Lala muda wa kutosha, imarisha afya yako

Kulala muda wa kutosha huongeza ufanisi wa mwili na akili, pia ni kinga ya magonjwa sugu kama kisukari aina ya 2, magonjwa ya moyo, uzito mkubwa kupita kiasi na sonona. Jali afya yako, lala masaa yanayoshauriwa kiafya kulingana na umri wako.

Faida za kulala muda wa kutosha

Kuna faida nyingi za kulala muda wa kutosha unaoshauriwa kulingana na umri wako. Tafiti nyingi zinaonyesha kwamba kulala muda wa kutosha wakati wa usiku;

• Huamsha chembe za ulinzi wa mwili na 'antibodies' zinazopambana na maradhi mbalimbali ndani ya mwili wako

• Huamsha kemikali mbalimbali za ulinzi mwilini zenye jina la 'cytokine' ambazo huzuia uvimbe unaosababishwa na kuamka kwa kinga za mwili pia huimarisha usingizi na kupambana na maradhi

• Hupunguza kiwango cha homoni ya 'cortisol' inayochangia kwa kiasi kukubwa ongezeko la uzito mkubwa kupita kiasi na msongo.

• Hupunguza upinzani wa mwili dhidi ya homoni inayorekebisha kiwango cha sukari kwenye damu yenye jina la 'insulin'

• Huamsha homoni ya ukuaji yenye jina la 'growth hormone' inayosaidia kuponya majeraha na kurejesha seli mbalimbali zilizokufa

• Hutuliza mfumo wa neva wa 'sympathetic' ili kushusha shinikizo la damu wakati umelala

• Hufanya ubongo uweze kuchakata taarifa mbalimbali ulizozipokea muda mfupi kabla ya kulala na hivyo kukusababisha uwe na kumbukumbu nzuri

Endapo utalala muda wa kutosha wakati wa usiku, utaweza kujikinga na:

• Magonjwa ya moyo kama shinikizo la juu la damu, kiharusi, magonjwa ya mishipa ya moyo na mapigo ya moyo kwenda isivyo kawaida

• Uzito mkubwa kupita kaisi (ugonjwa wa obeziti)

• Sonona

• Kisukari aina ya 2

Ni masaa mangapi unatakiwa kulala kwa siku?

Kwa watu wazima wanatakiwa kulala angalau masaa 7 hadi 8 mfululizo wakati wa usiku

Vijana wa miaka 13 hadi 19 wanatakiwa kulala angalau masaa 9 hadi 10 mfululizo wakati wa usiku

Watoto wadogo chini ya miaka 13 wanatakiwa kulala masaa 10 au zaidi wakati wa usiku.

Kumbuka

Kulala zaidi ya muda unaoshauriwa huweza kuambatana na tatizo la kukosa usingizi, kupata usingizi usio bora na kushindwa kuanza au kuendelea kulala.