Msamba (periniamu)

Msamba (periniamu) ni eneo la mwili lililopo kati ya sehemu za siri na njia ya haja kubwa. Kwa mwanamke, msamba huanzia kwenye sehemu ya chini ya mlango wa uke na kuendelea hadi kwenye njia ya haja kubwa. Kwa mwanaume, eneo hili hupatikana kati ya mfuko wa korodani na njia ya haja kubwa.

Msamba una ngozi, tishu laini, misuli, mishipa ya damu na nyuzi za neva. Misuli ya eneo hili husaidia kuunga mkono baadhi ya viungo vilivyopo kwenye nyonga na pia huchangia katika udhibiti wa mkojo na haja kubwa.

Kwa mwanamke, msamba hutanuka wakati wa kujifungua mtoto kupitia njia ya uke. Wakati mwingine unaweza kuchanika wakati wa kujifungua, au unaweza kukatwa kwa utaratibu maalumu wa kitabibu unaoitwa episiotomia(kuchana msamba) ili kusaidia mtoto kutoka katika mazingira fulani.

Matatizo ya msamba yanaweza kujumuisha maumivu, michubuko, kuchanika, maambukizi, uvimbe au maumivu baada ya kujifungua. Majeraha makubwa ya msamba yanaweza pia kuathiri misuli inayosaidia kudhibiti haja kubwa.

Kumbuka: Msamba si uke wala kinena. Msamba ni eneo lililo kati ya sehemu za siri na njia ya haja kubwa, wakati kinena kiko mbele ya sehemu za siri.