Jicho jekundu linalouma upande mmoja hadi kwenye paji la uso

Maumivu ya jicho upande mmoja yanayoambatana na wekundu (jekundu) wa jicho na kuenea hadi juu ya uso ni hali inayoweza kuwa ya kawaida au ya kutishia afya ya jicho endapo haitatibiwa kwa haraka. Watu wengi hushangazwa na hali hii na kujiuliza maswali kama: “Kwa nini jicho langu ni jekundu upande mmoja na linauma hadi kwenye paji la uso?” Makala hii inalenga kueleza sababu zinazowezekana, lini unapaswa kumwona daktari, na hatua za awali za matibabu ya nyumbani.

Visababishi

Kuna sababu kadhaa zinazoweza kusababisha hali hii, ikiwemo:

1. Michomokinga katika Uvea

Michomo kinga katika uvea yanayosababishwa na maambukizi hupelekea uvimbe wa sehemu ya ndani ya jicho (uvea), unaosababisha maumivu makali, jicho kuwa jekundu, na kuona kufifia au ukungu. Hali hii inaweza kuathiri jicho moja na kusababisha maumivu yanayoelekea juu ya uso. Mara nyingi huhusiana na magonjwa ya kinga kama vile rheumatoid arthritis au lupus.

2. Michomokinga katika sainaz

Maambukizi au uvimbe wa sainazi zinazozunguka jicho, hasa za mbele au kwenye fupa ethmoid, huweza kusababisha maumivu ya uso yanayoanzia karibu na jicho moja. Jicho linaweza kuwa jekundu kwa sababu ya shinikizo au uvimbe wa maeneo ya karibu.

3. Michomokinga kwenye konjaktiva

Hii ni hali ya kuvimba kwa utando wa nje wa jicho(konjaktiva). Ingawa mara nyingi siyo ya dharura, Kuvimba kutokana na maambukizi ya bakteria au ya mzio inaweza kuathiri jicho moja na kusababisha wekundu, maumivu, kuwasha, na kutoa usaha au machozi mengi.

4. Michomokinga kwenye sklera

Scleritis ni uvimbe wa safu ya nje ya jicho (sklera) unaoambatana na maumivu makali na wekundu wa jicho. Maumivu yanaweza kuenea hadi kwenye uso au kichwa. Ni hali inayoweza kuashiria tatizo la ndani ya mwili kama ugonjwa wa kinga.

5. Glaukoma ya ghafla

Ni hali ya dharura ambapo shinikizo la ndani ya jicho linapanda ghafla, kusababisha maumivu makali ya jicho, wekundu, kichefuchefu, na kuona madoa ya mwanga. Ikiwa haitatibiwa mara moja, inaweza kusababisha upofu.

Wakati gani unapaswa kumwona Daktari haraka?

Unapaswa kumwona daktari wa macho haraka kama unapata mojawapo ya dalili zifuatazo:

• Maumivu makali ya jicho yanayoenea hadi kichwani au usoni

• Kupungua kwa uwezo wa kuona au kuona ukungu

• Jicho kuwa jekundu upande mmoja tu bila sababu ya wazi

• Jicho kutoa usaha au machozi mengi yasiyoisha

• Kuhisi shinikizo la ndani ya jicho au maumivu yanayoongezeka unapogusa paji la uso au karibu na pua

• Dalili zinaendelea zaidi ya siku 1–2 bila kubadilika

Kuchelewa kutafuta msaada wa kitabibu kunaweza kuongeza madhara kwa jicho au kusababisha matatizo ya kudumu kwenye kuona.

Matibabu ya nyumbani

Wakati unasubiri kwenda hospitali au kupata huduma ya daktari:

• Pumzisha jicho kwa kupunguza mwanga mkali au kutumia miwani ya jua.

• Epuka kugusa au kukuna jicho kwani unaweza kuongeza maambukizi.

• Tumia kitambaa cha baridi  kukanda jicho lenye maumivu ili kupunguza uvimbe na maumivu kidogo.

• Epuka kutumia dawa za macho za kununua dukani bila ushauri wa kitaalamu. Baadhi zinaweza kuongeza tatizo.

• Usitumie dawa za asili au majani machoni kwa kuwa zinaweza kusababisha madhara zaidi.