Mwandishi:

ULY CLINIC

Mhariri:

Dkt. Benjamin L, MD

Jumatano, 14 Mei 2025

Kutokwa damu baada ya kutoa mimba kwa dawa

Tafiti zinaonyesha kuwa wanawake wengi hutokwa damu kwa wastani wa siku 14 tangu kutumia dawa ya kutoa mimba. Hata hivyo idadi ya siku ambazo matone madogo ya damu hutoka huweza kwenda hadi siku 10 zaidi.

Ni kawaida mwanamke kutokwa damu baada ya kutumia dawa kwani damu ni ishara kwamba ujauzito unatoka nje ya mwili. Hata hivyo, muda na kiasi cha damu hutofautiana kulingana na umri wa mimba, aina ya dawa, na mwitikio wa mwili wa kila mtu.

Mabonge ya damu

Katika Makala hii, neno damu nyingi, damu kidogo na mabonge ya damu yametumika kuelezea wingi wa damu kwa kufananisha na matunda:

Bonge dogo ukubwa wa zabibu ni sawa na damu kidogo
Bonge dogo ukubwa wa ndimu ni sawa na damu kiasi
Bonge la ukubwa wa chungwa ni sawa na damu nyingi sana

Aina ya dawa zinazotumika

Dawa	Kazi Kuu	Maelezo ya Matumizi
Mifepristone	Huzuia homoni ya projesterone, hivyo mfuko wa mimba unashindwa kuendeleza ujauzito.	Humezwa kwanza chini ya uangalizi wa mtaalamu.
Misoprostol	Husababisha misuli ya mfuko wa mimba kusinyaa na kutoa kondo la mimba nje.	Hutumika masaa 24–48 baada ya mifepristone (kwa kawaida kwa njia ya mdomo, chini ya ulimi, au kwenye uke).

Wakati mwingine, misoprostol pekee hutumika pale ambapo mifepristone haipatikani, lakini njia hii inaweza kusababisha kutokwa damu kwa muda mrefu zaidi na ufanisi mdogo kidogo.

Uhusiano kati ya umri wa mimba, muda, kiasi na sifa za damu

Umri wa Mimba	Muda wa kutokwa Damu	Kiasi cha Damu Kinachotarajiwa	Sifa za Damu	Maelezo Muhimu
Wiki 1–6	Siku 2–5	Kiasi cha wastani, sawa na hedhi nzito	Damu nyekundu au kahawia nyepesi, vipande vidogo vya damu vinaweza kuonekana	Kwa umri huu wa mimba, damu hupungua haraka; mara nyingi maumivu ni madogo.
Wiki 7–8	Siku 5–10	Kiasi kikubwa siku 1–3, hupungua baadaye	Damu nyekundu, wakati mwingine na chembe za tishu laini za ujauzito	Maumivu ya tumbo hujitokeza zaidi; ni kawaida kuona vipande vya damu.
Wiki 9–10	Siku 7–14	Kiasi kikubwa mwanzoni, hupungua taratibu	Damu nyekundu au inayoelekea nyeusi, na mabonge madogo ya damu	Kiasi cha damu kinaweza kuwa kingi kuliko hedhi ya kawaida; ufuatiliaji unashauriwa.
Wiki 11–12	Siku 10–21	Damu nyingi na ya muda mrefu zaidi	Damu inayoelekea nyeusi au nyekundu sana, yenye mabonge makubwa	Hatari ya kutokwa damu kupita kiasi au mabaki ya mimba ni kubwa zaidi; ni lazima uchunguzwe na daktari.
Zaidi ya Wiki 12	Hadi siku 21–28	Damu nyingi na inaweza kuhitaji ufuatiliaji wa karibu	Damu nzito yenye tishu nyingi na mabonge makubwa	Mara nyingi huhitaji uchunguzi wa hospitali au usaidizi wa kitabibu ili kuhakikisha mimba imetoka yote.

Muda na mabadiliko ya kutokwa damu

Masaa 4–6 baada ya kutumia misoprostol, damu huanza kutoka kwa wingi pamoja na vipande vya damu au tishu.
Damu nyingi hutoka kwa siku 1–3, kisha hupungua taratibu.
Kwa wagonjwa wengi, doa dogo au damu kidogo huendelea hadi wiki 2.
Ikiwa damu inaendelea zaidi ya wiki 3–4, au inaongezeka badala ya kupungua, ni ishara ya tatizo.

Mwongozo wa kutathmini kiasi cha damu kwa kutumia idadi ya pedi

Kiasi cha damu	Idadi ya pedi kubwa zinazoloweshwa	Muda wa kutokea (kwa saa)	Maelezo ya mwonekano wa damu	Tafsiri ya kitabibu	Hatua ya kuchukua
Kidogo	Pedi 1–2 kwa siku	Kila baada ya masaa 6–8	Damu nyekundu au kahawia nyepesi, doa dogo linaweza kuendelea	Kawaida siku za mwanzo au mwisho wa kutoa mimba	Endelea kufuatilia; ni hali ya kawaida
Wastani	Pedi 3–4 kwa siku	Kila baada ya masaa 3–4	Damu nyekundu, wakati mwingine na vipande vidogo vya damu	Kawaida katika siku 1–3 za kwanza baada ya kutumia dawa	Hali ya kawaida, lakini endelea kufuatilia
Nyingi	Pedi 1–2 kila saa kwa zaidi ya saa 2 mfululizo	Ndani ya saa 1–2	Damu nyekundu ang’avu au giza, ina mabonge makubwa	Inaonyesha damu nyingi kupita kiasi (heavy bleeding / hemorrhage)	Mwone daktari haraka au nenda hospitali
Hatari sana	Pedi 1 kamili kila dakika 30–60 kwa zaidi ya saa 2	Mara kwa mara bila kupungua	Damu nyekundu ang’avu, mabonge makubwa, kizunguzungu au udhaifu	Hatari ya upotevu mkubwa wa damu (anaemia au shock)	Nenda hospitali mara moja!

Jinsi ya Kutumia Jedwali Hili

Hesabu pedi unazotumia kila siku na uangalie kwa muda wa saa ngapi zinajaa.
Tazama rangi na mwonekano wa damu: nyekundu ang’avu = damu mpya; kahawia = damu ya zamani.
Ikiwa unalowesha pedi 1 kubwa kila saa kwa zaidi ya saa 2, au una kizunguzungu, udhaifu, au mapigo ya moyo ya haraka, hiyo ni ishara ya hatari — tafuta huduma ya dharura mara moja.
Ikiwa damu kidogo inaendelea zaidi ya wiki 3, wasiliana na daktari kwa uchunguzi wa ultrasound au kipimo cha β-hCG.

Dalili za kawaida

Maumivu ya tumbo ya kuvuta (cramps) yanayofanana na hedhi nzito.
Kutokwa damu kwa wingi siku za mwanzo kisha kupungua taratibu.
Utoaji wa vipande vya damu au tishu laini za ujauzito.
Kichefuchefu, kuharisha, au homa ya muda mfupi (chini ya 38°C).

Dalili hizi ni za kawaida na zinaonyesha mwili wako unajibu dawa ipasavyo.

Wakati gani uonane na daktari haraka?

Mwone daktari mara moja ikiwa una mojawapo ya dalili zifuatazo:

Kutokwa damu nyingi sana — mfano, unalowesha pedi moja kubwa kila dakika 30–60 kwa zaidi ya saa 2 mfululizo.
Damu inaendelea zaidi ya wiki 3 bila kupungua.
Homa zaidi ya 38°C inayodumu zaidi ya siku moja.
Maumivu makali ya tumbo yasiyopungua hata baada ya kutumia dawa za maumivu.
Harufu mbaya kutoka ukeni au ute unaofanana na usaha.
Kizunguzungu kikubwa, udhaifu mwingi, au mapigo ya moyo kwenda kasi.
Hakuna damu kabisa baada ya kutumia dawa – inaweza kumaanisha dawa hazijafanya kazi na mimba bado ipo.

Matunzo ya nyumbani

Baada ya Kutoa Mimba kwa Dawa

Tumia pedi badala ya tamponi ili kufuatilia kiasi cha damu.
Kunywa maji ya kutosha na kula vyakula vyenye chuma kama maini, nyama nyekundu, mboga za majani, na maharage.
Pumzika vya kutosha, lakini unaweza kufanya shughuli nyepesi nyumbani.
Epuka kufanya ngono hadi damu itakapokoma kabisa (kwa kawaida wiki 2).
Panga uchunguzi wa ufuatiliaji ndani ya siku 7–14 kuthibitisha kuwa mimba imetoka kabisa (kwa ultrasound au kipimo cha β-hCG).

Makala hii imejibu maswali yafuatayo

Je inachukua muda gani damu kukatika baada ya kutoa mimba kwa dawa?
Je ni kiasi gani cha damu hutoka baada ya kutoa mimba kwa dawa?
Je , damu inakatika lini baada ya kutoa mimba kwa dawa?
Je, damu inaanza kutoka lini baada ya kutumia dawa za kutoa mimba?
Je ni dalili gani ya hatari baada ya kutoa mimba kwa dawa?
Je kutokwa na mabonge ya damu ni kawaida baada ya kutoa mimba kwa dawa?

Hitimisho

Kutokwa damu baada ya kutoa mimba kwa dawa ni jambo la kawaida na ni sehemu ya mchakato wa kutoa ujauzito nje ya mwili. Hata hivyo, ni muhimu kutambua tofauti kati ya dalili za kawaida na zile za hatari. Ufuatiliaji wa kitabibu unahakikisha kuwa mimba imetoka yote, hakuna mabaki ya tishu, na hakuna maambukizi.Kama unaona damu nyingi kupita kawaida, harufu mbaya, au maumivu makali, mwone daktari mara moja au tembelea kituo cha afya kilicho karibu nawe.

Mambo mengine unayopaswa kufahamu baada ya kutoa mimba

Baada ya kutoa mimba unaweza kupata mimba nyingine mara moja, hivyo utapaswa kutumia kinga ili kuzuia mimba nyingine. Linki ifuatayo ina video zinazoainisha siku za hatari kulingana na mzunguko wako wa hedhi. Bofya kiungo cha makala husika hapa chini ili kufahamu ni lini unaweza kushika ujauzito hivyo uchukue hatadhari.

Maswali yaliyouliziwa mara kwa mara

1: Mwanamke alikunywa dawa ya kutoa mimba, damu ikatoka nyingi sana kwa siku kadhaa, lakini baada ya wiki mbili alipima tena mimba ikawa bado inaonekana. Inawezekana kweli mimba bado ipo?

Jibu: Ndiyo, inawezekana mimba bado ipo.

Kutokwa na damu nyingi baada ya kutumia dawa za kutoa mimba siyo ushahidi wa moja kwa moja kwamba mimba imetoka yote. Damu inaweza kutoka kwa sababu ya athari za dawa au kutokana na utolewaji wa sehemu ya ujauzito (incomplete abortion). Ikiwa mimba haijatoka yote, mabaki ya ujauzito huweza kubaki ndani ya mfuko wa uzazi, hali inayoweza kuendelea kusababisha damu kuvuja au kipimo cha mimba kuendelea kuonyesha majibu chanya kwa muda.

Kwa kawaida, homoni ya mimba (hCG) huendelea kuwepo mwilini hata baada ya kutoa mimba kwa siku 7 hadi 28. Ndiyo maana kipimo cha mimba kinaweza kuonyesha mimba hata kama mimba imetoka. Lakini kama kipimo kinaendelea kuonyesha mimba wiki mbili hadi tatu baada ya kutoa mimba, ni lazima kufanyiwa uchunguzi wa ultrasound ili kuthibitisha kama mimba bado ipo au kama kuna mabaki ndani ya mfuko wa uzazi yanayohitaji kusafishwa kitaalamu.

2. Je, antibiotics zinaweza kuathiri kipimo cha mimba?

Hapana, dawa za antibayotic hazibadilishi matokeo ya kipimo cha mimba. Kwa hiyo, matokeo chanya yanaonyesha uwepo wa homoni ya mimba, si matokeo ya dawa. Ni muhimu mwanamke amwone daktari haraka ili kupata vipimo sahihi na kuzuia madhara kama maambukizi au kutokwa damu isiyoisha.

3. Nilitoa mimba na damu zilivuja kwa siku 6 kisha zikaacha. Baada ya siku 11, damu zilianza kutoka tena. Nilipima kipimo cha ujauzito cha mkojo na kikawa positive. Baada ya hapo nilikaa bila damu hadi tarehe 5 mwezi huu ambapo nilipata hedhi yenye damu nyingi na mabonge. Damu imeisha jana, lakini leo asubuhi nimepima tena mkojo na bado kipimo kinaonyesha positive. Je, kwa nini kipimo bado kinaonyesha ujauzito ilhali sina dalili zozote za mimba inayoendelea?

Sababu zinazowezekana kwa kipimo kuendelea kuonyesha positive baada ya kutoa mimba

Homoni ya ujauzito (hCG) bado ipo mwilini
- Vipimo vya mimba vya mkojo hupima kiwango cha hCG.
- Baada ya kutoa mimba, homoni hii hupungua taratibu, na inaweza kuchukua wiki 4–8 kufikia kiwango cha “negative”, hasa kama mimba ilikuwa imeendelea zaidi.
- Hii inaweza kueleza kwa nini bado unasoma positive hata kama huna mimba inayoendelea.
Mimba iliyobaki sehemu (Masalia ya tishu za ujauzito kwenye kizazi)
- Ikiwa baadhi ya tishu za mimba zimebaki kwenye mfuko wa uzazi, mwili unaweza kuendelea kutengeneza hCG.
- Dalili zake zinaweza kujumuisha kutokwa damu nyingi, mabonge, au maumivu ya tumbo.
- Hii inahitaji uchunguzi wa daktari na mara nyingi hufanyiwa ultrasound.
Ujauzito mpya
- Ikiwa ulifanya tendo la ndoa bila kinga baada ya kutoa mimba, inawezekana kupata ujauzito mpya.
- Kipimo cha mkojo hakiwezi kutofautisha kama hCG ni ya mimba ya zamani au mpya.

Hatua unazopaswa kuchukua sasa

Fanya kipimo cha damu cha hCG (cha kuhesabu wingi): Kipimo hiki kitaonyesha kiwango kamili cha hCG na kama kinapungua au kuongezeka.
Fanya ultrasound ya nyonga: Itaonyesha kama kuna tishu za mimba zimebaki au kama kuna ujauzito mpya.
Muone daktari mapema: Kutokwa damu nyingi na mabonge baada ya kutoa mimba ni dalili zinazohitaji uchunguzi wa haraka.

Kumbuka: Hata kama huna dalili za mimba, bado unaweza kuwa na hCG kutokana na sababu mbili kuu — mabaki ya mimba au ujauzito mpya. Uchunguzi wa kitaalamu ndio utakaoeleza chanzo halisi.

4. Je, vipimo vyote vya mimba vina uwezo sawa wa kugundua hCG baada ya kutoa mimba?

Hapana. Baadhi ya vipimo ni nyeti zaidi kuliko vingine na vinaweza kugundua viwango vidogo vya hCG kwa muda mrefu zaidi. Vipimo vya nyumbani vya "digital" au vile vyenye kiwango cha unyeti wa chini (low detection limit) vinaweza kuonyesha positive hata kama hCG imebaki kidogo sana, huku vipimo vya kawaida vikishindwa kugundua.

5. Kwa nini kipimo cha damu kinaweza kuonyesha matokeo tofauti na cha mkojo baada ya kutoa mimba?

Kipimo cha damu (quantitative hCG) hupima kiwango halisi cha homoni na kinaweza kugundua hCG mapema au kwa viwango vidogo sana. Kipimo cha mkojo (qualitative) kinatoa tu majibu ya “positive” au “negative” na hakionyeshi kiwango cha hCG. Hivyo, kipimo cha damu kinaweza kuonyesha mabadiliko ya hCG kwa usahihi zaidi.

6. Je, homoni ya hCG hupungua kwa kiwango kipi kila wiki baada ya kutoa mimba?

Kwa kawaida, hCG hupungua kwa nusu (nusu maisha) kila siku 1–2 baada ya kutoa mimba. Hata hivyo, kasi ya kushuka hutegemea umri wa mimba, hali ya afya ya mama, na kama mabaki ya mimba yameondolewa yote. Mimba iliyoendelea zaidi kabla ya kutolewa huchukua muda mrefu zaidi kwa hCG kushuka.

7. Ni dalili gani za hatari baada ya kutoa mimba zinazoashiria kuhitaji matibabu ya haraka?

Dalili za hatari ni pamoja na kutokwa damu nyingi sana (kubadilisha pedi kila chini ya saa 1), homa, harufu mbaya ya damu, maumivu makali ya tumbo, au kizunguzungu kikali. Hizi zinaweza kuashiria maambukizi au mabaki ya mimba.

8. Je, kutokwa na mabonge ya damu baada ya kutoa mimba ni kawaida?

Ni kawaida kuona mabonge madogo kwa siku chache baada ya kutoa mimba. Lakini mabonge makubwa au kutokea kwa muda mrefu (wiki kadhaa) kunaweza kuashiria kuwa kuna mabaki ya mimba au damu imesinyaa kwenye mfuko wa uzazi na sasa inatoka.

9. Je, ninaweza kuendelea kuwa na hedhi ya kawaida baada ya kutoa mimba?

Baada ya kutoa mimba, mzunguko wa hedhi unaweza kurejea ndani ya wiki 4–6, lakini kwa baadhi ya wanawake unaweza kuchelewa hadi miezi 2. Hedhi ya kwanza inaweza kuwa nzito kuliko kawaida kwa sababu ya mabadiliko ya homoni na kurudi kwa kazi ya kawaida ya ovari.

10. Kwa nini daktari anaweza kupendekeza ultrasound hata kama kipimo cha mimba kinasoma positive?

Ultrasound hutumika kuangalia kama kuna tishu zilizobaki kwenye mfuko wa uzazi au kama kuna ujauzito mpya. Kipimo cha hCG peke yake hakiwezi kutofautisha kati ya hali hizi mbili.

11. Je, mimba ya nje ya mfuko wa uzazi (ectopic pregnancy) inaweza kusababisha kipimo kubaki positive baada ya kutoa mimba?

Ndiyo, ingawa ni nadra. Ikiwa mwanamke alikuwa na mimba mbili (moja ya kawaida na nyingine ya nje ya mfuko wa uzazi) na moja tu imetolewa, hCG inaweza kuendelea kuzalishwa na ile mimba ya nje. Hii ni hali ya dharura ya kitabibu.

12. Je, ninaweza kuanza kutumia njia za uzazi wa mpango mara moja baada ya kutoa mimba?

Ndiyo, unaweza kuanza mara moja isipokuwa kuna sababu ya kitabibu ya kuchelewa (kama maambukizi makali). Hii husaidia kuzuia ujauzito usiopangwa haraka, kwani uwezo wa kupata mimba unaweza kurudi ndani ya wiki chache.

13. Je, mazoezi au kazi nzito baada ya kutoa mimba yanaweza kuchelewesha kushuka kwa hCG au kusababisha damu kurudi?

Mazoezi mazito mapema sana baada ya kutoa mimba yanaweza kuongeza kutokwa damu kwa muda, lakini hayaathiri moja kwa moja kiwango cha hCG. Hata hivyo, kupumzika kwa siku chache za mwanzo hupendekezwa ili kusaidia mfuko wa uzazi kurudi kwenye hali yake ya kawaida haraka.

14. Daktari, nilikuwa na ujauzito wa wiki 6 na nimetumia vidonge 4 vya Misoprostol kwa njia ya uke masaa 12 yaliyopita. Nimeona damu kidogo pamoja na mabonge, pia nina maumivu ya wastani ya tumbo na homa. Nimebadili pedi mara tatu tu ndani ya saa 12, na nina historia ya pumu. Je, hali hii ni ya kawaida na baada ya kutoa mimba damu inatakiwa kudumu kwa muda gani?

Nimekuelewa vizuri, asante kwa kujibu maswali yote kwa ufasaha. Tukipitia hali yako:

Umetumia Misoprostol 4 kwa njia ya uke wiki ya 6 ya ujauzito.
Ni masaa 12 yamepita, unaona damu kidogo na mabonge, pamoja na maumivu ya wastani.
Umepata homa, jambo linalohitaji umakini.
Kiasi cha damu bado si kingi (pedi 3 ndani ya saa 12), kwa hiyo haujapoteza damu nyingi.
Una historia ya pumu, hivyo afya yako inahitaji uangalizi wa karibu zaidi.

Maana yake

Damu na mabonge baada ya kutumia Misoprostol huashiria kuwa mchakato umeanza.
Kwa kawaida, kutokwa damu zaidi hutokea ndani ya masaa 4–24 ya kwanza, kisha hupungua.
Kwa ujauzito wa wiki 6, kutoa damu kidogo yenye mabonge baada ya Misoprostol mara nyingi huonyesha kuwa mimba inaweza kuwa imetoka tayari, kwa sababu mimba ndogo haina tishu nyingi.
Hata hivyo, bado inahitajika uchunguzi wa daktari au kipimo cha ultrasound/kipimo cha β-hCG kuthibitisha kama mfuko wa mimba umetoka wote au bado kuna mabaki.
Hata hivyo, homa baada ya kutumia dawa inaweza kuashiria maambukizi au mabaki ya mimba.

Kuhusu damu baada ya kutoa mimba

Kwa kawaida damu hudumu siku chache hadi wiki 2–3, hupungua kadri muda unavyosonga.
Lakini damu nzito sana, harufu mbaya, au homa vinahitaji uchunguzi wa daktari mara moja.

Ushauri wa haraka

Nenda hospitali sasa kwa sababu homa baada ya kutumia Misoprostol inahitaji uchunguzi wa daktari na kufanyiwa ultrosound kuthibitisha kama mimba imetoka au la:
Wakati unasubiri msaada:
- Endelea kufuatilia kiasi cha damu (kama unabadilisha pedi zaidi ya 2 kila saa kwa zaidi ya saa 2 mfululizo → nenda hospitali mara moja).
- Pima joto la mwili kama inawezekana, pima na andika kiwango chake sehemu kwa rejea
- Kunywa maji ya kutosha.
- Usitumie dawa zingine bila ushauri wa daktari, hasa kwa kuwa una pumu.

Kwa hali yako, muhimu zaidi si muda wa kubleed, bali kuchunguzwa hospitali sasa kwa sababu ya homa na historia ya pumu.

15. Nilitoa mimba ya mwezi 1 damu imetoka siku2 tu je nikawaida?

Ndiyo, inaweza kuwa kawaida damu kutoka kwa muda wa siku 2 tu baada ya kutoa mimba ya mwezi mmoja, ikiwa hakuna maumivu makali, harufu mbaya, homa, au damu nzito inayoendelea.Hata hivyo, muda wa kutokwa damu hutofautiana kati ya wanawake—wengine hutokwa siku chache tu, wengine hadi wiki moja.

Mwambie aende hospitali haraka endapo atapata dalili zifuatazo:

Maumivu makali tumboni au kiunoni
Homa au kutetemeka
Harufu mbaya ukeni
Damu nzito au inayoendelea zaidi ya wiki moja

Ikiwa hana dalili hizo, anaweza kuwa sawa, lakini ni vizuri afanyiwe uchunguzi wa daktari au ultrasound kuhakikisha hakuna mabaki ya mimba ndani ya mji wa mimba.

ULY CLINIC inakushauri siku zote uwasiliane na daktari wako kabla ya kuchukua hatua yoyote ile kiafya baada ya kusoma vidokezo hivi

Wasiliana na daktari wa ULY CLINIC kwa elimu na ushauri zaidi kupitia namba za simu au kubonyeza 'Pata Tiba' Chini ya tovuti hii.

Imeboreshwa,

7 Novemba 2025, 02:59:06

Rejea za mada hii:

Davis A, Westhoff C, De Nonno L. Bleeding patterns after early abortion with mifepristone and misoprostol or manual vacuum aspiration. J Am Med Womens Assoc (1972). 2000;55(3 Suppl):141-4. PMID: 10846324.

https://womenshealthclinic.org/what-we-do/abortion/after-an-abortion/. Imechukuliwa 25.01.2023

National Abortion Federation (2008) Early Medical Abortion; in Clinical Policy Guidelines Washington, DC; pp 7-11.

Breitbart V, Repass DC. The counseling component of medical abortion. J Am Med Womens Assoc 2000; 55(suppl 3):164-166.

Creinin MD. Randomized comparison of efficacy, acceptability and cost of medical versus surgical abortion. Contraception 2000; 62:117-24.

Henderson JT, Hwang AC, Harper CC et.al. (2005) Safety of mifepristone abortion in clinical use. Contraception 72:175-8.

Chen AY, Mottl-Santiago J, Vragovic O et.al. (2006) Bleeding after medication-induced termination of pregnancy with two dosing schedules of mifepristone and misoprostol. Contraception 73: 415-19.

Allen RH, Westhoff C, DeNonno L, Fielding SL, Schaff EA. Curettage after mifepristone-induced abortion: Frequency, timing, and indications. Obstet Gyncecol 2001;98:101-6.

Schaff EA, Fielding SL, Westhoff C, Ellertson C, Eisinger SH, Stadalius LS, Fuller L. Vaginal misoprostol administered 1, 2, or 3 days after mifepristone for early abortion. JAMA 2000;284:1948-1953.

American College of Obstetricians and Gynecologists. Early Pregnancy Loss. ACOG Practice Bulletin No. 200. Obstet Gynecol. 2018;132(5):e197–e207.

Barnhart KT, Sammel MD, Rinaudo PF, Zhou L, Hummel AC, Guo W. Symptomatic patients with an early viable intrauterine pregnancy: HCG curves redefined. Obstet Gynecol. 2004;104(1):50–5.

Cole LA. hCG, the wonder of today's science. Reprod Biol Endocrinol. 2012;10:24.

National Health Service (NHS). Pregnancy test. London: NHS; 2023 [cited 2025 Aug 10]. Available from: https://www.nhs.uk/pregnancy/trying-for-a-baby/doing-a-pregnancy-test/

Morse CB, Sammel MD, Shaunik A, Barnhart KT. Performance of human chorionic gonadotropin curves in women with symptomatic early pregnancy: a pooled analysis. Fertil Steril. 2012;98(5):1228–33.

World Health Organization. Safe abortion: technical and policy guidance for health systems. 2nd ed. Geneva: WHO; 2012.

Papp C, Toth-Pal E, Papp Z. Retained products of conception: diagnosis and management. Best Pract Res Clin Obstet Gynaecol. 2009;23(4):529–38.

Horne AW, van den Driesche S, King AE, Burgess S, Myers M, Ludlow H, et al. Endometrial natural killer cells and angiogenesis in recurrent miscarriage. Hum Reprod. 2008;23(4):805–12.

Orodha kuu