Maumivu chini ya kitovu kwa mjamzito

Maumivu ya chini ya kitovu ( Maumivu ya tumbo la chini) ni malalamiko ya mara kwa mara kutoka kwa wajawazito wanaohudhuria kliniki au wanaofika hospitali kutafuta huduma za dharura. Chanzo cha maumivu haya kinaweza kuwa cha kawaida kutokana na mabadiliko ya mwili wakati wa ujauzito, lakini wakati mwingine huashiria matatizo makubwa yanayoweza kuhatarisha maisha ya mama na mtoto. Kwa mama mjamzito, ni muhimu kutambua sababu mbalimbali za maumivu haya na kufanya uchunguzi wa haraka ili kupata matibabu sahihi kwa wakati.

Visababishi vya maumivu ya chini ya kitovu

Kwa ujumla, maumivu haya yanaweza kugawanywa katika makundi mawili: yale yasiyo ya hatari na yale yanayohitaji uingiliaji wa kitabibu wa haraka.

Visababishi visivyo hatari

Mvutiko wa ligamenti duara

Katika hatua ya pili ya ujauzito na kuendelea, kizazi huendelea kukua na kurefuka, na hivyo kupelekea kuvutika kwa ligamenti duara inayoshikilia kizazi(Ligamenti hii hujishikiza katika sehemu ya juu ya kizazi na sehemu ya mbele ya fupanyonga karibu na kibofu cha mkojo). Hii inaweza kusababisha maumivu ya ghafla upande mmoja wa chini ya tumbo, ambayo huchochewa na mabadiliko ya mkao au harakati.

Ujazo wa gesi na kufunga haja kubwa

Pia, kiwango kikubwa cha homoni ya projesteroni hupunguza kasi ya mfumo wa mmeng’enyo, na kusababisha kujaa gesi au kufunga choo, hali inayochangia maumivu ya tumbo.

Ukuaji wa uterasi na shinikizo la viungo vya ndani

Shinikizo kutoka kwa uterasi inayokua linaweza pia kuathiri kibofu cha mkojo, puru, na misuli ya fumbatio, na hivyo kutoa hisia za maumivu au kukosa raha sehemu ya chini ya tumbo bila uwepo wa ugonjwa wowote.

Visababishi vilivyo magonjwa

Maambukizi ya njia ya mkojo (UTI)

Moja ya sababu za kawaida za kitabibu ni maambukizi ya njia ya mkojo (UTI), ambayo huambatana na maumivu ya suprapubic, kujikojolea mara kwa mara, na hisia ya kuungua wakati wa kukojoa. Ikiwa hayatatibiwa, yanaweza kupelekea maambukizi makubwa zaidi kwenye figo au hata uchungu wa mapema.

Uchungu kabla ya ujauzito kukomaa (Uchungu kabla ya wiki 37)

Uchungu wa leba kabla ya ujuzito kukomaa ni chanzo kingine kikuu. Hali hii hujitokeza kabla ya wiki ya 37 ya ujauzito na huambatana na maumivu ya tumbo ya mara kwa mara, kuongezeka kwa ute ukeni, au kutokwa na damu nyepesi.

Kunyofoka kwa kondo la nyuma

Wakati mwingine, maumivu huashiria kunyofoka kwa kondo la nyuma katika kuta za uzazi, hali inayojitokeza kwa ghafla, ikihusisha maumivu makali, ukakamavu wa fumbatio na kutokwa na damu ukeni. Hali hii huhatarisha maisha ya mama na mtoto na huhitaji uangalizi wa haraka.

Kondo la nyuma kujipandikiza sehemu isiyo sahihi

Mjamzito mwenye kondo lililojipanda sehemu isiyo ya kawaida anaweza kuwa na maumivu ya chini ya tumbo yanayoambatana na kutokwa na damu nyekundu ang’avu bila maumivu makali.

Kutungwa kwa mimba nje ya kizazi

Kwa upande mwingine, ikiwa mimba ipo kwenye hatua ya kwanza ya ujauzito, uwepo wa maumivu ya upande mmoja wa fumbatio pamoja na historia ya kutokwa na damu unaweza kuashiria mimba ya nje ya mfuko wa uzazi.

Kujinyongorota kwa ovari

Kujinyonga au kupasuka kwa uvimbe wa ovari ni hali nyingine inayoweza kusababisha maumivu ya ghafla, makali upande mmoja wa chini ya tumbo na huhitaji uchunguzi wa haraka kwa kutumia ultrasound.

Uchunguzi wa kitabibu

Historia ya tatizo

Historia ya kina ni ya msingi, ikijumuisha muda wa ujauzito, asili ya maumivu, muda wa kuanza, hali zinazoyaongeza au kupunguza, pamoja na dalili zinazofuatana nayo kama homa, kichefuchefu, au kutokwa na damu.

Uchunguzi wa mwili unapaswa kujumuisha vipimo vya dalili muhimu kama vile mapigo ya moyo, hali ya shinikizo la damu, kiwango cha joto la mwili, na hali ya fumbatio.

Vipimo maabara

Vipimo vya maabara kama uchunguzi kamili wa mkojo na kuotesha vimelea kwenye mkojo vinaweza kusaidia kuthibitisha maambukizi ya njia ya mkojo.

Kipimo cha picha kamili ya damu (FBC) hutathmini uwepo wa upungufu wa damu au maambukizi.

Ultrasound ya fumbatio na via vya ndani ya fupanyonga ni muhimu kutathmini hali ya kondo la nyuma, uhai wa kijusi, uwepo wa uvimbe wa ovari au kujinyongorota kwa ovari, pamoja na kuwezesha kubaini mimba ya nje ya mfuko wa uzazi.

Kwa ujauzito wa zaidi ya wiki 28, kipimo kisicho na shinikizo kwa mtoto au cha kuangalia maumbile ya mtoto vinaweza kutumika kutathmini ustawi wa mtoto tumboni.

Wakati gani wa kufika hospitali haraka?

Mjamzito mwenye maumivu ya chini ya kitovu anatakiwa kufika hospitali haraka iwezekanavyo iwapo atakutana na mojawapo ya dalili zifuatazo:

Matibabu ya maumivu ya chini ya kitovu kwa mjamzito

Kwa maumivu ya kawaida yanayotokana na kuongezeka kwa kizazi au kunyooshwa kwaligamenti duara, elimu ya hali hiyo na kuhakikisha mjamzito anajifunza mikao bora ya kulala (hasa kulala ubavu wa kushoto), mazoezi mepesi ya kujinyoosha, na ulaji wa vyakula vyenye nyuzinyuzi husaidia kupunguza maumivu hayo.

Kwa sababu za kitabibu, tiba hutegemea chanzo. Maambukizi ya njia ya mkojo hutibiwa kwa antibayotiki salama katika ujauzito kama vile nitrofurantoin au cephalexin. Uchungu wa mapema huweza kudhibitiwa kwa dawa za kuzuia uchungu na kortikosteroid kwa ajili ya kukomaza mapafu ya kijusi. Matatizo ya kondo kama kunyofoka kwa kondo huhitaji uangalizi wa karibu, kuongezewa damu endapo ipo damu inayotoka ni nyingi, na maandalizi ya upasuaji wa haraka pale inapotakiwa. Hali kama kujinyongorota kwa ovari huhitaji upasuaji wa haraka.

Hitimisho

Ni muhimu kwa mjamzito kufahamu tofauti kati ya maumivu ya kawaida na yale yanayoashiria hatari. Kupuuza dalili hizi kunaweza kuhatarisha maisha ya mama na mtoto. Wajawazito wote wanapaswa kuelimishwa mapema juu ya dalili hizi hatarishi na kupewa maelekezo ya wazi kuhusu lini kufika hospitali.

Maswali yaliyoulizwa mara kwa mara