Kitanzi chenye madini ya shaba

Mambo muhimu ya kufahamu kuhusu kitanzi cha shaba

• Kinga ya muda mrefu ya kuzuia mimba. Kimeonekana kufanya kazi vizuri sana kwa miaka 12, na kikitolewa mwanamke huweza kushika mimba haraka.

• Huingizwa kwenye kizazi na mtoa huduma aliyepata mafunzo maalum.

• Mteja hatakiwi kufanya lolote mara kitanzi kinapokuwa kimewekwa.

• Mabadiliko ya hedhi ni ya kawaida. Kwa kawaida, hupata hedhi ya damu nyingi na mkakamao wa misuli ya tumbo au maumivu wakati wa hedhi, hasa katika miezi 3 ya mwanzo.

Kitanzi ni nini

Kitanzi chenye madini ya shaba ni kiplastiki kilichozungushiwa madani ya shaba. Mtoa huduma ya afya aliyepata mafunzo maalum huingiza kitanzi ndani ya kizazi cha mwanamke kupitia uke na mlango wa kizazi.

Karibu aina zote za vitanzi zina nyaya au nyuzi mbili, zilizozungushiwa na kufungwa. Nyaya hizo huning’inia kupitia seviksi kwenda kwenye uke.

Hufanya kazi kwa kusababisha mabadiliko ya kikemikali ambayo huharibu mbegu za kiume na yai kabla hayajakutana.

Kina Ufanisi Kiasi Gani?

Moja ya njia zenye mafanikio makubwa na kwa muda mrefu:

• Inawezekana kupatikana chini ya mimba 1 kwa wanawake 100 wanaotumia kitanzi kwa mwaka wa kwanza (mimba 6 hadi 8 kwa wanawake 1,000). Hii ina maana kuwa wanawake 992 hadi 994 katika kila 1,000 wanaotumia kitanzi hawatapata mimba.

• Inabakia kuwepo hatari kidogo ya mimba kwa zaidi ya mwaka wa kwanza na inaendelea kuwepo wakati wote mwanamke anapotumia kitanzi.

• Kwa miaka 10 ya kutumia kitanzi: Karibu mimba 2 kwa wanawake 100.

• Tafiti zimegundua kuwa TCu-380A kinafanya kazi vizuri kwa miaka 12. Hata hivyo,TCu-380A kimewekewa lebo ya kutumika hadi miaka 10. (Watoa huduma wafuate mwongozo wa programu kuangalia lini kitanzi kitolewe).

• Kurudi kuwa na uwezo wa kushika mimba baada ya kutumia kitanzi: Bila kuchelewa

• Kinga dhidi ya magonjwa yaambukizwayo kwa ngono: Hakuna

Madhara

Baadhi ya watumiaji wameripoti yafuatayo:

• Mabadiliko katika mpangilio wa hedhi (hasa katika miezi 3 hadi 6 ya mwanzo)

• Kupata hedhi ya muda mrefu na ya damu nyingi

• Hedhi isiyotabirika

• Kukakamaa kwa misuli na maumivu wakati wa hedhi

Faida Kiafya Zinazojulikana

Husaidia kutoa kinga dhidi ya:

• Hatari ya kupata mimba

• Saratani ya kizazi

• Hatari Kiafya Zinazojulikana

Zisizo za kawaida:

Kinaweza kuchangia kusababisha anemia kama mwanamke tayari ana kiwango kidogo cha madini ya chuma kwenye damu kabla ya kuwekwa kitanzi na kitanzi kikasababisha kutokwa damu nyingi.

Nadra:

Ugonjwa wa uvimbe wa nyonga unaweza kutokea kama mwanamke ana chlamydia au kisonono wakati akiwekwa kitanzi.

Athari za kitanzi cha shaba

Athari za kitanzi cha shaba ni pamoja na;

• Kutobolewa kwa ukuta wa kizazi na kitanzi au kifaa kinachotumika kuingiza kitanzi. Kawaida hupona bila tiba.

• Kuharibika kwa mimba

• Kuzaa kabla ya wakati

• Maambukizi mara chache mwanamke anapopata mimba wakati akiwa na kitanzi

• Kutungwa kwa mimba nje ya kizazi

Nani anaweza na nani hawezi kutumia kitanzi chenye madini ya shaba?

Kitanzi cha madini shaba ni Salama na Kinafaa Karibu kwa Wanawake Wote

Wanawake wengi wanaweza kutumia kitanzi kwa usalama na ufanisi, ikiwa ni pamoja na wanawake ambao:

• Wanao au hawajawahi kuwa na watoto

• Hawajaolewa

• Wa umri wowote, pamoja na vijana na wanawake wenye umri zaidi ya miaka 40

• Ndiyo kwanza wametoa mimba au mimba zimeharibika (kama hakuna ushahidi wa maambukizi)

• Wananyonyesha

• Wanafanya kazi ngumu za kutumia nguvu

• Walikuwa na mimba zilizotunga nje ya kizazi ó Walikuwa na maambukizi sehemu za ukeni

• Wenye upungufu wa damu

• Wameambikizwa VVU, au wanatumia dawa za kupunguza makali ya UKIMWI na wanaendelea vizuri (tazama Vitanzi kwa Wanawake Wenye VVU, uk. 138)

Unahitaji kufanya vipimo kabla ya kuanza kutumia kitanzi chenye madini shaba?

Wanawake wanaweza kuanza kutumia Vitanzi:

• Bila kupima magonjwa ya ngono

• Bila kupima VVU

• Bila kupima damu au vipimo vingine vya maabara

• Bila kufanyiwa uchunguzi wa saratani ya kizazi

• Bila kufanyiwa uchunguzi wa matiti