Dalili za mimba ya miezi sita

Utangulizi

Mimba ya miezi 6 ni sawa na mimba ya wiki 21 hadi 24. Katika hatua hii ya kipindi cha pili cha ujauzito, mabadiliko ya kimwili na kihisia huongezeka wakati mtoto akiendelea kukua na kujiandaa kwa maisha nje ya tumbo la uzazi. Mwezi wa sita wa ujauzito huashiria kipindi ambapo dalili za mapema za ujauzito hupungua, lakini huibuka dalili mpya zinazotokana na homoni na ukuaji wa mji wa mimba.

Je, ni zipi dalili za mimba ya miezi sita?

Zifuatazo ni baadhi ya dalili za kawaida ambazo zinaweza kuonekana: 

• Maumivu ya mgongo na nyonga: Uzito wa ziada na mabadiliko ya mlinganyo wa mwili huweza kusababisha maumivu ya mgongo, hasa sehemu ya chini. Homoni pia hulegeza ligament za nyonga, na hivyo kuongeza maumivu.

• Mikazo ya Braxton-Hicks: Hii ni mikazo ya mji wa mimba isiyo na maumivu ambayo huanza kuonekana mwanzoni kama maandalizi ya kujifungua. Kwa kawaida huwa hafifu na haitokei mara kwa mara.

• Kuharisha au kukosa choo: hali hii husababishwa na homoni ya projesteroni kupunguza kasi ya mmeng'enyo wa chakula, huku mfuko wa uzazi ukileta mgandamizo katika tumbo.

• Kuongezeka kwa ute ukeni : Ute mweupe na mwepesi kutoka ukeni ni wa kawaida kutokana na ongezeko la homoni ya estrogeni na mzunguko wa damu sehemu ya nyonga. Hali hii si hatari isipokuwa ikiambatana na harufu mbaya au muwasho.

• Muwasho na michirizi ya ngozi: Ngozi huendelea kutanuka hasa maeneo ya tumbo.Ngozi inayotanuka haraka husababisha kuwasha na alama za michirizi.

• Kuhisi kizunguzungu: Hii ni kwa sababu mzunguko wa damu yako unaongezeka ili kutoa mtiririko zaidi wa damu kwenye mji wa mimba.

• Kupumua kwa shida kiasi kidogo: Kadri mji wa mimba unavyoongezeka, huweza kushinikiza diaframu na kuathiri uwezo wa kupumua  lakini kiwango cha oksijeni mwilini hubaki kuwa kawaida

• Miguu kuvimba: Uvimbaji mdogo wa miguu au vifundo vya miguu ni wa kawaida kutokana na kuongezeka kwa kiasi cha damu na shinikizo kwenye mishipa ya damu.

• Mishipa ya damu kuonekana (Varicose Veins) na bawasiliOngezeko la damu na mabadiliko ya homoni husababisha mishipa ya damu kuonekana kwa uwazi, hasa miguuni na sehemu ya haja kubwa (hujulikana kama bawasili)

• Kuchoka na kukosa usingizi: Kwa kawaida hutokana na usumbufu wa mwili au haja ya kwenda chooni mara kwa mara, na wakati mwingine mabadiliko ya kihisia.

• Mabadiliko ya Hisia: Mabadiliko ya hisia  huweza  kuendelea kutokana na mabadiliko ya homoni na hisia za kujitayarisha kuwa mzazi

  
  

Mambo ya kuzingatia

Ili kuendelea kuwa na ujauzito wenye afya bora katika mwezi wa sita zingatia yafuatayo:

• Kula mlo kamili wenye madini chuma, kalsiamu, foliki, na asidi ya omega-3.kunywa maji ya kutosha

• Fanya mazoezi mepesi kama kutembea au yoga.

• Hudhuria kliniki ya ujauzito kama unavyopangiwa.

• Tafuta msaada wa kihisia ikiwa unahisi huzuni au mfadhaiko.

  
  

Je, ni wakati gani unapaswa kumuona daktari?

Tafuta msaada wa haraka wa kitabibu ikiwa utapata dalili zifuatazo:

• Maumivu makali ya kichwa yasiyoisha

• Mabadiliko ya kuona

• Mwili kuvimba ghafla

• Joto la mwili kupanda

• Kutokwa na damu au majimaji yasiyo kawaida ukeni

• Maumivu makali ya tumbo au nyonga

• Kupungua kwa mjongeo wa mtoto tumboni

• Kushindwa kupumua au maumivu ya kifua

• Dalili za huzuni kali kama vile kuwaza kujidhuru nk

  
  

  Wapi utapata maelezo zaidi kuhusu mimba ya miezi sita?

  Ili  kupata maelezo zaidi kuhusu mimba ya miezi sita bofya hapa.