Kamusi Tiba ya ULY CLINIC

Ishara ya Ortolani hufahamika pia kwa lugha nyingine ya Ortolani Sign ni kipimo cha uchunguzi wa mtoto mchanga kinachotumika kubaini nyonga iliyotenguka tayari lakini inaweza kurekebishwa katika tatizo la kuzaliwa la nyonga inayoteguka.

Agrafia ya tahajia ni aina ya agrafia inayojitokeza pale ambapo mtu hushindwa kuandika maneno kwa tahajia sahihi licha ya kuwa na uwezo wa kushika kalamu na kupanga sentensi. Katika hali hii, tatizo liko kwenye mifumo ya ubongo inayohusika na kumbukumbu ya maneno, sauti za lugha, na uhusiano kati ya sauti na maandishi, na si kwenye nguvu ya misuli au uelewa wa jumla wa lugha.

Agrafia ya nafasi hufahamika kwa lugha nyingine kama Spatial Agraphia, ni aina ya agrafia inayotokea pale ambapo mtu hushindwa kuandika kwa mpangilio sahihi kutokana na kuharibika kwa uwezo wa kutambua na kupanga nafasi. Katika hali hii, mtu anaweza kuwa na uelewa mzuri wa lugha na uwezo wa kuunda maneno sahihi, lakini hushindwa kuyaweka vizuri kwenye maandishi kwa sababu mfumo wa utambuzi wa nafasi umeathirika.

Hufahamika kiswahili kama Agrafia ya misuli, ni aina ya agrafia inayotokea pale ambapo mtu hushindwa kuandika kwa usahihi kutokana na udhaifu wa misuli, kupooza, au matatizo ya neva yanayodhibiti harakati za mkono na vidole. Katika hali hii, mfumo wa lugha huwa haujaathirika; mtu anaweza kufikiri, kuelewa, na kupanga maneno kwa usahihi, lakini hushindwa kuyatekeleza katika maandishi kwa sababu ya changamoto za kimwili.

Agrafia safi ni aina ya agrafia inayojitokeza pale ambapo mtu hupoteza au kuharibikiwa uwezo wa kuandika pekee, huku uwezo mwingine wa lugha kama kuzungumza, kusoma, na kuelewa lugha ukiwa bado uko kawaida. Hali hii hutokea kutokana na uharibifu wa eneo maalum la ubongo linalohusika na kuhifadhi na kutekeleza ujuzi wa kuandika, bila kuathiri mfumo mpana wa lugha.