Je, mabonge yanayofuatiwa na damu kidogo baada ya dawa ya kutoa mimba ni ishara ya mafanikio?

Swali la msingi

Habari daktari, ninahitaji msaada leo ni siku ya tano tangu nimetoa ujauzito kwa dawa na damu ya mabonge ilitoka siku ya kwanza na baada ya hapo inatoka nyepesi, je hii inaweza kuwa imesaidia?

Majibu

Baada ya kutoa mimba kwa njia ya dawa (medication abortion), wanawake wengi hupitia mabadiliko ya kutokwa na damu na maumivu ya tumbo. Moja ya maswali yanayoulizwa sana ni: Je, damu ya mabonge inayotoka siku ya kwanza na damu nyepesi siku zinazofuata, ni ishara kuwa mimba imetoka kikamilifu? Makala hii inaangazia majibu ya kitaalamu kuhusu hali hiyo, hatua za kuchukua, na dalili za hatari.

Namna dawa ya kutoa mimba inavyofanya kazi

Dawa ya kutoa mimba kwa kawaida hutumia mchanganyiko wa misoprostol na/au mifepristone.

• Mifepristone huvunja utegemezi wa ujauzito kwa homoni ya projesteroni.

• Misoprostol husababisha mji wa mimba kusinyaa na kusukuma mimba kutoka nje.

Kwa kawaida:

• Siku ya kwanza ya matumizi, mwanamke hutokwa na damu nyingi yenye mabonge, jambo linaloashiria kuwa mchakato umeanza.

• Siku zinazofuata, damu huwa nyepesi zaidi na hukoma ndani ya wiki moja hadi mbili.

Je, damu kidogo baada ya mabonge ni ishara ya mafanikio?

Ndiyo – kwa hali ya kawaida, kutokwa na damu nyingi siku ya kwanza na damu nyepesi siku zinazofuata huonyesha kuwa mchakato umekuwa na mafanikio.

Hali ya kawaida ni:

• Siku ya 1–2: Mabonge na damu nyingi hutoka.

• Siku ya 3–7: Damu nyepesi au matone (spotting) huendelea.

• Baada ya wiki 1–2: Damu hukoma kabisa, na mwili huanza kurudia hali ya kawaida.

Hata hivyo, hali ya kila mwanamke hutofautiana na uthibitisho wa mafanikio unapaswa kufanywa kitaalamu.

Njia za kuhakikisha kama mimba imetoka kikamilifu

1. Ultrasound (kipimo cha picha ya mji wa mimba):

   • Hufanyika ndani ya wiki 1–2 baada ya kutumia dawa.

   • Huonyesha kama kuna mabaki ya ujauzito au kama mfuko wa mimba uko wazi.

2. Kupima homoni ya mimba (Beta-hCG) kwenye mkojo:

   • Kipimo hiki kinapaswa kupimwa angalau wiki ya 2 au tatu tangu kutumia dawa za kutoa mimba

   • Hupaswa kufanyika mara mbili kwa siku tofauti na kwa kutumia mkojo wa asubuhi sana.

   • Kama kiwango cha hCG kinashuka kwa kasi na kutoonekana kwenye kipimo, inaashiria kuwa mimba imetoka kikamilifu.

Dalili zinazoashiria mafanikio

• Kupungua kwa damu kadri siku zinavyosonga.

• Maumivu ya tumbo yanapungua.

• Hakuna harufu mbaya kwenye damu.

• Hakuna homa wala kutetemeka.

Dalili za hatari baada ya dawa ya kutoa mimba

Ni muhimu kumwona daktari haraka iwezekanavyo endapo utapata na dalili zifuatazo;

• Kutokwa damu nyingi isiyoisha, kama kubadilisha pedi zaidi ya mbili kwa saa.

• Maumivu makali ya tumbo yasiyopungua.

• Homa au kutetemeka (dalili za maambukizi).

• Harufu mbaya kutoka ukeni.

• Kizunguzungu au kuzimia.

Ushauri wa kitabibu

• Kama damu inatoka kidogo na hakuna dalili za hatari, endelea kujipumzisha.

• Epuka kujamiiana hadi damu iishe kabisa.

• Tumia pedi badala ya tampuni au kikombe cha hedhi.

• Tumia dawa za kupunguza maumivu kama paracetamol au ibuprofen kama ulivyoelekezwa na mtaalamu.

• Fanya kipimo cha uhakiki (ultrasound au hCG) ndani ya wiki mbili.

Hitimisho

Kutokwa na damu ya mabonge siku ya kwanza na damu nyepesi siku zinazofuata ni mwenendo wa kawaida baada ya kutoa mimba kwa dawa, na huashiria kuwa mchakato huenda umefanikiwa. Hata hivyo, ni muhimu kufanya uthibitisho wa kitabibu ili kuhakikisha kuwa mji wa mimba uko wazi na hakuna mabaki. Kumbuka kutafuta huduma ya haraka endapo utapata dalili zisizo za kawaida.