Dalili za hatari baada ya kujifungua

Utangulizi

Mara baada ya kujifungua, kama mama atapata dalili zilizoelezwa kwenye Makala hii anapaswa kufika kituo cha afya karibu naye mara moja kwa huduma iwe mchana au usiku kwa kuwa dalili hizi huashiria kuwa hatarini hata kupotesha maisha kwa mama.

Dalili za hatari baada ya kujifungua

Dalili hizi zinapaswa kufahamika kwa mama na ndugu wanaoishi na mama aliyejifungua ili zitakapoonekana wamsaidie aweze pata msaada wa dharura katika kituo cha kutolea huduma za afya pasipo kusubiria. Dalili za hatari baada ya kujifugua ni pamoja na;

• Kutokwa na damu nyingi ukeni, damu isiyokoma (kuloanisha zaidi ya pedi moja ndani ya dakika tano)

• Mji wa mimba kutokuwa mgumu wala mviringo

• Kupumua kwa shida au kuishiwa pumzi

• Kupata homa na kuwa dhaifu kiasi cha kushindwa kutoka kitandani

• Maumivu makali ya tumbo

• Maumivu ya kichwa/kizunguzungu

• Kupoteza fahamu

• Degedege

• Kifafa

Dalili zingine

Baada ya kujifungua, mama anapaswa kufika au kufikishwa kwenye kituo cha huduma za afya haraka iwezekanavyo ikiwa dalili zifuatazo zitajitokeza:

• Kupata tabia isiyo ya kawaida kama msongo wa mawazo au kuchanganyikiwa

• Maumivu makali katika via vya uzazi, ambayo huweza kusababishwa na kuvilia kwa damu katika mashavu ya uke au kuongezwa njia ya uke wakati wa kujifungua, kuchanika au michubuko

• Kutokwa na majimaji yenye harufu mbaya ukeni baada ya kujifungua

• Maumivu ya misuli ya nyuma ya mguu

• Maumivu yatokanayo na kujaa/kuvimba kwa matiti

• Kupata mkojo kidogo sana

• Kutokupata mkojo kabisa

Kumbuka

Makala hii ya dalili za hatari baada ya kujifungua imejibu maswali pia kuhusu;

• Dalili za hatari kwa mama aliyejifungua

• Dalili za hatari kipindi cha puperiamu