalili za homa au harufu mbaya mara moja. Bila matibabu, yanaweza kuenea haraka.

Jedwali 1: Uchambuzi wa dalili na uwezekano wa visababishi

Visababishi vingine

Jedwali 2: Visababishi vingine vya maumivu makali baada ya kutoa mimba kwa dawa

Kumbuka: Mwanamke yoyote anayepata maumivu makali ya tumbo baada ya kutoa mimba anapaswa kuchukuliwa kwa uzito hadi visababishi vyote hivi vipimwe na kuondolewa. Kutafuta huduma ya kitabibu mapema huokoa maisha na uzazi wa baadaye.

Hatua za kuchukua mara moja

1. Nenda kituo cha afya kwa uchunguzi

• Kipimo cha ultrasound kitasaidia kubaini kama bado kuna mabaki ya mimba ndani ya kizazi.

• Daktari ataangalia kama unahitaji kusafishwa au dawa zaidi.

• Kipimo cha Damu na mkojo kuangalia ishara za maambukizi kwenye mfumo wa mkojo na damu.

2. Endelea kutumia antibiotics kama ulivyoelekezwa

• Hii ni muhimu kwa kuzuia maambukizi ya ndani.

• Usikatishe dawa hata kama unajisikia vizuri.

3. Usifanye mapenzi wala kuingiza kitu chochote ukeni

• Hadi daktari athibitishe kuwa upo vizuri.

Dalili zinazohitaji huduma ya dharura

• Maumivu ya tumbo yanayoendelea au kuongezeka

• Kutokwa damu nyingi isiyoisha

• Homa au baridi kali

• Harufu mbaya au uchafu usio wa kawaida ukeni

• Kizunguzungu au kufifia kwa fahamu

Ujumbe kwa wanawake wengine

Kutoa mimba kwa dawa ni salama iwapo unafanywa kwa usimamizi wa kitabibu na kufuatiwa kwa karibu. Maumivu makali ya tumbo baada ya utoaji wa mimba si jambo la kupuuzia. Ni muhimu kutafuta msaada wa daktari ili kuepusha madhara ya muda mrefu kama:

• Utasa

• Maambukizi ya kizazi

• Kupoteza damu kupita kiasi

Hitimisho

Mabadiliko yoyote makubwa baada ya kutoa mimba hasa maumivu makali ya tumbo bila homa wala kutokwa damu sana yanahitaji uchunguzi wa kitaalamu. Usingoje hali iwe mbaya. Nenda hospitali mapema. Afya ya uzazi ni haki yako, na huduma bora ni msingi wa maisha salama.