Hisia ya kitu kimekwama kooni bila uwepo wa kitu halisi kukwama

Hisia ya kuwa na kitu kimekwama kooni bila kuwepo kwa chakula au kitu halisi kinachozuia njia ya chakula huitwa kwa kiingereza globus sensation. Mtu anaweza kuhisi kama kuna donge, mkandamizo au kitu kimekaa kooni, lakini anapochunguzwa hakuna kitu kinachoziba koo au umio.

Hali hii mara nyingi huhusishwa na ugonjwa wa kucheua tindikali (GERD), msongo wa mawazo, mvutano wa misuli ya koo au matatizo ya mwendo wa koo na umio. Tofauti na disfagia, mtu mwenye globus sensation mara nyingi anaweza kumeza chakula na vinywaji kawaida.

Uchunguzi hufanyika kwa kuangalia historia ya dalili na uchunguzi wa koo au umio ikiwa kuna dalili za hatari kama kupungua uzito, damu kwenye mate, maumivu makali au ugumu halisi wa kumeza. Matibabu hutegemea chanzo, na yanaweza kujumuisha kudhibiti GERD, mazoezi ya kupumzisha misuli ya koo au ushauri wa kupunguza msongo wa mawazo.