Dalili za mimba ya miezi minne

Utangulizi

Mimba ya miezi minne ni sawa ya mimba ya wiki 13 hadi 16. Kufikia mwezi wa nne wa ujauzito, mwanamke huwa katika kipindi cha pili cha ujauzito . Katika kipindi hiki dalili kama kichefuchefu, kutapika na uchovu wa mwili hupungua kwa kiasi kikubwa. Hata hivyo, mabadiliko ya mwili huendelea kadri mtoto anavyokua. Kufahamu dalili za kawaida na nini cha kutarajia kunaweza kusaidia mama mjamzito kuwa tayari na kuepuka hatari.

Je, ni zipi dalili za mimba ya miezi minne?

Baadhi ya dalili za kawaida katika mwezi wa nne wa ujauzito ni:

• Kuongezeka kwa hamu ya kula : Kichefuchefu hupungua, na njaa huongezeka.

• Mabadiliko ya mfumo wa mmeng’enyo wa chakula: Unaweza kuhisi hali ya tumbo kujaa gesi, kiungulia na kukosa choo

• Maumivu ya tumbo lachini: Ni maumivu yanayosababishwa na kutanuka kwa ligamenti inayoshikilia mji wa mimba (round ligament ), na ni kawaida.

• Mabadiliko ya matiti: Matiti huongezeka ukubwa, kuwa na hisia zaidi, na sehemu ya rangi ya chuchu kuwa nyeusi zaidi

• Mabadiliko ya ngozi: Kama vile kuonekana kwa mstari mweusi unaopita katikati ya tumbo, michirizii sehemu mbali mbali za mwili na mng’ao wa ujauzito.

• Mabadiliko ya kihisia: Ingawa huwa hafifu kuliko katika miezi ya mwanzo, mabadiliko ya homoni yanaweza kuathiri hisia na hali ya akili

• Kuziba kwa pua na fizi kuvuja damu: Hii hutokana na ongezeko la damu na mabadiliko ya homoni

• Tumbo kuonekana : Mimba huonekana kwa macho kadri kizazi kinavyopanuka.

  
  

Mambo ya kuzingatia

Katika mwezi wa nne wa mimba, ni muhimu kuzingatia yafuatayo:

• Hudhuria kliniki ya ujauzito kama unavyopangiwa miadi

• Kula mlo kamili

• Fanya mazoezi salama kama vile Kutembea, yoga nk, kadri mwili wako utakavyoweza kustahimili

• Epuka sigara na vilevi 

Je, ni wakati gani unapaswa kumuona daktari?

Ingawa dalili nyingi ni za kawaida, zifuatazo zinahitaji msaada wa haraka wa kitabibu:

• Kutokwa na damu ukeni

• Maumivu makali ya tumbo

• Homa kali au dalili za maambukizi

• Kuvimba ghafla kwa uso, mikono, au miguu

• Maumivu au kuwashwa wakati wa kukojoa

• Kutokwa na majimaji isivyo kawaida ukeni

  
  

Wapi utapata maelezo zaidi kuhusu mimba ya miezi minne?

Ili  kupata maelezo zaidi kuhusu mimba ya miezi minne bofya hapa.