Ni moja ya ugonjwa wa zinaa unaotokea sana na unasababishwa na maambukizi ya kirusi Herpes (HSV) hasa aina ya pili yaani HSV2. Ugonjwa huu huenezwa awali kwa njia ya kujamiiana.

Baada ya maambukizi kirusi hujificha mwilini na kutoleta dalili za ugonjwa kwa muda mrefu. Baadhi ya nyakati virusi hawa huamka na kuleta dalili kisha kujificha, hali hii huendelea kwa muda mrefu.

Dalili za maambukizi ya kirusi Herpes wa sehemu za siri

Baadhi ya watu wanaweza wasionyeshe dalili yoyote ile, na endapo mtu ataonyesha dalili huweza kuwa kati ya zifuatazo;

• Maumivu sehemu za siri

• Muwasho sehemu za siri au hisia za kuungua na kuchomachoma

• Malengelenge sehemu za siri yanayoweza kutokea sehemu yoyote ya uume au uke

• Vidonda sehemu za siri baada ya kupasuka kwa lenge

• Makovu sehemu za siri

• Magamba shemu za siri

• Maumivu ya mgongo makalio na miguu kama ugonjwa umejirudia

Dalili zingine zinazoweza kuambatana ni

• Homa

• Maumivu ya mwili

• Kuvimba kwa mitoki

Uenezaji

Ugonjwa wa herpes sehemu za siri huenezwa awali kwa kufanya ngono, na mtu mwenye maambukizi hata kama haonyeshi dalili yoyote. Ngono inaweza kuwa ya ume kwa uke, ume kwa njia ya haja kubwa, ume kwa mdomo au mdomo kwa uke.

Maambukizi hutokea endapo mgusano utatokea kati ya majimaji ya vidonda au malengelenge ya sehemu za siri, ngozi ya sehemu za siri au njia ya haja kubwa hata kama haionyeshi kuwa na vidonda.

Maambukizi yanaweza kuhamishwa kutoka sehemu moja kwenda nyingine endapo utashika kidonda au sehemu iliyoathiriwa na kirusi kisha kujishika kwenye maeneo mengine ya;

• Macho

• Njia ya haja kubwa

• Midomo

• Tundu la mkojo

• Ngozi ya korodani

• Shina la uume

• Mashavu ya uke

Njia zingine

Njia nyingine ya uenezaji wa ugonjwa huu ni kutoka kwa mama kwenda kwa mtoto wakati wa kujifungua

Madhara ya ugonjwa wa herpes sehemu za siri

Hatari yakupata UKIMWI.

Ugonjwa huu huongeza hatari ya kupata UKIMWI mara tatu zaidi na magonjwa menfine ya zinaa. Mgonjwa mwenye maambukizi ya pamoja ya UKIMWI pamoja na Herpes sehemu za siri, hueneza kwa kasi magonjwa hayo kwa wengine.

Kupata maambukizi makali

Kwa mtu mwenye kinga ya mwili ya chini ikiwa pamoja na mtu aliye kwenye hatua za mwisho za UKIMWI, hupata maambukizi makali ya ugonjwa huu yanayoweza kusambaa kwenye uti wa mgongo pamoja na ubongo hivyo kuleta homa ya uti wa mgongo, na homa a ubongo.

Magonjwa ya mfumo wa neva na vifo

Kwa watoto ambao wamezaliwa na herpes, hupata madhara ya muda mrefu kwenye mfumo wa fahamu na baadhi yao hufariki katika kipindi cha uchanga.

Magonjwa ya mfumo wa mkojo

Kuziba kwa njia ya mkojo kutokana na kuota kidonda kwenye mrija wa mkojo

Matatizo kwenye nji ya haja kubwa

Michomo kwenye njia ya haja kubwa haswa kwa wanaume wanaoshiriki ngono ya jinsia moja( au kwa wale waliohamisha maambukizi kwa kujishika kwenye njia ya haja kubwa)

Matibabu

Mpaka sasa hakuna tiba ya kutokomeza ugonjwa huu mara baada ya kupata maambukizi hata kama hujapata dalili baada ya kuambukizwa. Zipo tiba za kupunguza dalili tu na makali ya ugonjwa kwa kutumia dawa za kudhibiti uzalianaji wa kirusi ambazo utaandikiwa na daktari wako. Matumizi ya dawa hizo huweza kuzuia kueneza maambukizi kwa wengine.

Kinga

Njia zifuatazo zinaweza kutumika kama kinga;

• Kutumia kondomu kama njia ya kuzuia kupata na kueneza maambukizi kwa wengine kila mara unaposhiriki ngono

• Endapo una dalili za ugonjwa huu unashauriwa kutoshiriki ngono mpaka pale utakapopona

• Kuepuka kushiriki ngono na mpenzi ambaye ana maambukizi au vidonda sehemu za siri