Baada ya kutoa mimba, wanawake wengi hupima mimba mapema ili kujua kama ujauzito umetoka au la. Hata hivyo, kipimo cha mimba cha mkojo kinaweza kuonyesha majibu chanya (positive) kwa wiki kadhaa kutokana na uwepo wa homoni ya ujauzito inayofahamika kama hCG, hata kama mimba imeshatoka. Makala hii inaeleza kwa kina muda sahihi wa kupima, maana ya matokeo katika nyakati tofauti, na vipimo vya uhakika kama unahitaji kujiridhisha mapema.

Jinsi homoni ya hCG inavyopungua baada ya kutoa mimba

Baada ya ujauzito kusitishwa, mwili huanza kupunguza kiwango cha homoni ya hCG taratibu. Hii haifanyiki ghafla, ndiyo maana vipimo vinaweza kuendelea kuonyesha positive hata kama mimba imetoka.

Kwa ujumla:

• Siku 1–7: hCG bado juu, vipimo vya mkojo vinaweza kusoma mimba ipo (positive)

• Wiki 1–2: hCG inaendelea kushuka, kipimo kinaweza kutoa majibu chanya au hasi(negative- Mimba hamna)

• Wiki 3–4: hCG inapaswa kushuka karibu sifuri → kipimo kinapaswa kuwa hasi kuashiria mimba haipo

Hii ndiyo sababu majibu mapema si ya kuaminika.

Wakati sahihi wa kufanya kipimo cha mimba kwa mkojo

Kwa matokeo yanayoaminika zaidi, kipimo cha mkojo kinapendekezwa kufanywa:

Baada ya wiki 3–4 tangu kutoa mimba.

Huu ndio muda ambao homoni ya hCG imepungua vya kutosha, na uwezekano wa positive ya uongo hupungua.

Maana ya kupata majibu chanya siku chache baada ya kutoa mimba

Kipimo kikisoma majibu chanya(mimba ipo) ndani ya siku 7–14 baada ya kutoa mimba ni kawaida kabisa. Hii haiashirii ujauzito unaoendelea, bali homoni ya hCG inayobaki mwilini wakati mwili unajisafisha.

Maana ya chanya baada ya wiki ya pili ya kutoa mimba

Kupata majibu chanya baada ya wiki 2 kunahitaji tahadhari zaidi, kwa sababu kuna uwezekano wa mambo mawili:

Mabaki ya ujauzito bado yapo kwenye kizazi

Kipimo kinaweza kubaki chanya ikiwa bado kuna tishu za ujauzito ambazo hazijatoka kikamilifu.Dalili zinazoweza kuandamana:

• Kutokwa damu kunakoendelea muda mrefu

• Maumivu ya tumbo yanayoendelea

• Harufu isiyo ya kawaida ukeni

Homoni ya hCG bado haijapungua kikamilifu

Katika baadhi ya wanawake, hCG hushuka polepole zaidi. Hali hii haiwezi kutofautishwa kwa kipimo cha mkojo pekee. Kwa hiyo majibu chanya baada ya wiki 2 inahitaji uchunguzi zaidi kama haitaisha.

Wakati ambao kipimo kinapaswa kuwa hasi(kuonyesha mimba haipo)

Kama ujauzito umetoka kikamilifu:

Kipimo cha mkojo kinapaswa kuwa hasi ndani ya wiki 3–4.

Ikiwa bado positive baada ya muda huo, kuna uwezekano wa mabaki ya ujauzito au ujauzito unaoendelea, na ni muhimu kufanyiwa uchunguzi.

Jinsi ya kupata uhakika mapema zaidi

Ikiwa hutaki kusubiri wiki 3–4 ili kupata matokeo sahihi ya kipimo cha mkojo, njia hizi mbili ni za uhakika zaidi:

Kipimo cha damu cha β-hCG (kiwango)

Hiki ndicho kipimo sahihi zaidi kuthibitisha kama hCG inapungua kweney damu.

• Kipimo hufanywa siku ya kwanza

• Kinarudiwa baada ya siku 2–3

• hCG ikionekana kuwa inapungua inaashiria mimba imetoka

• hCG ikiwa juu au inaongezeka inaashiria kuwa kuna mabaki ya mimba au mimba inaendelea

• Kipimo hiki ni gharama pia kufanyika

Ultrasound

Ultrasound huonyesha moja kwa moja:

• Kama mfuko wa uzazi uko wazi

• Kama kuna mabaki

• Kama kuna ujauzito unaoendelea

Hiki ndicho kipimo cha uhakika kuliko vyote.

Kipimo hiki ni gharama pia na kinategemea uzoefu wa mpiga picha.

Je, kutokwa na damu kwa muda mrefu kunamaanisha mimba imetoka?

Kutokwa na damu nyingi au kwa muda mrefu hakuwezi kuthibitisha kwa uhakika kama mimba imetoka au bado ipo. Sababu ni kwamba:

• Baada ya mimba kutoka (kwa dawa au kutoka yenyewe), mwili unaweza kuendelea kutoa damu kwa siku 7–14, wengine hadi wiki 3—bila kuashiria matatizo.

• Wakati mwingine, mtu anaweza kuendelea kupata damu hata kama ujauzito bado haujatoka kikamilifu.

• Kwa wengine, damu inaweza kuonekana nyingi lakini ujauzito tayari umeshatoka na mwili unamalizia kusafisha.

Kwa hiyo, idadi ya siku za kutokwa na damu peke au wingi wa damu si kigezo cha kupima mafanikio ya kutoa mimba.

Nini cha kufanya ukipata majibu chanya baada ya wiki ya pili

• Usirudie kipimo hicho hicho mara nyingi bila mpango

• Fanya kipimo cha damu cha β-hCG

• Pinga ultrasound ya kizazi

• Muone mtoa huduma ya afya kama hCG haishuki au kuna dalili zisizo kawaida

Maswali yaliyoulizwa mara kwa mara na majibu yake