Tatizo la Haipatenshen limegawanywa katika makundi tofauti kulingana na mahitaji ya kitiba, Kundi la kwanza limetokana na visababishi, katika kundi hili kuna aina mbili yaani haipatenshen ya awali na haipatenshen ya sekondari.

Makundi ya haipatenshen kutokana na visababishi

Haipatenshen ya awali

Haipatenshen ya awali ni aina ya shinikizo la juu la damu, kisababishi mara nyingi huwa hakifahamika. Huchangia kwa asilimia 90 - 95 ya ugonjwa wa haipatensheni haswa watu wazima wenye umri wa miaka 35 na kuendelea.

Haipatensheni ya awali huhusianishwa na sababu za kimazingira au za kiasilia kama ifuatavyo;

• Kurithi- inaonekana kwamba watu wengi wenye shinikizo la damu baadhi huwa na historia hii kwenye familia zao lakini urithishwaji huu bado haueleweki vizuri. Kuna utafiti umefanyika na kuonesha watoto mapacha wanaozaliwa wote wanaweza kupata shinikizo la damu la juu kwa asilimia 33-57%

• Uzito mkubwa kupita kiasi (ugonjwa wa obeziti)

• Ugonjwa wa kisukari

• Magonjwa ya moyo

Haipatenshen ya sekondari

Haipatenshen ya sekondari huchangiakwa asilimia 5-10 ya shinikizo la juu la damu. Zipo sababu za moja kwa moja zinazofahamika kusababisha haipatensheni hii. Watu wanaopata shinikizo hili la damu wengi huonekana kuwa na umri chini ya miaka 35.

Makundi mengine ya shinikizo la juu la damu

Shinikizo la juu la damu linalozidi la 180/120 linaweza kugawanywa tena katika makundi mawili ambayo ni;

Shinikizo la damu la juu linalohitaji matibabu ya haraka

Shinikizo hili haliambatani na ishara ya madhara ya shinikizo kwenye ogani ndani ya mwili, mgonjwa huenda hospitali akiwa anajihisi vibaya na anapopimwa anakuwa na shinikizo la damu la juu sana. Matibabu ya shinikizo hili huchukua siku 2 hadi 3 na dawa za kumeza hutumika mgonjwa akiwa amelazwa wodini, au nyumbani chini ya usimamizi wa daktari.

Shinikizo la damu linalohitaji matibabu ya dharura

Aina hii inajitokeza na dalili za uhalibifu wa organi mbalimbali mwilini kama vile macho(kushindwa kuona vema), ubongo( mabadiliko ya kiakili/tabia ya mtu), figo (kutokukojoa au kukojoa mkojo kidogo sana), mapafu(maumivu ya kifua) na moyo(maumivu ya moyo ya ghafla na maumivu ya kifua), mapafu (maji kwenye mapafu) na ujauzito( kifafa cha mimba), ubongo( damu kuvia kwenye ubongo) na moyo (mshituko wa moyo na kifo).

Mgonjwa anahitaji matibabu ya dharura kwenye chumba cha watu mahututi yani ICU na matibabu yake yanahusisha kushusha shinikizo hili ndani ya saa 1 hadi 2nadawa za zinazotumika ni za kuchoma kwenye mishipa ili kuepuka madhara makubwa zaidi yanayoweza kutokea na kuokoa maisha