Hedhi baada ya kutoa mimba

Hedhi baada ya kutoa mimba inaashiria urejeaji wa mzunguko wa kike baada ya mimba kutoka au kusafishwa kizazi kwa njia ya dawa au kimwili. Uelewa wa mabadiliko haya ni muhimu kwa afya ya uzazi na kuzuia matatizo kama maambukizi au kuchelewa kwa mzunguko wa hedhi.

Ni lini damu ya hedhi hureje baada ya kutoa mimba?

Baada ya kutoa mimba, baadhi ya wanawake hedhi yao hurejea mara baada ya kusafishwa kizazi au baada ya wiki chache toka mimba imetoka.

Kwa kawaida inachukua wiki 4 hadi 6 kwa hedhi kurejea, hata hivyo kurejea kwake hutegemea kiwango cha homoni za ujauzito ambazo hutofautiana kati ya mwanamke mmoja na mwingine na hutegemea umri wa ujauzito.

Endapo homoni za ujauzito zitaendelea kuwepo kwenye damu baada ya kutoa mimba, hedhi ya kwanza itachelewa kutokea.

Itakapopita wiki zaidi ya sita bila kuona hedhi, unapaswa kupima ujauzito ili kuhakikisha kama unao kabla ya kuonana na daktari wako kwa uchunguzi.

Muda wa hedhi kudumu baada ya kutoa mimba

Hedhi ya kwanza baada ya kutoa mimba huweza kuwa fupi kuliko kawaida yako baada ya kutoa mimba kwa njia ya kusafishwa kizazi na huwa ndefu endapo mimba imetolewa kwa dawa. Utofauti ni kutokana na mabadiliko ya homoni lakini mzunguko wa hedhi utarejea kama kawaida baada ya muda kupita.

Sifa za hedhi ya kwanza baada ya kutoa mimba

Hedhi ya kwanza inayotokea baada ya kutoa mimba huweza kuwa na damu nyingi na nzito kuliko kawaida, haswa kwa waliotoa mimba kwa njia ya dawa ukifanannisha na njia ya kusafishwa kizazi kwa sababu njia hii hutoa tishu zote za mimba zilizo ndani ya kizazi taratibu, na baaadhi ya wakati huambatana na kupitisha mabonge ya damu iliyoganda.

Hedhi ya baada ya kutoa mimba kwa kusafishwa kizazi huwa nyepesi mwanzoni na hurejea kawaida baada ya miezi michache.

Aina za ute unaotoka ukeni baada ya kutoa mimba

Ni kawaida baada ya mimba kutoka kutokwa na ute wa rangi nyekundu ukifuatiwa na pinki na baadaye njano au ute wa rangi ya maji n.k. licha ya kuwa na rangi tofauti na kawaida wiki kadhaa baada ya kutoa mimba, ute unaotoka haupaswi kuwa na harufu mbaya kama ya samaki kwani harufu hiyo huashiria maambukizi. Soma zaidi kuhusu ute baada ya kutoa mimba au kujifungua kwa kubofya hapa.

Dalili za hedhi ya kwanza baada ya kutoa mimba

Dalili za hedhi huwa kama za kawaida lakini wiki ya kwanza huambatana na maumivu ya tumbo la chini ya kunyonga yanayoendelea kupungua ukali siku zinavyoenda. Dalili zingine zinazoweza kutokea ni;

• Tumbo kujaa gesi

• Maumivu ya kichwa

• Maumivu ya titi yakiguswa

• Maumivu ya misuli

• Kupoteza mudi nzuri

• Uchovu

Matumizi ya pedi baada ya kutoa mimba

Unaruhusiwa kuvaa taulo gani ya kike?

Unaruhusiwa kuvaa taulo ya kike (pedi) za kinamama waliojifungu na kuepuka pedi za kuchomeka ndani ya uke baada ya mimba kutoka au kutoa mimba.

Lini nitarejea kuanza vaa pedi za kawaida?

Baada ya wiki mbili kupita toka mimba imetoka au baada ya damu kukatika, unaweza anza vaa pedi za kawaida ambazo ulikuwa unatumia.

Hedhi ya pili baada ya kutoa mimba

Wanawake wengi hupata hedhi ya pili ya kawaida baada ya kutoa mimba, hata hivyo wengi wao wanaweza kuwa na mzunguko wa hedhi usioeleweka kwa miezi michache. Mzunguko unaweza kuwa mrefu au mfupi na damu inaweza kuwa kidogo au nyingi ikitegemea njia ambayo ulitumia kutoa mimba. Wakati wa hedhi ya pili, unaruhusiwa kutumia pedi ya aina yoyote kama ulizokuwa unatumia awali

Mambo ya kufanya baada ya kutoa mimba

Unapaswa kufahamu kwamba, baada ya kutoa mimba kuna uweekano mkubwa sana wa kupata mimba utakaposhiriki ngono, ni vema wakati huu ukatumia kinga au ukaacha kushiriki kabisa mpaka mzunguko wako wa hedhi utakapokuwa vema. Unaweza kutumia njia za uzazi wa mpango pia, lakini hizi hazitakukinga kupata maambukizi ya magonjwa ya zinaa.

Unashauriwa kuacha shiriki ngono kwa wiki kadhaa mpaka mzunguko wako wa kawiada utakaporejea kwa sababu kipindi baada ya kutoa mimba mlango wa kizazi huwa wazi na hupelekea uwezekano mkubwa wa kuruhusu maambukizi kupenya na kuingia ndani ya mji wa uzazi haswa endapo damu bado zinatoka.

Kipindi gani salama kujamiana baada ya kutoa mimba?

Inashauriwa kitaalamu kukaa kwa muda wa angalau wiki mbili au zaidi bila kujamiana baada ya kutoa mimba.

Hata hivyo WHO na baadhi ya madaktari na wanashauri usubirie mpaka pale damu itakapokata ndipo ushiriki ngono, hii ni kwa sababu utapunguza hatari ya kupata maambukizi kwenye mfuko wa uzazi. Damu inapokuwa inaendelea kutoka, hii inamaanisha mlango wa uzazi upo wazi, hivyo maambukizi yanaweza ingizwa ndani ya kizazi wakati huu endapo utajamiana. Maambukizi yanaweza kuwa ya vimelea vya magonjwa ya zinaa au yasiyo ya zinaa.

Wakati gani unapaswa kuonana na daktari haraka?

Unapaswa kuonana na daktari haraka endapo unapata dalili zifuatazo za hatari baada ya kutoa mimba;

• Unajaza pedi kubwa zaidi ya mbili kwa kila saa

• Unatokwa na mabonge makubwa ya damu mithiri ya limao

• Una maumivu makali sana ya tumbo au mgongo

• Maumivu ya tumbo hayaishi na dawa ulizopewa

• Unapata homa zaidi ya nyuzijoto 38 za selishazi

• Unatetemeka

• Unatokwa na uchafu unaonuka ukeni

• Unatokwa na uchavu wa njano au kijani ukeni

• Endapo hedhi yako haijarejea kwa zaidi ya wiki nane toka mimba imetoka

Hitimisho

Hedhi baada ya kutoa mimba ni sehemu ya urekebishaji wa mwili. Kuelewa muda wake, dalili, na hatua za kinga ni muhimu kwa afya ya uzazi na kupunguza matatizo yanayoweza kutokea. Wanawake wanashauriwa kuendelea kufuata mwongozo wa daktari na kutumia kinga ya afya ya uzazi hadi mzunguko wa hedhi ureje kwa kawaida.

Maswali yaliyoulizwa mara kwa mara