Siku za kushika mimba mzunguko wa siku 30

Swali la msingi

Habari daktari, je ni siku gani za kushika mimba kwa mzunguko wa hedhi wa siku 30?

Majibu

Asante kwa swali zuri. Unapojua mzunguko wako wa hedhi vizuri, unaongeza nafasi ya kushika ujauzito kwa mafanikio. Kwa wanawake wenye mzunguko wa siku 30, kuna siku mahsusi ambazo uwezekano wa kupata mimba huwa mkubwa zaidi.

Mzunguko wa Hedhi wa Siku 30 ni Nini?

Mzunguko wa hedhi ni kipindi kutoka siku ya kwanza ya hedhi hadi siku ya mwisho kabla ya hedhi inayofuata. Kwa wanawake wenye mzunguko wa siku 30, hedhi hutokea kila baada ya siku 30. Siku ya 1 ni siku ya kwanza unapopata damu ya hedhi. Siku ya 30 ni siku kabla ya kupata hedhi inayofuata.

Uovuleshaji hutokea lini?

Kwa mzunguko wa siku 30, uovuleshaji(kutolewa kwa yai) hutokea takriban siku ya 16 ya mzunguko.

Dirisha la rutuba

Dirisha la rutuba ni kipindi cha siku 6 kuzunguka uovuleshaji, wakati huu nafasi ya kushika mimba ni kubwa sana.

Kwa mzunguko wa siku 30, dirisha la rutuba ni kati ya siku ya 11 hadi 17.

Jedwali la siku za kushiriki ngono bila kinga kwa uwezekano bora wa kupata mimba

Dalili za uovuleshaji unazoweza kuzitambua

• Ute wa ukeni kunata kama yai bichi

• Maumivu madogo ya tumbo upande mmoja

• Kuongezeka kwa hamu ya tendo la ndoa

• Joto la mwili wa asubuhi kuongezeka baada ya uovuleshaji

Vidokezo vya kuongeza wezekano wa Kushika Mimba

• Fanya tendo la ndoa mara kwa mara katika siku za rutuba

• Kula lishe bora na punguza msongo wa mawazo

• Epuka pombe, sigara na dawa zisizopendekezwa

• Hakikisha hakuna matatizo ya kiafya yanayozuia mimba

• Tumia kikokotoo cha uovuleshaji au vifaa vya kupima uovuleshaji vinavyopatikana maduka makubwa ya dawa ili kujua siku halisi ya uovuleshaji.

Wakati gani wa kuonana na daktari?

Ikiwa hujapata ujauzito baada ya miezi 6–12, fanya uchunguzi wa uzazi:

• Mwanamke huangaliwa kama uovuleshaji kwake unatokea, hali ya mirija na ovari

• Mwanaume huchunguzwa mbegu: idadi, umbo na uwezo wa kujongea

Hitimisho

Kwa mzunguko wa siku 30, siku ya 16 ni ya uovuleshaji, na siku bora za kushiriki tendo la ndoa ni kuanzia siku ya 11 hadi 17. Ukifuata ratiba hii kwa usahihi, nafasi ya kupata ujauzito huongezeka kwa kiwango kikubwa.