Vipimo vya maabara
Katika kurasa hii utafahamu kuhusu vipimo mbalimbali, namna vinavyofanyika, kwanini vinafanyika na majibu pia yanasomwa vipi. Ukurasa huu ni maalumu kwa ajili ya wagonjwa tu.
Ubora wa mbegu za kiume hupimwaje?
Hupimwa kwa uchunguzi wa shahawa maabara unaongalia kiasi (≥1.4 mL), mkusanyiko (≥milioni 16/mL), jumla ya mbegu (≥milioni 39), mwendo wa jumla (≥42%), mwendo wa kuelekea mbele (≥30%), uhai (≥54%) na maumbo ya kawaida (≥4%) kwa mujibu wa WHO 2021. Matokeo haya husaidia kutambua matatizo yanayoweza kuathiri uwezo wa uzazi wa mwanaume, lakini matokeo yaliyo chini ya viwango hivi hayathibitishi utasa, wala yaliyo ndani ya viwango hivyo hayahakikishi kupata ujauzito
Je, ni lazima uwe umefunga kabla ya vipimo vya damu?
Si kila kipimo cha damu kinahitaji kufunga. Vipimo vya sukari ya kufunga na uvumilivu wa mwili kwenye sukari (OGTT) huhitaji mfungo, lakini kipimo cha picha kamili ya damu na HbA1c kwa kawaida havihitaji kufunga. Fuata maelekezo ya daktari au maabara, kunywa maji ya kawaida pale yanaporuhusiwa na usiache dawa wala kufunga kwa muda mrefu bila ushauri wa mtaalamu wa afya.
Kipimo cha mkojo kikionyesha protini maana yake nini?
Protini kwenye mkojo si lazima imaanishe figo zimeharibika, kwani inaweza kutokea kwa muda kutokana na homa, mazoezi makali au upungufu wa maji mwilini. Hata hivyo, protini inayoendelea kuonekana kwenye mkojo inaweza kuwa ishara ya tatizo la figo, hivyo ni muhimu kufuatilia na kuchunguza chanzo chake.
Kipimo cha Endoskopi
Ni kipimo salama na muhimu kinachosaidia kuona moja kwa moja ndani ya umio, tumbo na duodenamu ili kubaini chanzo cha dalili kama maumivu ya chembe ya moyo, kiungulia, vidonda vya tumbo na kutokwa damu kwenye mfumo wa juu wa chakula. Ingawa kinaweza kuwa na madhara machache, kufanyika kwa tathmini sahihi na wataalamu husaidia kugundua magonjwa mapema na kupata matibabu yanayofaa.