Gono huonekana baada ya muda gani?

Gono au gonorea ni ugonjwa wa zinaa unaoambukizwa, husababishwa na bakteria mwenye jina la Neisseria gonorrhea. Gono huathiri ngozi laini kwenye njia ya uzazi ikiwa pamoja na shingo ya uzazi, kizazi, mirija ya falopio kwa wanawake na mrija urethra kwa wanaume na wanawake.

Kimelea wa gono pia huweza athiri kinywa, koo, macho na puru (kifuko cha kutunzia kinyesi kwa muda kilico karibu na njia ya haja kubwa).

Gono huonekana muda gani tangu kuambukizwa?

Wanawake wengi na baadhi ya wanaume wanapopata gono huwa hawaonyeshi dalili yoyote ile, endapo dalili zitaonekana huonekana siku 2 hadi 21 tangu siku ya kushiriki ngono.

Dalili za gono

Dalili na viashiria vya gono kwa wanawake ni pamoja na;

• Kutokwa na ute mzito wa kahawia au njano ukeni

• Hisia za kuungua au maumivu wakati w akukojoa au kujisaidia haja kubwa

• Kupata hedhi isiyo kawaida

• Kutokwa damu katikati ya vipindi vya hedhi

• Mijongeo ya misuli na maumivu ya tumbo la chini ya kitovu

Dalili za gono kwa wanaume

Kutokwa na uchafu wa njano au kijani kwenye kilele cha uume

• Maumivu au hisia za kuungua wakati wa kukojoa au kujisaidia haja kubwa

• Kukojoa mara kwa mara

• Kuvimba korodani au maumivu ya korodani

Utambuzi

Utambuzi wa gono kwa wanaume na wanawake ni kwa kupitia kipimo cha sampuli ya mkojo. Kipimo cha ute pia kinaweza kufanyika kwa wanawake na wanaume kwa kutoa ute ukeni au kwenye uume au kwenye puru.