Kurasa hii imezungumzia kuhusu huduma ya kwanza kwa mgonjwa mwenye shinikizo la juu la damu au presha ya kupanda. Mtu mwenye presha ni yule ambaye ana shinikizo la damu la sistoliki linazoanzia 140 milimita za mercury na kuendelea na lile la diastoliki la 90 milimita za mercury na kuendelea. Mahitaji ya huduma ya dharura hutegemea aina ya mgonjwa na endapo anatumia dawa au la.

Shinikizo la damu la damu linalohitaji matibabu ya dharura hutakiwa tibiwa na daktari au mtaalamu wa afya aliyefunzwa tu. Shinikizo hilo huweza kuwa linaambatana na dalili za hatari au linaloambatana na dalili za hatari. Kwa shinikizo linaloleta dalili za hatari kama zilivyoorosheshwa hapa chini, ni vema ukampigia daktari wako ili kupata matibabu ya dharura, kuepuka madhara yanayoweza kujitokeza.

Shinikizo la damu la dharura ni lipi?

Shinikizo la dhalura ni lile ambalo lipo au linazidiviwango vifuatavyo;

Shinikizo la sistoliki 180 milimita za mercury (180mmHg) na

Shinikizo la dayastoliki 110 yaani (110mmHg)

Au kwa pamoja ni shinikizo linaloanzia au kuzidi 180/110mmHg

Dalili za shinikizo la juu la damu

Shinikizo la juu la damu mara nyingi huwa halionyeshi dalili yoyote ile, hata hivyo endapo dalili zimeonekana huweza kuwa dalili za kawaida au dalili za hatari. Dalili za hatari huashiria madhara ambayo yameshatokea kwenye mwili wako

Dalili za kawaida na za hatari

Dalili za kawaida

• Kizunguzungu

• Kutokwa jasho

• Madhaifu ya hali ya moyo (kuwa mkali, kuwa na huzuni, kukanganyikiwa)

• Kifua kubana

• Kuhisi mapigo ya moyo yanaenda kasi

• Kupata haja kubwa ngumu

Dalili za hatari

• Maumivu au mgandamizo kwenye Kifua, mgongo, taya, shingo, mabega, mikono

• Kutapika

• Maumivu ya kichwa

• Kupumua haraka haraka

• Degedege

• Kuzimia

• Kutopata mkojo

• Kubadilika uono (upofu)

• Kupata ganzi ya ghafla

• Kupooza sehemu yoyote ya mwili

• Kutopata mkojo au mkojo kidogo

Namna ya kumpa huduma ya kwanza mgonjwa mwenye shinikizo la juu la damu

Kama una mgonjwa ana shinikizo la juu la damu kwa kupima, fanya mambo yafuatayo ili kumsaidia;

• Mpatie dawa ambazo alikuwa anatumia kushusha shinikizo la juu la damu na anywe dozi ambayo alishauriwa na daktari wake

• Piga simu mara moja kwa wataalamu wa huduma za dharura ili waje kumpatia huduma, kama ukiweza pia mkimbize hospitali

Kumbuka

Dawa zinazoshusha shinikizo la damu hutolewa kwa cheti kilichoandikwa na daktari, mtumizi ya dawa hizo huhitaji uwe na ujuzi nazo ambao wanao wataalamu wa afya tu

Shinikizo la damu lililo juu sana linapaswa kushushwa na dawa za kunywa au kuchoma kwenye mishipa kwa utaratibu maalumu, kushusha shinikizo la damu kwa ghafla huweza kuleta matatizo mengine makubwa kuliko kuwa na shinikizo la juu la damu

Mfikishe hospitali mgonjwa haraka iwezekanavyo kupata huduma sahihi na kwa wakati ili kuepuka madhara ya shinikizo la juu la damu kupita kiasi

Malengo ya matibabu ya shinikizo la juu la damu la dharura ni, kushusha shinikizo la damu kwenda kwenye kiwango kinachotakiwa ndani ya masaa 2 hadi 6 kwa wagonjwa wenye dalili za hatari, na kushusha shinikizo la damu kwenye kiwango kinachokubalika ndani ya siku 2 hadi 3 kwa wagonjwa wasio na viashiria vya hatari.