Uchafu usio wa kawaida baada ya kujifungua kwa upasuaji, Je, ni dalili ya maambukizi?

Baada ya kujifungua kwa njia ya upasuaji (operation au C-section), mwili wa mama huanza mchakato wa kupona. Ni kawaida kutokwa na uchafu mweupe au wenye damu kidogo (lokia) kwa wiki chache baada ya kujifungua. Hata hivyo, ikiwa uchafu unaendelea kwa muda mrefu au una mabadiliko ya harufu, rangi, au unakuja na muwasho na maumivu, hiyo inaweza kuwa dalili ya tatizo la kiafya linalohitaji matibabu ya haraka.

Swali la mgonjwa

“Nimejifungua kwa operation mwezi wa pili. Sasa natokwa na uchafu mzito kama kamasi unaowasha sana. Muda mwingine unakuwa na rangi kama kijani, nyeusi, nyekundu au maziwa. Shida ni nini na nifanyaje kupata suluhisho? Maana uchafu unazidi na nakosa raha.”

Maelezo ya tatizo lako

Kutokwa na uchafu mzito, unaowasha, na wenye rangi isiyo ya kawaida miezi kadhaa baada ya kujifungua si hali ya kawaida. Hii inaweza kuwa dalili ya maambukizi ya uke au kizazi, na wakati mwingine huashiria matatizo makubwa zaidi kama kuna mabaki ya plasenta au jeraha lisilopona vizuri.

Rangi ya uchafu inaweza kumaanisha nini?

Sababu zinazowezekana kusababisha uchafu huu

1. Maambukizi ya ndani ya kizazi (endometraitis): Hali hii huweza kutokea baada ya kujifungua kwa upasuaji. Inasababishwa na bakteria wanaoingia kwenye kizazi.

2. Maambukizi ya uke (vaginaitis): Huambatana na muwasho, uchafu mzito, na mabadiliko ya rangi au harufu.

3. Magonjwa ya zinaa: Kama vile gonorea, klamydia au trikomoniasis huweza kusababisha uchafu wa rangi ya kijani na kuwasha.

4. Kitu kilichosahaulika ndani ya uke: Baadhi ya wanawake huachwa na gozi au kitu kingine ndani ya uke wakati wa upasuaji au usafi, hali hii inaweza kusababisha maambukizi makali.

5. Mabaki ya kondo la nyuma: Mabaki ndani ya mfuko wa uzazi yanaweza kusababisha kutokwa na uchafu wa muda mrefu, wenye harufu na hata damu.

Dalili za kuangalia zinazoashiria tatizo kubwa

• Uchafu wenye harufu mbaya

• Rangi ya uchafu isiyo ya kawaida (kijani, nyeusi, njano nzito)

• Kuwashwa au kuchoma ukeni

• Maumivu ya tumbo la chini

• Homa au kuhisi baridi

• Uchovu mwingi au kizunguzungu

Vipimo na uchunguzi unaotakiwa kufanywa

Unapofika hospitali, daktari anaweza kufanya yafuatayo:

• Kupima uchafu wa uke (HVS test): Kuangalia aina ya vijidudu vilivyopo.

• Kupima damu (Full hemogram): Kuangalia dalili za maambukizi (WBC juu).

• Ultrasound ya nyonga: Kuangalia kama kuna mabaki ya plasenta au majimaji yasiyo ya kawaida ndani ya kizazi.

• Kupima magonjwa ya zinaa (STIs): Ikiwa kuna dalili zinazoshabihiana.

Matibabu

Matibabu hutegemea chanzo cha tatizo, lakini yanaweza kujumuisha:

• Dawa za antibiotic kama metronidazole, doxycycline, au ceftriaxone – kutibu bakteria au maambukizi ya kizazi.

• Antifungal kama fluconazole – kama kuna fangasi.

• Kusafisha kizazi (evacuation) – kama kuna mabaki ndani.

• Kutoa swabu au kitu kilichosalia – kwa njia ya upasuaji mdogo au kwa kutumia vifaa maalum.

Unachoweza kufanya nyumbani

• Usijisafishe ndani ya uke kwa kutumia sabuni au dawa za kusukutua.

• Vaa nguo za ndani safi, za pamba na zisizobana.

• Epuka kushiriki tendo la ndoa hadi utakapopona kabisa.

• Fuata usafi wa kawaida bila kutumia kemikali kali.

Hitimisho

Kutokwa na uchafu mzito wa ajabu, unaowasha na kubadilika rangi miezi kadhaa baada ya kujifungua kwa operation ni dalili ya tatizo la kiafya linalohitaji matibabu ya haraka. Usikae kimya au kutumia dawa za dukani bila kufanyiwa uchunguzi sahihi. Tafadhali fika hospitali ili kufanyiwa vipimo na kupata matibabu sahihi kabla hali haijazidi kuwa mbaya.