Changamoto ya kushika mimba baada ya kuacha kutumia dawa za uzazi (P2)

Swali la msingi

Nimeshindwa kushika mimba tangu nilipoacha kutumia p2 mwezi wa tatu sasa. Je, ni nini kinachosababisha hili na nifanyeje?

Majibu

Kuacha kutumia dawa za uzazi kama p2 ni hatua ya kawaida kwa wanawake wanaotaka kupata mimba. Hata hivyo, mara nyingine mwili unahitaji muda wa kurejea kwenye mzunguko wa kawaida wa hedhi na uovuleshaji (kuachilia yai), jambo ambalo linaweza kuchukua miezi kadhaa.

Visababishi vya kuchelewa kushika mimba

Sababu za kuchelewa kushika mimba baada ya kuacha p2 ni pamoja na:

1. Mzunguko wa hedhi haujarejea kawaida: Baadhi ya wanawake hawarudi kwenye mzunguko wa kawaida mara moja baada ya kuacha dawa za uzazi. Hii inaweza kusababisha kutoachilia yai kila mwezi, hivyo kuzuia ujauzito.

2. Muda wa mwili kurekebisha homoni: Dawa za uzazi za homoni huathiri usawa wa homoni mwilini. Baada ya kuacha, mwili unahitaji muda kujirekebisha na kuanza kutoa homoni zinazosaidia kuachilia yai.

3. Sababu nyingine za kiafya: Baadhi ya wanawake wanaweza kuwa na matatizo ya kiafya kama vile ugonjwa wa PCOS (Sindromu ya ovari yenye vifukomaji vingi), maambukizi (magonjwa ya zinaa, PID nk) au matatizo ya homoni yanayoweza kuathiri ujauzito.

Unapaswa kufanya nini sasa?

• Subiri angalau miezi 3-6 baada ya kuacha p2 ili kuona kama mzunguko wako unarejea kawaida.

• Fuatilia mzunguko wako wa hedhi na angalia kama unapata hedhi kwa kawaida.

• Tumia kipimo cha ujauzito ikiwa umechelewa hedhi.

• Ikiwa bado hujapata ujauzito baada ya miezi 6-12 ya kujaribu, tafuta ushauri wa daktari kwa uchunguzi wa kina na ushauri wa kitaalamu.

• Hakikisha unaweka afya yako na ya mwenza wako kuwa vizuri, kwa kula vizuri na kupima au kutibiwa magonjwa yanayozuia kushika mimba.

Ushauri muhimu

Kupata mimba ni mchakato unaoweza kuchukua muda. Kuwa na subira na hakikisha unapata ushauri wa kitaalamu ukiwa na mashaka au matatizo ya kushika mimba.