Kipimo cha kuotesha majimaji ya bronkai

Kipimo cha kuotesha majimaji ya bronkai (bronchial culture), pia huitwa kipimo cha kuotesha vimelea kutoka kwenye njia za hewa za bronki, ni kipimo cha maabara kinachotumika kutambua bakteria, fangasi au vimelea wengine wanaoweza kusababisha maambukizi kwenye njia za hewa za chini.

Sampuli ya majimaji kutoka kwenye bronki inaweza kuchukuliwa kwa kutumia utaratibu unaoitwa bronkoskopi, ambapo mrija maalumu wenye kamera huingizwa kupitia pua au mdomo hadi kwenye njia za hewa. Daktari anaweza kuchukua majimaji kutoka kwenye eneo linaloshukiwa kuwa na maambukizi kwa kutumia njia kama kuosha bkronkai au kufyonza ute wa kwenye bronkai na alviola. Sampuli hiyo hupelekwa maabara kwa ajili ya kuotesha na kutambua kimelea kinachosababisha maambukizi. Ikiwa bakteria wanapatikana, kipimo cha usikivu wa bakteria kwenye dawa kinaweza kufanywa ili kusaidia kuchagua antibayotiki inayofaa.

Kipimo hiki hufanyika hasa pale ambapo kuna mashaka ya maambukizi makali ya njia za hewa za chini, maambukizi yanayojirudia, maambukizi ambayo hayajibu vizuri matibabu ya awali au wakati daktari anahitaji kutambua kimelea maalumu. Kinaweza kuwa muhimu pia kwa wagonjwa wenye kinga dhaifu au wagonjwa ambao hawawezi kutoa sampuli nzuri ya makohozi. Kwa baadhi ya wagonjwa, sampuli ya BAL inaweza kutumika kutafuta bakteria, fangasi au Mycobacterium tuberculosis kulingana na ugonjwa unaoshukiwa.

Sampuli inaweza pia kufanyiwa vipimo vingine kulingana na sababu inayoshukiwa, kama vile uchunguzi wa seli, Gram stain, kipimo cha kutafuta kifua kikuu, vipimo vya molekyuli kama PCR na vipimo maalumu vya kutafuta fangasi au virusi.

Kumbuka: Majibu ya kipimo cha kuotesha majimaji ya bronkai yanaweza kuathiriwa na matumizi ya antibayotiki kabla ya sampuli kuchukuliwa, aina na ubora wa sampuli, pamoja na uchafuzi kutoka kwenye njia ya juu ya hewa wakati wa kuchukua sampuli. Kwa hiyo, majibu yanapaswa kutafsiriwa pamoja na dalili za mgonjwa, uchunguzi wa kitabibu, picha ya kifua na vipimo vingine vya maabara. Sampuli iliyochukuliwa moja kwa moja kutoka kwenye njia za hewa za chini kwa utaratibu unaofaa inaweza kutoa taarifa muhimu zaidi kuliko sampuli iliyochanganyika na majimaji kutoka kwenye mdomo au koo.