Maji na mafuta ni miongoni mwa tiba ya kupasuka midomo

Kupasuka midomo ni tatizo linalowapata watu wengi kwa nyakati mbalimbali ndani ya mwaka. Visababishi vinaweza kuwa hali ya hewa ya baridi au yenye ukavu, kuungua na mwanga wa jua, kupulizwa na upepo mkali, kulamba midomo na kupumua kupitia mdomo. Kunywa maji ya kutosha, paka mafuta au 'lip balm' na kujifunika midomo huwa ni tiba pia kinga.

Dalili

Watu wengi hupata tatizo la kukauka kwa midomo mara kwa mara, kukauka kwa midomo huonekana na dalili zifuatazo;

• Kutokwa na damu

• Vidonda

• Kupata magamba meusi

• Homa ya baridi

• Kukauka kwa midomo

• Kubadilika rangi ya midomo au kuvimba

Visababishi vikuu

Visababishi vikuu vya kupasuka midomo ni vitu vya kawaida kama vile;

• Hali ya hewa ya baridi

• Hali ya hewa yenye ukavu

• Kuchomwa na mwanga wa jua

• Joto kali ndani ya nyumba

• Kupulizwa na upepo mkali

• Kupungukiwa maji mwilini

• Homa baridi

• Kulama midomo

• Matumizi ya baadhi ya vipodozi na lip balm

Visababishi vya nadra

Kwa nadra sana kupasuka midomo huweza kusababishwa na;

• Kutoa pumzi kupitia mdomo

• Mzio(aleji) kwenye baadhi ya mazao unayotumia kama 'rangi ya midomo' na 'lip balm'

• Maambukizi ya kirusi cha herpes simplex

• Utapiamlo

• Kuishiwa maji mwilini

• Upungufu wa baadhi ya vitamin

Matibabu ya nyumbani

Endapo umepata tatizo la kupasuka midomo, huna haja ya kuhofu kwa sababu tatizo hili mara nyingi husababishwa na sababu za kawaida. Fanya mambo yafutayo ili kujitibu nyumbani.

• Paka midomo yako mafuta ya mgando yaliyotengenezwa kwa kutumia 'Petroleum' yasiyo na manukato au tumia lip balm maalumu zenye niacin au 'zinc oxide' au 'white petrolatum', au 'essential fatty acids' za kulainisha midomo. Tembea na mafuta au lip balm ili kutumia kila mara midomo yako inapoonyesha ishara ya kukauka

• Kunywa maji ya kutosha kama inavyoshauriwa kiafya, unaweza kutembea na chupa ya maji na kunywa unapohisi kiu au midomo kukauka

• Acha mazoea ya kulamba midomo yako, majimaji ya mate yanapokauka husababisha midomo kukauka

• Jifunike kwa kitambaa au leso maeneo ya midomo endapo unasafiri kwenye upepo au jua kali

Mambo ya kufanya endapo tatizo halijaisha

Matibabu ya nyumbani yanaweza kuchukua kuanzia siku tatu hadi mwezi kuondoa tatizo kabisa. Kama umetumia njia za matibabu ya nyumbani kwa kipindi hicho, bila kupata matokeo chanya, au kuonekana kwa dalili mbaya za maambukizi, wasiliana na daktari wako mara moja kwa ushauri zaidi, uchunguzi na tiba.