Dawa ya gono kwa mwanaume

Swali la msingi

Kijana wa miaka 27 anayeishi mkoani anasema, wiki moja baada ya kushiriki tendo la ndoa bila kinga na mpenzi mpya, alianza kuhisi maumivu makali wakati wa kukojoa na kugundua ute mzito wenye usaha ukitoka kwenye uume wake kila asubuhi. Kwa hofu na aibu, alianza kutumia antibiotiki alizobakiza nyumbani bila kwenda hospitali. Baada ya siku tano, hali haikubadilika—maumivu yalizidi na usaha ukaongezeka na akaanza kujiuliza:

• Je, ni kweli nina gono au ni ugonjwa mwingine?

• Ni dawa gani sahihi za kutumia?

• Kwanini dawa nilizotumia hazijasaidia?

• Je, nikichelewa kwenda hospitali kuna madhara?

Katika makala hii ya ULY clinic, tutajibu maswali kama ya kijana huyyu kwa ufasaha wa kitabibu sambamba na kuelezea mambo yafuatayo;

• Dawa ya kutibu gono kwa mwanaume ni ipi?

• Orodha ya dawa za gono kwa mwanaume.

• Dawa ya kutibu usaha uumeni.

• Dawa ya kuondoa usaha kwenye uume.

Maelezo muhimu ya kufahamu kabla ya kufahamu dawa

Gono ni moja ya ugonjwa wa zinaa unaosababishwa na maambukizi ya bakteria mwenye jina la Nisseria gonorrhoear, ambaye huenezwa kwa njia ya kujamiana na mtu mwenye maambukizi. Dalili kuu ya ugonjwa zimeelezewa katika makala nyingine ya dalili za gono kwa wanaume.

Dawa za kutibu gono zipo za aina nyingi kutegemea eneo na eneo pia nchi na nchi. Utofauti huu huletwa na mambo mbalimbali ikiwa pamoja na hali ya mwitikio wa kimelea kwenye dawa husika. Baadhi ya vimelea vimebadili tabia na hivyo havisikii dawa ambazo hapo awali zimekuwa zikitibu ugonjwa huo.

Kwa kawaida watu wengi huchanganya ugonjwa wa gono na magonjwa mengine ya zinaa, kwa kuzania kuwa kutoka usaha kwenye uume kunasababishwa na gono tu. Hii si kweli, kuna magonjwa mengine yanaweza kupelekea uume kutoa usaha ambayo mara nyingi huwa magonjwa mengine ya zinaa pia. Hii ndio maana endapo una dalili hii ya gono ni muhimu kutibiwa magonjwa mengine ya zinaa yanayosababisha dalili hii ili kuhakikisha unapona haswa pale ambapo vipimo huwa havifanyiki au kutohitajika kufanyika.

Dawa za gono kwa wanaume

Inashauriwa ili kupata matibabu sahihi, wasiliana na daktari wako kwa ushauri na tiba. Baadhi ya dawa za kutibu gono kwa wanaume ni;

• Azithromycin

• Cefixime

• Cefotaxime

Kuona orodha kamili ya dawa za kutibu gono bofya soma makala ya dawa za gono.

Kumbuka

Endapo mgonjwa atatumia dawa sahihi na dozi sahihi atapona kwa wakati. Inashauriwa kutotumia dawa pasipo kushauriwa na daktari ili kuepuka madhara ya dawa na usugu wa vimelea kwenye dawa.

Majina mengine ya gono

Gono hufahamika kwa majina mengine kama kisonono.

Kwanini gono haiponi?

Matibabu ya ugonjwa wa gono mara nyingi hulenga kutibu magonjwa yote ya zinaa yanayosababisha kutokwa na usaa kwenye uume, hii ni kwa kuwa hufanana sana. Hivyo kuna wakati daktari atakuandikia dawa zaidi ya moja ili kuua vimelea kadhaa wanaosababisha dalili kama za gono.

Kutokana na maelezo haya, unaweza uzipone gono kwa kutumia dawa moja tu kwa kuwa kisababishi kinaweza kisiwe gono. Hata hivyo pia matumizi holela ya dawa hizi yamepelekea usugu wa vimelea kwenye dawa, hii ndio maana kumekuwa na wimbi la watu kutopona kwa dawa hizi zilizokuwa zinatumika awali na kuleta matokeo mazuri.

Kwenye matumizi holela, mtu anaweza kutumia dozi isiyo sahihi, mchanganyiko wa dawa zisizo sahihi, dawa zilizopita muda wa matumizi n.k

Unashauriwa kuwasiliana na daktari wako muda wote kabla ya kutumia dawa yoyote.

Hitimisho

Usaha kutoka uume ni dalili ya hatari ya magonjwa ya zinaa. Ni vyema kufanyiwa vipimo na kupata matibabu kamili na sahihi kutoka kwa daktari. Epuka kutumia dawa bila ushauri wa kitaalamu kwani kunaweza kusababisha usugu wa vimelea na kushindwa kupona.

Maswali yaliyoulizwa mara kwa mara