Elimu ya magonjwa kwa mjamzito
Sehemu hii utajifunza maelezo ya ziada kuhusu matatizo mbalimbali ya kiafya wakati wa ujauzito. Unashauriwa siku zote kuwasilaina na daktari wako kabla ya kuchukua hatua yoyote ile iliyoandikwa humu ili kupata ushauri unaoendana na hali yako ya kiafya.
Kizunguzungu kwa Mjamzito
Kinaweza kusababishwa na mabadiliko ya homoni, kushuka kwa shinikizo la damu au sukari kwenye damu, upungufu wa damu au maji mwilini, lakini pia kinaweza kuashiria tatizo kubwa kama mimba kutunga nje ya mfuko wa uzazi au pri-eklampsia. Kunywa maji ya kutosha, kula vizuri na kupumzika, lakini tafuta huduma ya dharura ikiwa kinaambatana na kuzimia, maumivu makali ya kichwa au tumbo, kuona ukungu, au kutokwa na damu ukeni.
Kutokwa damu ukeni katika Mimba changa
Ya mwezi mmoja hadi miwili huweza kutokea bila mimba kuharibika, lakini pia huweza kuwa ishara ya kuharibika kwa mimba au mimba iliyotunga nje ya kizazi. Damu kidogo au nyingi haimaanishi moja kwa moja kwamba mimba imetoka, uchunguzi wa kitaalamu husaidia kujua hali ya mimba. Maumivu makali ya tumbo, maumivu upande mmoja, kizunguzungu kikali, kuzimia, udhaifu mkubwa au damu nyingi ni sababu ya kwenda hospitali haraka.
Kukojoa mara kwa mara kwa mjamzito
Mara nyingi huwa ni mabadiliko ya kawaida katika ujauzito, yanayohusishwa zaidi na mabadiliko ya utendaji kazi wa figo, homoni na ongezeko la shinikizo la mfuko wa uzazi kwenye kibofu. Ikiwa kuna hisia za maumivu au kuungua wakati wa kukojoa, damu, homa, maumivu ya mgongo au kujisikia mgonjwa, usichukulie hali hiyo kuwa ya kawaida ya ujauzito bila kuchunguzwa.
Mimba wakati wa Kunyonyesha
Inaweza kuingia hata kabla hedhi ya kwanza kurudi kwa sababu yai linaweza kutoka kabla ya hedhi ya kwanza. Kunyonyesha hutoa kinga ya muda tu ikiwa masharti maalumu ya kunyonyesha kikamilifu na mtoto kuwa chini ya miezi sita yametimizwa. Mama anayepata mimba mtoto akiwa na mwezi 1–12 hapaswi kuamua kuitoa kwa sababu ya umri mdogo wa mtoto pekee; anapaswa kupata tathmini ya afya, kuelewa hatari na chaguo zake, kisha kufanya uamuzi wenye taarifa unaoheshimu afya na matakwa yake.
Maambukizi yanayoweza kutoa Mimba
Maambukizi kama kaswende, rubela, toksoplasmosisi, parvovirus B19 na VVU yanaweza kuongeza hatari ya mimba kutoka au matatizo mengine ya ujauzito, kutegemea aina ya maambukizi na muda wa kuambukizwa.
Kupima mapema, kupata matibabu yanayofaa na kufuatiliwa wakati wa ujauzito husaidia kupunguza madhara kwa mama na mtoto.