Kifua na mbavu kubana

Swali la msingi

Habari daktari, kifua changu kinabana na nimetumia dawa lakini bado, shida ni nini?

Majibu

Kifua kubana ni hali ya ugumu wa kupumua inayoweza kuambatana na maumivu ya kifua. Hali hii inaweza kuwa na athari kubwa kwa upumuaji na mara nyingi ni ishara ya tatizo la kiafya linalohitaji uchunguzi wa haraka. Kifua kinapobana na kuandamana na maumivu makali, ni muhimu kuelewa chanzo chake na hatua za kuchukua. Makala hii imeorodhesha baadhi ya visababishi, dalili na wakati gani wa kumwona daktari.

Visababishi vya kifua kubana na kupumua kwa shida

VIfuatavyo ni visababishi vya kupumua kwa shida, dalili na vitu vinavyoweza kusaidia;

Pumu ya kifua (Asthma)

Pumu ya kifua ni hali ya kupungua kwa njia za hewa, na husababishwa na michubuko katika njia za hewa kutokana na vitu kama vumbi, mzio, au maambukizi.

Dalili

• Kifua kinabana

• Miruzi wakati wa kupumua

• Kupumua kwa shida

• Mapigo ya moyo kwenda hara

• Kupumua kwa shida, hasa usiku au asubuhi mapema

• Kikohozi kisichokwisha

Nini kinaweza kusaidia?

• Dawa za kutanua njia ya hewa: Dawa za kupuliza na kuvuta kupitia pua au mdomo kama bronkodaileta na kotikosteroidi husaidia kufungua njia za hewa na kupunguza dalili.

• Kujikinga na viamsha pumu Kuepuka vichocheo vya mzio kama vumbi, moshi wa sigara, na poleni husaidia kudhibiti dalili.

• Mazoezi ya kupumua: Mazoezi ya kupumua yanaweza kusaidia kuongeza uwezo wa kupumua na kupunguza shida ya kupumua.

  
  

Wakati wa kumwona daktari

Ikiwa kifua kinabana kwa muda mrefu au hakijibu dawa ya pumu ya kifua, ni vyema kumuona daktari ili kuthibitisha hali hii na kupata dawa zinazofaa.

Homa ya mapafu (Nimonia)

Homa ya mapafu ni maambukizi ya mapafu ambayo husababishwa na bakteria, virusi, na vimelea wengine. Homa hii ni hatari na inaweza kusababisha matatizo makubwa ya kupumua na kifua kubana.

Dalili

• Maumivu ya kifua, hasa wakati wa kupumua

• Homa kali

• Kikohozi cha mara kwa mara (kinachoweza kuwa na kamasi ya rangi ya kijani au ya damu)

• Upungufu wa pumzi

• Uchovu

• Kichefuchefu au kutapika

Nini kinaweza kusaidia?

• Dawa za antibiotiki na virusi: Matibabu ya vimelea vya bakteria au virusi, kulingana na aina ya pneumonia husaidia kudhibiti dalili.

• Vimiminika na kupumzika: Kunywa maji mengi na kupumzika husaidia kuupa mwili muda wa kupambana na maambukizi.

• Tiba oksijeni: Ikiwa unapumua kwa shida, oksijeni inaweza kutumika ili kusaidia kupumua kwa urahisi.

Wakati wa kumwona daktari

Ikiwa dalili hizi zinaendelea na maumivu ya kifua yanaongezeka, ni muhimu kumwona daktari haraka, kwani homa ya mapafu inaweza kuwa na madhara makubwa ikiwa haitatibiwa mapema.

Matatizo ya moyo

Matatizo ya moyo kama vile kiharusi cha moyo (heart attack) au kifafa cha moyo (angina) yanaweza kusababisha kifua kubana na matatizo ya kupumua

Dalili

• Maumivu au kubana kwa kifua

• Kuhisi kichwa kinazunguka

• Kuishiwa pumzi

• Kichefuchefu

• Kupumua kwa shida

• Uchovu wa kupindukia

• Hali ya kutojiskia vizuri au kuvimba miguu

Nini kinaweza kusaidia?

• Nitroglaiserini: Dawa hii hupunguza maumivu ya kifua na kusaidia kuboresha mtiririko wa damu kwenye moyo.

• Aspirin: Dawa hii huyeyusha damu hivyo hupunguza hatari ya kiharusi cha moyo.

• Mabadiliko ya mtindo wa maisha: Kula lishe bora, kufanya mazoezi, na kupunguza msongo, pamoja na kuacha sigara, inaweza kupunguza hatari ya matatizo ya moyo.

Wakati wa kumwona daktari

Ikiwa kifua kinabanwa kwa ghafla na unapata maumivu makali, hasa ikiwa una historia ya matatizo ya moyo, ni muhimu kutafuta huduma ya dharura mara moja.

Ugonjwa wa kucheua tindikali

Hali hii hutokea wakati asidi ya tumbo inarudi kwenye umio (esofagasi) mrija wa kupitisha chakula kwenda tumboni. Hali hii husababisha maumivu ya kifua yanayofanana na maumivu ya moyo.

Dalili

• Maumivu au kubana kwa kifua

• Kucheua tindikali au kuhisi ladha ya uchungu mdomoni

• Kikohozi kisichokwisha, hasa usiku

• Kizunguzungu

• Homa au kutapika

• Maumivu ya tumbo au uvimbe

Nini kinaweza kusaidia?

• Dawa za kuzuia uzalishaji tindikali: Dawa hizi zitapunguza kiasi cha tindikali tumboni na kudhibiti dalili zinazoambatana.

• Kubadili mtindo wa maisha: Kula milo midogo midogo, kuepuka vyakula vinavyosababisha kucheua na kuepuka kulala mara moja baada ya kula.

Wakati wa kumwona daktari

Ikiwa dalili hizi zinaendelea na zinakufanya uwe na ugumu wa kufanya shughuli zako za kila siku, daktari anaweza kupendekeza matibabu ya asidi au uchunguzi zaidi.

Pumu ya moyo

Hii ni hali inayohusisha mapigo ya moyo kwenda mbio na kupungua kwa upumuaji. Inaweza kutokea kwa watu wanaougua magonjwa ya moyo, hasa matatizo ya moyo kama vile kufeli kwa moyo.

Dalili

• Kifua kinabana na ugumu wa kupumua

• Wakati mwingine, kikohozi kinachozalisha kamasi

• Hali ya kutokuwa na hewa

• Uchovu au maumivu ya kifua

• Uvimbe kwenye miguu na tumbo

Nini kinaweza kusaidia?

• Dawa za kukojoa: Dawa hizi husaidia kupunguza maji mwilini na kupunguza mzigo kwenye moyo kupitia kukojoa.

• Beta-bloka: Dawa hizi husaidia kupunguza moyo kwenda haraka na kupunguza maumivu ya kifua.

• Kubadili mtindo wa maisha: Huhusisha kula vizuri, kufanya mazoezi, na kupunguza uzito.

Wakati wa kumwona daktari

Hali hii inahitaji huduma ya haraka kutoka kwa mtaalamu wa afya ili kuchunguza hali ya moyo na kuhakikisha kuwa hali haijiendelei kuwa mbaya zaidi.

Vichocheo vingine vya mzio

Vichocheo vya mzio kama vumbi, vimelea vya hewa, au vinywaji vinavyosababisha usumbufu kwenye njia za hewa vinaweza kusababisha kifua kubana.

Dalili

• Kifua kubana

• Kikohozi

• Kupumua kwa shida

• Homa kiasi

• Uchovu

Nini kinaweza kusaidia?

• Dawa za Kuzuia mzio: Dawa za hizi hupunguza athari za mzio.

• Dawa za kupuliza za kufungua pua: Dawa hizi husaidia kufungua njia za hewa.

• Vichocheo vya mzio: Kuepuka vichocheo vya mzio kama poleni, vumbi, au moshi husaidia kudhibiti dalili.

  
  

Wakati wa kumwona daktari

Ikiwa dalili hizi zinakufanya uwe na ugumu wa kupumua au zinaathiri maisha yako ya kila siku, daktari anaweza kupendekeza dawa za mzio au kuangalia sababu za msukumo kwenye njia za hewa.

Hitimisho

Ikiwa unapata maumivu ya kifua, ugumu wa kupumua, au dalili zozote zinazohusiana, ni muhimu kumwona daktari haraka. Daktari anaweza kupendekeza uchunguzi zaidi kama Picha mionzi ya kifua, ECG, au uchunguzi mwingine ili kubaini chanzo cha tatizo na kupendekeza matibabu bora. Wakati mwingine, tatizo linaweza kuwa la dharura, hivyo ni muhimu kutafuta msaada wa matibabu haraka, hasa kama dalili ni kali au hazitibiki kwa dawa za kawaida.

Maswali yaliyoulizwa mara kwa mara