Kamusi Tiba ya ULY CLINIC

Kizimua oksijeni huru ni elementi(dutu) inayopunguza au kuzuia madhara yanayotokana na chembe huru za oksijeni, ambazo zinaweza kuharibu seli kupitia mchakato wa oksidesheni. Kizimua oksijeni huru hufanya kazi kwa kutoa elektroni au kuzuia mnyororo wa oksidesheni, hivyo kulinda seli na mifumo ya mwili dhidi ya uharibifu wa kemikali.Dutu hizi hupatikana kiasili mwilini au kupitia vyakula na mimea, kama vile vitamini C, vitamini E, na misombo ya mimea yenye kinga ya kibiolojia.

Braxton Hicks contractions hufahamika kwa kiswahili kama Mikazo ya Braxton ambayo ni ni mikazo ya kizazi inayotokea wakati wa ujauzito kama sehemu ya maandalizi ya mwili kwa ajili ya uchungu wa uzazi. Ni mikazo isiyo na mpangilio maalumu, ambayo haipelekei mabadiliko ya mlango wa kizazi, na mara nyingi hupungua au kubadilika tabia kulingana na hali ya mwili.

Catabolism ni neno tiba linalofahamika kiswahili kama Katabolizimu ni sehemu ya mchakato wa umetaboli inayohusika na uvunjaji wa kampaundi au molekyuli kubwa kuwa molekyuli ndogo. Katika hatua hii, mwili hutoa nishati kwa kuvunja Glukosi → kutoa nishati kwa seli, Mafuta → kutoa nishati iliyohifadhiwa na Protini → kuzalisha molekyuli ndogo zinazotumiwa na mwili

Anabolism ni sehemu ya mchakato wa umetaboli inayohusika na ujengaji wa kampaundi mpya mwilini. Katika hatua hii, mwili hutumia nishati ili kuunda molekyuli kubwa kutoka molekyuli ndogo, kama vile Kujenga glukosi kutoka vijenzi vingine, Kutengeneza protini kutoka kwenye asidi amino, Kutengeneza mafuta kutoka vipande vidogo na Kujenga tishu za mwili kama misuli

​