Kumfanya mtoto abeue baada ya kunyonya

Baada ya mtoto kunyonya maziwa ya mama au maziwa ya kopo, mara nyingi hewa pia huingia tumboni wakati wa kunyonya. Hewa hii ikibaki tumboni inaweza kumfanya mtoto ajisikie kujaa, kupata maumivu ya tumbo, kulia au kutapika maziwa kidogo. Kwa sababu hiyo, ni muhimu kumsaidia mtoto kubeua ili kutoa hewa hiyo iliyomezwa.

Kumfanya mtoto abeua ni nini?

Kumfanya mtoto abeue ni ni kitendo cha kusaidia mtoto kutoa hewa iliyomezwa wakati wa kunyonya kupitia mdomo, kwa kumpigapiga mgongoni kwa upole katika mkao maalum.

Kwa nini ni muhimu kumbeusha mtoto

Kumbeusha mtoto baada ya kunyonya husaidia:

• Kupunguza kujaa kwa tumbo

• Kuzuia kutapika au kurudisha maziwa nje

• Kupunguza kulia kwa mtoto kutokana na maumivu ya tumbo

• Kumfanya mtoto ajisikie vizuri na kulala kwa utulivu

Wakati sahihi wa kumbeusha Mtoto

Mtoto anaweza kubeushwa:

• Katikati ya kunyonya, hasa kama anaonekana kukosa utulivu

• Mara baada ya kumaliza kunyonya

• Baada ya kubadilisha titi wakati wa kunyonyesha

Kwa watoto wachanga sana, mara nyingi inashauriwa kumbeusha kila baada ya dakika chache za kunyonya.

Namna ya kumweka mtoto Abeue

Kuna njia kadhaa salama za kumweka mtoto ili abeue.

1. Kumweka Mtoto Begani (Njia ya nawaida)

Hii ndiyo njia inayotumiwa zaidi.

Hatua zake ni:

1. Mweke mtoto wima begani mwako.

2. Kichwa cha mtoto kiwe juu ya bega lako.

3. Tumia mkono mmoja kushikilia kichwa na shingo ya mtoto.

4. Tumia mkono mwingine kumpigapiga au kumsugua mgongoni kwa upole.

5. Endelea kwa dakika chache hadi mtoto abeue.

Ni vyema kuweka kitambaa kidogo begani kwa sababu mtoto anaweza kutoa maziwa kidogo wakati wa kubeua.

2. Kumweka mtoto kwenye mapaja

Njia hii pia ni salama na hutumika sana.

Hatua zake ni:

1. Kaa kwenye kiti vizuri.

2. Mweke mtoto akikaa kwenye paja lako akiwa ameelekea mbele kidogo.

3. Shikilia kifua na kidevu cha mtoto kwa mkono mmoja.

4. Tumia mkono mwingine kumpigapiga mgongoni kwa upole.

Njia hii husaidia kuweka mtoto katika mkao ulionyooka unaorahisisha kutoka kwa hewa tumboni.

3. Kumlaza mtoto kifuani mwa mzazi

Katika njia hii:

1. Kaa au jiegemeze kidogo.

2. Mlaze mtoto kifua chake juu ya kifua chako.

3. Kichwa chake kiwe juu kidogo kuliko mwili.

4. Mpigepige mgongoni kwa upole na taratibu.

Dalili kuonyesha mtoto anahitaji kubeushwa

Mtoto anaweza kuhitaji kubeushwa ikiwa:

• Anaacha kunyonya ghafla

• Anaanza kulia au kukosa utulivu

• Anaonekana kujikunyata au kujipinda

• Tumbo linaonekana limejaa

Vidokezo muhimu kwa wazazi

• Usimpigepige mtoto kwa nguvu, tumia upole.

• Kama mtoto habeui mara moja, jaribu kwa dakika chache au badili mkao.

• Sio watoto wote wanaobeua kila wakati; wengine wanaweza kutobeua lakini bado kuwa sawa.

• Mweke mtoto wima kwa dakika chache baada ya kunyonya ili kupunguza kurudisha maziwa.

Wakati wa kumwona mtaalamu wa Afya

Mzazi anapaswa kumwona mtaalamu wa afya ikiwa mtoto:

• Anatapika maziwa mara nyingi sana

• Analalamika au kulia sana baada ya kunyonya

• Ana tumbo kujaa kupita kiasi au maumivu makali

• Hanyonyi vizuri

Hitimisho

Kumbeusha mtoto baada ya kunyonya ni sehemu muhimu ya malezi ya mtoto mchanga. Kitendo hiki husaidia kuondoa hewa tumboni, kumfanya mtoto ajisikie vizuri na kupunguza matatizo kama kujaa kwa tumbo au kutapika maziwa. Wazazi wanapaswa kutumia njia salama na kumpigapiga mtoto mgongoni kwa upole hadi abeue.

Maswali yaliyoulizwa mara kwa mara na majaibu yake kuhusu kubeua kwa mtoto na pozi la kumfanya mtoto abaue