Je, inaweza kuwa mimba ikiwa nina maumivu ya tumbo baada ya tendo la kwanza bila kumwagiwa ndani?

Swali la msingi

Samahani daktari, naomba kuuliza. Nahisi maumivu kwenye tumbo, je inaweza kuwa dalili ya mimba? Wakati wa tendo la ndoa la kwanza sikuona damu wala mwanaume hakumwaga shahawa ndani, je bado inaweza kuwa mimba?

Majibu

Mara ya kwanza kufanya ngono huambatana na maswali mengi, hofu na mabadiliko mapya ya mwili. Maswali kama: “Je, ninaweza kupata mimba kama hakumwaga?”, au “Kwa nini sina damu baada ya tendo la kwanza?” ni ya kawaida kabisa. Katika makala hii, tutajadili kwa kina uwezekano wa kupata ujauzito katika mazingira hayo, sababu za maumivu ya tumbo baada ya tendo la kwanza, na hatua unazoweza kuchukua.

Je, unaweza kupata mimba bila mwanaume kumwaga?

Ndiyo, inawezekana – japo uwezekano ni mdogo.

Watu wengi hufikiri kuwa mimba hutokea tu kama mwanaume atamwaga shahawa (ejaculate) ndani ya uke. Hii si kweli kila mara. Kuna uwezekano wa kupata ujauzito hata kama hakumwaga, kutokana na kile kinachoitwa:

Ute wa kwanza kabla ya kumwaga

• Haya ni majimaji yanayotoka kwenye uume kabla mwanaume hajafika kileleni.

• Majimaji haya yanaweza kuwa na mbegu za kiume, hasa kama mwanaume alifanya tendo la ndoa hivi karibuni.

• Mbegu chache tu (sperm) zinaweza kusababisha ujauzito kama kuna yai linalosubiri kurutubishwa.

Kwa hiyo, kama mlifanya tendo la ndoa bila kutumia kondomu au kinga yoyote, uwezekano wa mimba bado upo, hata kama hakumwaga ndani.

Kwa nini hukutoka damu baada ya tendo la kwanza?

Hili ni swali linaloulizwa sana na wanawake wa mara ya kwanza. Ukweli ni kwamba sio kila msichana atatoka damu mara ya kwanza kutokana na;

• Kuta za utando wa bikira (hymen) ni tofauti kwa kila mtu. Kwa wengine, hymen ni laini na rahisi kuvutika, hivyo huenda isipasuke wala kuvuja damu.

• Wengine hushiriki michezo au shughuli zinazoweza kubadilisha umbo la hymen kabla hata ya kufanya ngono.

• Pia, ngono ya taratibu na ukeni uliolainika huweza kuzuia kuchanika kwa hymen.

Kwa hiyo, kutotoka damu haimaanishi hujafanya ngono, wala haimaanishi kuna tatizo.

Visababishi vya maumivu ya tumbo baada ya ngono ya kwanza

Maumivu haya ni ya kawaida kwa baadhi ya wanawake na yanaweza kusababishwa na:

Kuongezeka kwa msuguano ndani ya uke

Mara ya kwanza, uke huwa bado haujazoea tendo la ndoa na msuguano unaweza kusababisha maumivu ya tumbo au nyonga.

Uovuleshaji

Ikiwa uko katikati ya mzunguko wako wa hedhi, yai linaweza kuwa linatolewa na ovari, na hali hii inaweza kuambatana na maumivu madogo ya upande mmoja wa tumbo.

Mabadiliko ya homoni

Kufanya ngono huweza kuchochea mabadiliko ya homoni kwa mara ya kwanza, na hii huweza kuleta hisia tofauti, pamoja na maumivu ya tumbo.

Msongo wa mawazo

Hofu ya ujauzito au maumivu yanayotarajiwa huweza pia kuathiri mwili na kuleta hisia za maumivu.

Maambukizi au jeraha

Ikiwa tendo lilifanyika bila uangalifu, linaweza kusababisha kidonda au jeraha dogo. Ikiwa kuna harufu mbaya, uchafu ukeni, au maumivu ya kuongezeka, tafadhali tafuta msaada wa kitabibu.

Je, huu unaweza kuwa ujauzito? utajuaje?

Dalili za awali za ujauzito ni pamoja na:

• Kukosa hedhi

• Maumivu ya matiti

• Uchovu

• Maumivu ya tumbo ya kuvuta kama ya hedhi

• Kichefuchefu

Kumbuka: Dalili hizi zinaweza kufanana pia na zile za mzunguko wa kawaida wa hedhi au mabadiliko ya homoni baada ya tendo.

Nifanye nini sasa?

Fanya kipimo cha mimba:

Fanya kipimo cha mkojo cha mimba kama imepita angalau siku 14 tangu ulipofanya ngono. Kipimo cha asubuhi (kutumia mkojo wa alfajiri) huwa bora zaidi kwa usahihi.

Tumia kinga mara nyingine:

Kama hutaki kupata mimba kwa sasa, fikiria kutumia:

• Kondomu

• Kalenda (ikiwa mzunguko wako ni thabiti)

• Njia za uzazi wa mpango zisizo na homoni (kama diaframu)

Fuatilia mzunguko wa hedhi yako

Tumia app au kalenda kufuatilia siku zako ili kufahamu siku za hatari na salama.

Mwone daktari kama maumivu yataendelea

Ikiwa maumivu ni makali, yanaendelea zaidi ya siku chache, au yanaambatana na dalili nyingine kama homa au uchafu ukeni, kichefuchefu au kizunguzungu kinachoendelea., tafuta msaada wa kitaalamu.

Hitimisho

Kupata mimba hata kama mwanaume hajamwaga ni jambo linalowezekana, japo kwa kiwango cha chini. Maumivu ya tumbo baada ya ngono ya mara ya kwanza ni ya kawaida kwa wanawake wengi. Lakini ikiwa unapata wasiwasi au maumivu yanazidi, ni busara kupata ushauri kutoka kwa mtaalamu wa afya. Kujua mwili wako, kujiamini, na kuchukua hatua za kinga mapema ni njia bora ya kujilinda na kujitunza.