Je, ukiwa mjamzito unaweza kuendelea kupata hedhi kila mwezi kama kawaida?

Swali la msingi

"Habari daktari. Nilipima nikagundua kuwa nina ujauzito, lakini bado ninapata damu kila mwezi kwa mpangilio uleule wa hedhi. Je, inawezekana kuwa mjamzito na bado kupata hedhi? Hii ina maana mimba yangu iko salama au kuna shida?"

Majibu

Kwa kawaida, mwanamke akiwa mjamzito hapaswi kupata hedhi ya kawaida. Hedhi hutokea pale yai lililotolewa na ovari halijapandikizwa, na ukuta wa mji wa mimba huondoka. Lakini wakati wa ujauzito, yote mawili hushindikana kwa sababu:

• Yai limepata mbegu na kujipandikiza.

• Homoni za ujauzito (hasa progesterone na hCG) huzuia kuharibika kwa ukuta wa uterasi.

Hata hivyo, kuna matukio machache sana ambapo mwanamke mjamzito anaweza kuona damu kwa mpangilio unaofanana na hedhi. Hii mara nyingi si hedhi ya kweli, bali ni kutokwa damu kutokana na sababu maalum, ikiwa ni pamoja na kasoro za mji wa mimba.

Kwa nini wengine hufikiri wanapata hedhi?

Wanawake wengi huchanganya kutokwa na damu kidogo wakati wa ujauzito na hedhi ya kawaida. Baadhi ya sababu ni:

Hali zisizo za kawaida zinazoweza kusababisha damu ya “kila mwezi” wakati wa ujauzito

1. Kizazi chenye mifuko miwili (Bicornuate Uterus)

• Katika hali hii, kizazi kina mifuko miwili.

• Mimba inaweza kukua katika upande mmoja, huku upande mwingine ukiendelea na mzunguko wa kawaida.

• Hii ina maana kwamba utando laini wa kizazi upande usio na mimba unaweza kuendelea kujengeka na kuharibika, hivyo damu hutoka kila mwezi kama hedhi.

2. Kizazi pacha (Kuwa na vizazi viwili)

• Hufahamika pia kama kizazi cha didelfis

• Hii ni hali ya nadra zaidi ambapo mwanamke ana miji ya mimba miwili iliyokamilika

• Kama mimba ipo kwenye moja, ya kizazi, nyingine inaweza kuendelea kufanya kazi kama kawaida, na hivyo mwanamke huingia hedhi ya kila mwezi.

3. Sababu nyingine za kutokwa damu kila mwezi

• Mabadiliko ya homoni mwanzoni mwa ujauzito.

• Vidonda au maambukizi ya shingo ya kizazi.

• Polipu kwenye uterasi.

• Lakini hizi kwa kawaida hazina mpangilio wa “hedhi ya kila mwezi.”

Je, ni hedhi ya kweli?

Hapana. Kitaalamu, hedhi ya kweli haiwezi kutokea wakati wa ujauzito, kwa sababu homoni za ujauzito husitisha ovulation na uharibifu wa ukuta wa mji wa mimba.Lakini damu kutoka upande wa uterasi usio na mimba (katika hali ya bicornuate uterus) inafanana na hedhi, na hivyo mara nyingi huitwa hedhi kwa urahisi wa kuelewa.

Je, ni salama ikiwa mwanamke anaendelea kutokwa na damu wakati wa ujauzito?

• Sio hali ya kawaida, na inaweza kuficha ujauzito.

• Hatari ni kubwa kwa sababu:

  • Mama anaweza kuchelewa kugundua ujauzito na kuchelewa kupata huduma.

  • Kutokwa damu kunaweza kuashiria mimba yenye hatari (kama mimba ya nje ya mfuko, tishio la kuharibika kwa mimba, au matatizo ya kondo la nyuma).

• Kwa hiyo, damu yoyote wakati wa ujauzito inapaswa kuchukuliwa kama dalili ya kuonana na daktari haraka.

Dalili za tahadhari wakati unapata damu ukiwa mjamzito

• Damu nyingi kuliko kawaida.

• Maumivu makali ya tumbo au mgongo.

• Kuhisi kizunguzungu au kuchoka sana.

• Dalili za maambukizi kama homa au harufu mbaya.

Hitimisho

Kwa kawaida, mjamzito hapaswi kupata hedhi, lakini katika hali nadra sana kama kizazi chenye mifuko miwili au kizazi pacha, damu inaweza kutoka kwa mpangilio wa kila mwezi. Hata hivyo, hii si “hedhi halisi” kwa maana ya kitabibu.Damu yoyote ukiwa mjamzito inahitaji uchunguzi wa daktari ili kuhakikisha ujauzito unaendelea salama.

Maswali yanayoulizwa mara kwa mara