Kutokwa na damu puani matibabu

Kutokwa na damu ndani ya pua kwa lugha tiba huitwa epistaksizi, huweza kutokea kipindi cha ujana au utotoni kwenye umri fulani. Tatizo hili husababisha hofu kwa mzazi au mtoto, hata hivyo huna haja ya kuogopa kwa sababu tatizo hili mara nyingi huwa si hatari na karibia kila mtu ashapata mara moja katika maisha yake. Hata hivyo endapo unatokwa na damu puani zaidi ya mara moja kwa wiki unatakiwa kupata uchunguzi kutoka kwa daktari.

Wapi unaweza kusoma zaidi kuhusu kutokwa na damu puani?

Soma zaidi kuhusu visababishi kwenye makala za Damu kutoka puani ndani ya tovuti hii ya ULY CLINIC

Huduma ya kwanza ya kutokwa na damu puani

Fanya mambo yafuatayo ili kusimamisha damu isiendelee kutoka;

• Peng’a pua ili kuondoa damu iliyoganda, fanya hivi taratibu hii inaweza kuongeza damu kutoka lakini usihofu. Kwa watoto wadogo kufanya hivi si lazima

• Pinda mgongo kwa mbele ukiwa umekaa au kusimama. Usilalie mgongo kwa sababu inaweza kusababisha utapike

• Bana pua karibu na matundu kwa kutumia vidole viwili vya mikono yako, tumia nguvu sawa kubana matundu yote kwa pamoja

• Bana maka kuziba matundu ya pua kwa angalau dakika 5 kwa watoto au 10 hadi 15 kwa mtu mzima. Hakikisha unatumia saa kuhesabu muda huu, watu wengi huacha kubana chini ya muda unaoshauriwa hivyo damu huendelea kutoka.

• Endapo unaweza tumia barafu kupaki kweye kuta za pua, hii inasaidia pia mishipa ya damu kusinyaa na kusimamisha damu kutoka lakini si lazima kufanya hivi

Endapo damu inaendelea kutoka ufanye nini?

Endapo umefuata maelezo yaliyoorodheshwa hapo juu na damu bado inaedelea kutoka, rudia upya kwa muda wa dakika 30. Na endapo bado inaendelea kutoka, tafuta msaada kutoka kwa daktari wako haraka au piga simu kuita mtaalamu wa afya kuja kukusaidia.

Namna ya kujikinga na kutokwa damu puani

• Tumia Kiyoyozi ili kuongeza unyevu kwenye mazingira yako endapo hewa ni kavu

• Tumia dawa ya maji ya chumvi kupulizia kwenye matundu ya pua ili kufanya pua iwe na unyevunyevu

• Jizuie kuingiza kidole puani, kama ni lazima kata kucha zako ziwe fupi kuzuia kujiumiza.