Dawa Chlorpheniramine

Chlorpheniramine ni dawa ya kundi la antihistamine (kizazi cha kwanza) inayotumika kutibu dalili za mzio (allergy) kama mafua ya mzio, kuwashwa macho, chafya, upele, na kikohozi kinachosababishwa na mzio. Dawa hii pia hupatikana mara nyingi kama sehemu ya mchanganyiko wa dawa za mafua na kikohozi.

Majina ya kibiashara

Majina ya kibiashara ya Chlorpheniramine ni pamoja na;

• Piriton

• Chlor-Trimeton

• Aller-Chlor

• CPM

• Histafen

(Majina hutegemea mtengenezaji na nchi)

Chlorpheniramine ipo kundi gani la dawa?

Chlorpheniramine ipo katika makundi yafuatayo;

• Antihistamine (Kizuia risepta H1)

• Dawa za mzio (anti-allergic drugs)

• Dawa za mafua na kikohozi

Dawa zilizo kundi moja na Chlorpheniramine

Dawa zilizo kundi moja (antihistamine za kizazi cha kwanza) ni;

• Diphenhydramine

• Promethazine

• Cyproheptadine

• Hydroxyzine

• Triprolidine

Fomu za dawa

Chlorpheniramine hupatikana katika fomu zifuatazo;

• Kidonge

• Sirapu

• Sindano (katika mazingira ya hospitali, mara chache)

Uzito wa dawa

Chlorpheniramine hupatikana katika viwango vifuatavyo;

• Kidonge: 2 mg, 4 mg

• Sirapu: 2 mg / 5 mL

Chlorpheniramine hutibu nini?

• Mafua ya mzio (allergic rhinitis)

• Chafya na mafua yasiyo ya maambukizi

• Kuwashwa macho na macho kutoa machozi

• Kuumuka ngozi (yutikaria)

• Kuwashwa ngozi

• Kikohozi kinachosababishwa na mzio

• Dalili za mzio wa dawa au chakula (kwa kiwango cha chini)

Namna Chlorpheniramine inavyofanya kazi

Chlorpheniramine hufanya kazi kwa kuzuia histamine kwenye risepta H1. Histamine ni kemikali inayotolewa mwilini wakati wa mzio na husababisha dalili kama:

• Chafya

• Mafua

• Kuwashwa

• Uvimbe

• Macho kutoa machozi

Kwa kuzuia histamine, dawa hii hupunguza au kuondoa dalili hizo.Kwa kuwa ni antihistamine ya kizazi cha kwanza, pia huingia kwenye mfumo wa fahamu na kusababisha kusinzia.

Ufyozwaji wa Chlorpheniramine mwilini

• Hufyonzwa vizuri kupitia mfumo wa chakula

• Huonekana kwenye damu ndani ya dakika 30–60 baada ya kumeza

• Hufanyiwa umetaboli kwenye ini

• Hutolewa nje ya mwili kupitia mkojo

Mwingiliano wa Chlorpheniramine na chakula

• Inaweza kutumika pamoja au bila chakula

• Chakula kinaweza kupunguza muwasho wa tumbo kwa baadhi ya watu

Mwingiliano wa Chlorpheniramine na pombe

Pombe haifai kutumika pamoja na Chlorpheniramine

Kwa sababu pombe huongeza madhara ya mfumo wa fahamu kama;

• Kusinzia kupita kiasi

• Kizunguzungu

• Kupungua umakini

• Hatari ya ajali au kuanguka

Wagonjwa wasiopaswa kutumia Chlorpheniramine

• Wagonjwa wenye mzio wa Chlorpheniramine

• Wagonjwa wenye glaucoma (presha ya macho)

• Wagonjwa wenye kuziba kwa shingo ya kibofu

• Wagonjwa wenye tezi dume kubwa (BPH)

• Watoto wachanga bila ushauri wa mtaalamu

Tahadhari maalum

Tumia kwa umakini kwa wagonjwa wenye;

• Pumu ya kifua

• Magonjwa ya ini

• Magonjwa ya moyo

• Shinikizo la damu

• Wazee (huweza kusababisha kuchanganyikiwa na kuanguka)

Matumizi ya Chlorpheniramine kwa mama mjamzito

Hakuna ushahidi wa moja kwa moja unaoonyesha madhara makubwa kwa mtoto aliye tumboni, lakini inapaswa kutumika kwa tahadhari na pale tu faida kwa mama inapozidi hatari zinazoweza kutokea.

Matumizi ya Chlorpheniramine kwa mama anayenyonyesha

Chlorpheniramine hupita kwenye maziwa ya mama na inaweza kusababisha:

• Mtoto kusinzia

• Kupungua kwa maziwa ya mama

Inashauriwa kutumika kwa tahadhari au kuepukwa endapo kuna mbadala salama zaidi.

Dawa zenye mwingiliano na Chlorpheniramine

Dawa zisizopaswa kutumika pamoja (mwingiliano mkali);

• Pombe

• Benzodiazepines (mf. Diazepam)

• Opioids (mf. Codeine, Morphine)

• Dawa za usingizi (sedatives)

Dawa zinazoweza kutumika kwa uangalizi;

• Promethazine

• Amitriptyline

• Tramadol

• Antipsychotics (mf. Haloperidol)

• Dawa za mafua zilizo na antihistamine nyingine

Maudhi madogo ya Chlorpheniramine

• Kusinzia

• Kizunguzungu

• Kinywa kukauka

• Macho kukauka

• Kupungua umakini

• Maumivu ya kichwa

• Kichefuchefu

• Kuharisha au choo kigumu

Ufanye nini kama umesahau dozi yako?

Kama umesahau kutumia dozi yako, tumia mara tu unapokumbuka.Ikiwa muda wa dozi inayofuata umekaribia, ruka dozi uliyosahau na endelea na ratiba yako ya kawaida. Usitumie dozi mbili kwa wakati mmoja kufidia dozi uliyosahau.