Mambo ya kufanya endapo hushiki mimba

Swali la msingi

Mimi ni mwanamke mwenye miaka 27, ni mwaka wangu wa 12 sasa tangu nipo kwenye ndoa lakini sijabahatika kupata mtoto, nifanyaje ili nipate mtoto kitaalamu?

Majibu

Asante kwa swali lako muhimu. Kama umeishi kwenye ndoa kwa zaidi ya mwaka mmoja ukijamiiana bila kutumia njia za uzazi wa mpango na hujapata ujauzito, hali hii kitaalamu huitwa utasa. Kwa kuwa ni miaka 12 sasa bila kupata mtoto, unahitaji tathmini ya kina ya kitabibu wewe na mwenzi wako ili kubaini chanzo na kupata matibabu sahihi.

Hatua za kitaalamu unazopaswa kuchukua ili kusaidiwa kupata mtoto

1. Muone daktari bingwa wa magonjwa ya wanawake na uzazi

Atachukua historia ya afya yako na ya mwenzi wako, na kupanga vipimo muhimu.

2. Kufanya vipimo

Vipimo vya mwanamke vinaweza kujumuisha

• Ultrasound ya nyonga inayopitia ukeni: Kuchunguza ovari, mji wa mimba (kizazi), mirija ya uzazi.

• Kipimo cha kuchunguza mirija ya uzazi (HSG): Kupima kama mirija ya uzazi imeziba au iko wazi.

• Kipimo cha homoni: Kupima homoni kama:

  • FSH (Follicle Stimulating Hormone)

  • LH (Luteinizing Hormone)

  • Prolactin

  • Estradiol

  • TSH (kwa tezi)

• Kipimo cha uovuleshaji: Kuangalia kama yai linatoka kila mwezi.

Vipimo vya mwanaume vinaweza kujumuisha

• Kipimo cha mbegu za kiume: Kuchunguza idadi, kasi, na maumbo ya mbegu za kiume.

• Ikiwa kuna matatizo, wanaume hupewa matibabu au ushauri wa kitalaamu.

4. Tiba kutegemea kisababishi

• Ikiwa tatizo ni la homoni: dawa kama clomiphene citrate au letrozole husaidia kuchochea uzalishaji wa mayai.

• Ikiwa kuna matatizo ya mirija au mfuko wa mimba: upasuaji mdogo unaweza kusaidia.

• Ikiwa mbegu ni chache au dhaifu: tiba kama kuingiza mbegu moja kwa moja kwenye mfuko wa kizazi au kuchavushwa yai nje ya mji wa mimba inaweza kupendekezwa.

• Ikiwa hakuna tatizo lililogundulika: inaweza kuwa ni ugumba usioelezeka (usio na sababu) na matibabu kama kuchavusha yai nje ya mji wa mimba yanaweza kusaidia.

5. Fuatilia mzunguko wako

Tumia kalenda ya hedhi au app ya uzazi kufuatilia siku zako za rutuba. Ushiriki tendo la ndoa karibu na siku za uovuleshaji.

Usikate tamaa

Kuna wanawake waliopata watoto baada ya miaka mingi ya kusubiri wakitumia njia za kitaalamu. Hakikisha unapata msaada kutoka kwa daktari bingwa wa magonjwa ya wanawake na uzazi

Nini kingine cha kufahamu

Unapokwenda kwa daktari, hakikisha una majibu ya maswali yaliyo katika dodoso la kutoshika mimba. Bofya linki kusoma maswali.