Kunywa maji na gono

Swali la Mteja:

Je, kunywa maji mengi hupunguza au kutibu gono?

Majibu ya Kitaalamu

Gono ni ugonjwa wa zinaa unaosababishwa na bakteria aitwaye Neisseria gonorrhoeae. Maambukizi haya huenea kwa njia ya kujamiiana bila kutumia kinga na huathiri maeneo mbalimbali kama njia ya mkojo kwa wanaume na wanawake, shingo ya kizazi, njia ya haja kubwa, koo au hata macho.

Kwa upande wa wanaume, bakteria hao huingia kupitia kwenye mrija wa mkojo (urethra), hujizalia na kusababisha maambukizi kwa kushambulia kuta za ndani za mrija huo. Dalili zake hujumuisha uchafu kutoka uume, maumivu wakati wa kukojoa, na kuwashwa sehemu za siri.

Je, maji mengi yanasaidia kutibu?

Kunywa maji mengi kunaweza kusaidia kusafisha njia ya mkojo na kusaidia kutoa baadhi ya vimelea ambavyo bado hawajajishikiza kwenye kuta za njia ya mkojo. Hata hivyo, maji hayawezi kuua au kuondoa kabisa bakteria wa gono waliokwishaingia ndani ya seli au kuta za mrija wa mkojo.

Matibabu sahihi ya gono ni kutumia dawa maalum za antibiotic kwa ushauri wa daktari. Hizi ni dawa zenye uwezo wa kuua Neisseria gonorrhoeae kwa kiwango kinachotakiwa na katika muda maalum.

Hitimisho

Kunywa maji mengi kunaweza kusaidia kupunguza usumbufu wa dalili kwa muda mfupi, lakini hakuwezi kutibu gono. Ugonjwa huu unahitaji matibabu ya kitaalamu kwa kutumia dawa za antibiotic. Usichelewe kutafuta huduma ya afya pindi unapotilia shaka kuwa na maambukizi.

Soma zaidi kuhusu gono na madhara yake kwenye sehemu nyingine ya tovuti hii.

Rejea za mada hii

World Health Organization. Sexually transmitted infections (STIs) [Internet]. WHO; 2022 [cited 2025 Jun 17]. Available from: https://www.who.int/news-room/fact-sheets/detail/sexually-transmitted-infections-(stis)
Centers for Disease Control and Prevention (CDC). Gonorrhea – CDC Fact Sheet (Detailed) [Internet]. CDC; 2022 [cited 2025 Jun 17]. Available from: https://www.cdc.gov/std/gonorrhea/stdfact-gonorrhea-detailed.htm
Workowski KA, Bachmann LH, Chan PA, Johnston CM, Muzny CA, Park I, et al. Sexually Transmitted Infections Treatment Guidelines, 2021. MMWR Recomm Rep. 2021;70(4):1–187.
Unemo M, Bradshaw CS, Hocking JS, de Vries HJC, Francis SC, Mabey D, et al. Sexually transmitted infections: challenges ahead. Lancet Infect Dis. 2017;17(8):e235–79.
Marrazzo JM, Manhart LE. Gonorrhea and Chlamydia Infections in Women. Clin Obstet Gynecol. 2011;54(4):676–91.

ULY CLINIC inakushauri uwasiliane na daktari wako kwa ushauri na tiba kabla ya kuchukua hatua yoyote ile baada ya kusoma majibu haya.

Kupata ushauri zaidi au tiba kutoka kwa daktari wa ULY CLINIC bofya hapa au tumia linki ya Pata tiba