Nina sindromu ya Asherman baada ya upasuaji wa kujifungua, nifanyeje?

Swali la msingi

"Daktari, nimeambiwa nina Asherman syndrome, na hii imetokea baada ya kufanyiwa upasuaji wa kujifungua. Nimekosa hedhi kwa miaka 6 sasa na nimezunguka hospitali nyingi pasipo mafanikio. Je, nifanyeje?"

Majibu

Sindromu ya Asherman ni hali ya kiafya inayotokea pale ambapo kuta za ndani ya mji wa mimba zinashikana au kupata makovu baada ya jeraha au upasuaji. Makovu haya huweza kuathiri mzunguko wa hedhi na uwezo wa kushika mimba. Kwa wanawake wengi, hali hii hutokea baada ya matibabu kama ya upasuaji wa kukwangua kizazi, kuondoa kondo la nyuma, au upasuaji wa uzazi kama C-section.

Ikiwa mwanamke amekosa hedhi kwa muda mrefu baada ya upasuaji, kama ilivyo katika swali hili, kuna uwezekano mkubwa kwamba Sindromu ya Asherman kuwa ndiyo chanzo.

Dalili za sindromu ya Asherman

• Kukosa hedhi  kabisa

• Kupata hedhi chache isiyo ya kawaida

• Maumivu ya tumbo kila mwezi bila kutoka damu (kwa sababu damu inazuiwa na makovu)

• Ugumba au kushindwa kushika mimba

• Kiharusi cha mimba mara kwa mara

Uchunguzi wa sindromu ya Asherman

Kwa mwanamke ambaye amekosa hedhi kwa miaka mingi baada ya upasuaji, ni muhimu kufanyiwa uchunguzi wa kina. Vipimo vinavyotumika ni:

1. Histeroscopi: Hii ndiyo njia bora zaidi ya kugundua na kutibu Sindromu ya Asherman. Kamera ndogo huingizwa kupitia uke hadi kwenye uterasi, na daktari anaweza kuona makovu na kuyakatakata wakati huohuo.

2. HSG (Histerosalpingografi): X-ray maalum inayotumia rangi kuonyesha umbo la mji wa mimba na kama kuna sehemu zilizoziba.

3. Sonohisterografi: Ultrasound inayofanywa kwa kuingiza maji ndani ya uterasi ili kuona kama kuna sehemu zilizoshikana.

Matibabu ya sindromu ya Asherman

Matibabu yanalenga kuondoa makovu na kurejesha hali ya kawaida ya mji wa mimba. Hatua kuu ni:

• Kuondoa makovu kwa upasuaji wa histeroskopi: Operesheni ndogo inayofanywa kwa kutumia kamera, ambapo makovu huondolewa. Hii hurejesha nafasi ya mji wa mimba kufunguka tena.

• Kuweka kifaa maalum (kama kitanzi kisicho na homoni): Hii husaidia kuzuia kuta za mji wa mimba kushikana tena baada ya upasuaji.

• Matumizi ya dawa za estrojeni:Huchochea ukuta wa ndani wa mji wa mimba (endometrium) kupona na kujengwa upya baada ya matibabu.

Ufuatiliaji

• Daktari atakufuatilia kuona kama mzunguko wa hedhi umerudi.

• Kipimo kingine cha hysteroscopy au ultrasound kinaweza kufanywa tena baada ya wiki 6–12 ili kuthibitisha kuwa makovu hayajarudi.

• Ikiwa mwanamke anatamani kupata mtoto, matibabu ya uzazi yanaweza kufuatia ikiwa hedhi haijarudi kikamilifu au kama kuna matatizo ya kupevuka kwa mayai.

Ushauri kwa mgonjwa

Kwa mwanamke ambaye amekosa hedhi kwa miaka sita baada ya upasuaji, na ameshazunguka hospitali nyingi bila mafanikio:

• Usikate tamaa. Sindromu ya Asherman inaweza kutibiwa kikamilifu kwa kutumia teknolojia ya kisasa kama histeroskopi.

• Tafuta daktari bingwa wa magonjwa ya wanawake mwenye uzoefu na vifaa vya hysteroscopi., hospitali kubwa za rufaa au vituo maalum vya afya ya uzazi vinaweza kutoa huduma hii.

Hitimisho

Sindromu ya Asherman ni hali inayotibika. Kupoteza hedhi kwa miaka mingi baada ya upasuaji kunaashiria uwepo wa makovu ndani ya mji wa mimba. Kwa kutumia vipimo na matibabu sahihi – hasa hysteroskopi – kuna nafasi kubwa ya kurejesha mzunguko wa hedhi na uwezo wa kushika mimba. Jambo muhimu ni kupata huduma ya kibingwa mapema.