Je, duphaston inaweza kufungua njia ya mlango wa kizazi uliofungana?

Swali la msingi

“Habari daktari, mimi ni mwanamke wa miaka 27. Nilikuwa na kawaida ya kuona hedhi kila mwezi, lakini sasa ni zaidi ya miezi miwili sijaona damu, ingawa nahisi maumivu ya tumbo kila mwezi kama kawaida. Nimepimwa mimba mara kadhaa lakini majibu ni hasi. Nilipewa Duphaston ili kurejesha hedhi, lakini bado sijaona damu. Nilisikia kuna hali ya kizazi kufunga damu. Je, inawezekana mlango wa kizazi wangu umefungana? Na je, hiyo dawa ya Duphaston inaweza kusaidia kufungua njia ili damu itoke?”

Majibu

Baadhi ya wanawake hukumbana na hali isiyo ya kawaida ambapo damu ya hedhi haipiti kama inavyotarajiwa kutokana na mlango wa kizazi (cervix) kuungana au kuziba. Hali hii inaweza kuwa ya kuzaliwa nayo au hutokea baada ya upasuaji, maambukizi, au madhara ya dawa. Swali linaloulizwa mara kwa mara ni kama dawa kama Duphaston inaweza kusaidia kufungua mlango wa kizazi na kuruhusu damu kutoka.

Mlango wa kizazi kuungana ni nini?

Hii ni hali ambapo sehemu ya chini ya mfuko wa uzazi (shingo ya kizazi) huungana au kufunga njia ya damu ya hedhi kutoka. Inaweza kuwa:

• Asili (kuzaliwa nayo) – hali ya kuzaliwa bila uwazi wa njia ya kizazi

• Sababu za baadae – kama vile:

  • Jeraha kutoka upasuaji wa kizazi au mitala

  • Maambukizi sugu ya kizazi

  • Matumizi ya mionzi kwenye kizazi au mlango wa uzazi

  • Kuungua ndani ya mfuko wa kizazi (asherman sindromu)

Dalili zinazoashiria mlango wa kizazi umefungana

• Kukosa hedhi licha ya mzunguko wa homoni kuwa wa kawaida

• Maumivu makali ya tumbo kila mwezi

• Kuvimba kwa mfuko wa uzazi (hematometra)

• Kutokwa damu kidogo au kwa vipindi visivyo vya kawaida

• Ugumba (kutopata ujauzito)

Je, Duphaston inaweza kufungua mlango wa kizazi?

Hapapa.Duphaston (Dydrogesterone) ni dawa ya homoni ya projesteroni inayotumika kusaidia:

• Kuleta hedhi kwa walio na mzunguko usio wa kawaida

• Kuzuia mimba kutoka mapema

• Kuimarisha ukuta wa mfuko wa uzazi (endometrium)

Hata hivyo, Duphaston haiwezi kufungua njia ya mlango wa kizazi uliofungana kwa sababu haina uwezo wa asilia wa kuondoa makovu, kizuizi au kuondoa tishu zilizofunga mlango wa kizazi.

Uchunguzi wa tatizo

Ikiwa daktari atahisi mlango wa kizazi umefungana, hatua zifuatazo hufanyika:

• Ultrasound (Uchunguzi kwa mawimbi ya sauti) – kuangalia kama damu imekwama ndani ya mfuko wa uzazi

• MRI/CT scan – kuchunguza ukubwa wa tatizo

• Histeroscopi – kifaa maalum huingizwa ndani ya mfuko wa uzazi kuona hali ya ndani

• Uchunguzi wa kitaalamu wa via vya nyonga – daktari anapima kwa njia ya mlango wa uke kuangalia shingo ya kizazi

Matibabu

1. Upasuaji mdogo wa kufungua mlango wa kizazi

   • Hufanyika kwa kutumia kifaa maalum (kitanua shingo ya uzazi)

   • Histeroscopi inaweza kusaidia kuondoa kizuizi

2. Matibabu ya sababu ya kisababishi cha msingi

   • Kuondoa tishu zinazofunga (makovu)

   • Tiba ya maambukizi kama yapo

   • Marekebisho ya kasoro za kimaumbile

3. Kufuatilia kwa karibu

   Baada ya matibabu, kufuatilia hali ya uzazi na mzunguko wa hedhi ni muhimu

Wakati gani wa kumwona Daktari haraka?

• Ukikosa hedhi kwa zaidi ya miezi 3 bila ujauzito

• Ukiona damu imekwama ndani na una maumivu

• Ukiwa na historia ya upasuaji wa kizazi na ukakosa hedhi baada ya hapo

• Ikiwa una mpango wa kupata mimba na huwezi kushika mimba

Hitimisho

Duphaston ni dawa nzuri kwa matatizo ya homoni, lakini haiwezi kufungua mlango wa kizazi ulioziba. Ikiwa damu haipiti na unahisi maumivu au mabadiliko ya mzunguko wa hedhi, ni muhimu kumwona daktari kwa uchunguzi wa kina. Matibabu sahihi mara nyingi yanahitaji uchunguzi wa picha na upasuaji mdogo ili kurekebisha hali hiyo.

Maswali yaliyoulizwa mara kwa mara