Dawa ya Rangi Mbili inasaidia kwenye Matatizo ya Kifua?

Ukweli, Elimu Sahihi na Jinsi ya kutambua dawa inayokufaa

Wagonjwa wengi hufika kliniki au hutuma ujumbe wakisema:

Swali hili linaonekana rahisi, lakini kitaalamu halina jibu moja la moja, kwa sababu rangi ya dawa haielezi kazi ya dawa hiyo. Makala hii imeandaliwa ili:

• Kueleza maana halisi ya “dawa ya rangi mbili”

• Kusaidia wagonjwa kuepuka kudhani dawa kwa kuangalia rangi

• Kufundisha jamii namna sahihi ya kutambua dawa

• Kuweka msingi wa marejeo kwa makala zingine za afya zitakazoandikwa baadaye

“Dawa ya Rangi Mbili” ina maana gani kitaalamu?

Kwa lugha ya kitabibu, hakuna kundi la dawa linaloitwa dawa ya rangi mbili. Mara nyingi, mgonjwa anaposema hivyo, anaweza kumaanisha:

• 💊 Kidonge au tembe (kapsuli) yenye rangi mbili tofauti

• 💊 Dawa aliyowahi kupewa hospitalini yenye mwonekano wa rangi mbili

• 💊 Dawa aliyowahi kuona kwa mtu mwingine

• 💊Kumbukumbu ya dawa ya zamani bila kujua jina lake

Muhimu: Rangi ya dawa inaweza kubadilika kulingana na kampuni iliyotengeneza, hata kama dawa ni ileile.

Je, Dawa za Rangi Mbili hutibu kifua?

Jibu sahihi:

Inawezekana ndiyo, au hapana inategemea NI DAWA GANI, siyo RANGI GANI.

Matatizo ya kifua yana visababishi vingi, mfano:

• Maambukizi ya bakteria

• Maambukizi ya virusi

• Pumu ya kifua (asthma)

• Kifua kikuu

• Mzio (Aleji)

• Maumivu ya misuli ya kifua

• Kiungulia (chembe ya moyo)

Kila tatizo lina dawa tofauti, na baadhi ya dawa hizo zinaweza kuwa na rangi mbili kwa bahati tu.

Mifano ya dawa ambazo wagonjwa mara nyingi huzita “Za Rangi Mbili”

• Baadhi ya antibayotiki (tembe)

• Dawa za kikohozi

• Dawa za pumu ya kifua

• Dawa za maumivu ya kifua

• Dawa za mzio

Dawa hizi hazifanyi kazi sawa, hata kama zinafanana kwa rangi.

Hatari ya kutegemea Rangi ya dawa

Kudhania dawa kwa rangi kunaweza kusababisha:

• Kutumia dawa isiyo sahihi

• Kutibu dalili badala ya chanzo

• Kuchelewesha ugonjwa hatari (mf. kifua kikuu)

• Usugu wa vimelea kwenye dawa

• Madhara yasiyo ya lazima

Namna sahihi ya kutambua kama dawa inasaidia tatizo la kifua

Fuata hatua hizi 6 muhimu:

1. Tambua jina la dawa– Jina la kitabibu au la biashara

2. Tambua aina ya dawa

   • Antibiotiki?

   • Dawa ya pumu ya kifua?

   • Dawa ya maumivu?

   • Dawa ya aleji?

3. Tambua tatizo la kifua ulilonalo

   • Kikohozi?

   • Kubanwa kifua?

   • Maumivu?

   • Kupumua kwa shida?

4. Soma au uliza dawa inafanya kazi gani– Si kila dawa ya kifua hutibu kikohozi

5. Andika jina la dawa kewnye tovuti, mfano katika tovuti sehemu ya tafuta chochote hapa au msaidizi unde, kwa dawa utakayoandika utaletewa taarifa zake na kazi zake

6. Pata ushauri wa mtaalamu wa afya– Daktari au mfamasia atakupa maelezo ya mwisho kuhusu dawa unayouliza na kazi zake kama zinaendana nawe

Muhtasari

Dawa haitambulishwi kwa rangi yake bali kwa jina, aina na kazi yake ya kitabibu. Kutegemea mwonekano wa dawa (kama “dawa ya rangi mbili”) kunaweza kusababisha matumizi yasiyo sahihi na kuchelewesha matibabu sahihi ya matatizo ya kifua.

Maswali yaliyoulizwa mara kwa mara na majibu yake