Kuanza kutokwa na damu upya baada ya kutoa mimba kwa dawa: Visababishi, Vipimo na Matibabu

Maelezo ya msingi

Mwanamke mwenye umri wa miaka 21 alitumia dawa ya kutoa mimba tarehe miezi minne iliyopita. Baada ya kutumia dawa hiyo, damu ilianza kutoka mara moja na kuendelea kwa siku 5, kisha ikakata. Baada ya mapumziko ya takriban siku 8, damu iliendelea tena kwa siku 13, ikiwa nyepesi na isiyoambatana na mabonge. Katika miezi miwili iliyofuata, alipata hedhi kama kawaida, ikionyesha kurejea kwa mzunguko wa kawaida wa hedhi. Hata hivyo, miezi takriban 3 baadaye, alianza tena kupata damu kama hedhi, lakini baada ya siku chache damu hizo zikaanza kutoka kwa wingi na zikiwa na mabonge, hali iliyoanza ghafla usiku na kuendelea hadi mchana wa siku inayofuata. Swali lake je, shida hii inaweza kuwa nini?

Majibu

Baada ya kutoa mimba kwa kutumia dawa, ni kawaida mwanamke kutoa damu kwa siku chache hadi wiki mbili. Damu hii hukoma polepole, na mzunguko wa kawaida wa hedhi huanza tena kati ya wiki 4 hadi 6. Hata hivyo, kuna wanawake wanaopata hali isiyo ya kawaida ambapo damu inarudi tena miezi kadhaa baadaye, ikitoka kwa wingi, kuambatana na mabonge, au kuleta maumivu.

Katika hali kama hii, si sahihi sana kudhani kwamba damu hii bado inahusiana na utoaji mimba wa awali. Inawezekana kabisa kuwa ni dalili ya shida mpya ya kiafya.

Kwa nini muda ulioyopita ni muhimu?

Ikiwa mimba ilitolewa kwa dawa miezi mingi nyuma (kwa mfano mwezi wa 4 na sasa ni mwezi wa 8), damu inayotoka sasa haihusiani moja kwa moja na vidonge vya kutoa mimba. Badala yake, ni muhimu kuzingatia uwezekano wa:

• Matatizo ya homoni

• Magonjwa ya via vya uzazi

• Maambukizi au uvimbe wa kizazi

• Saratani katika hatua za mwanzo (nadra lakini ya kuchunguzwa)

Dalili zinazopaswa kuzingatiwa

Unapaswa kuwa makini iwapo damu:

• Inatoka kwa wingi sana au kuambatana na mabonge makubwa

• Inaambatana na maumivu ya tumbo chini ya kitovu

• Ina harufu mbaya

• Imekuwepo kwa zaidi ya siku 7 bila kupungua

• Inasababisha uchovu, kizunguzungu au kupungua kwa nguvu mwilini

Visababishi

Visababishi vya kutokwa damu Miezi baada ya Kutoa mimba

1. Hedhi ya kawaida iliyopotea mwelekeo

Baada ya utoaji mimba, inaweza kuchukua miezi kadhaa kwa homoni kurudi katika hali ya kawaida. Matokeo yake ni mzunguko wa hedhi usio na mpangilio, damu nzito au hedhi inayokuja mara mbili kwa mwezi.

2. Fibroid

Ni uvimbe wa kawaida usio wa saratani unaokua ndani au nje ya mji wa mimba. Fibroid husababisha:

• Damu nzito zenye mabonge

• Hedhi ya muda mrefu

• Maumivu ya tumbo au kiuno

3. Polipu ya kizazi au mlango wa kizazi

Ni uvimbe mdogo unaokua kwenye ukuta wa mji wa mimba au mlango wake. Polipu inaweza kuvuja damu ghafla, hasa baada ya tendo la ndoa.

4. Maambukizi ya ndani ya via vya uzazi

Hutokea kama mabaki ya ujauzito hayakutolewa kikamilifu, au kutokana na maambukizi mengine ya bakteria. Dalili zake ni:

• Damu yenye harufu

• Maumivu makali ya tumbo

• Homa au kutetemeka

5. Matatizo ya homoni (Kuharibika kwa uwiano wa homoni)

Kupotea kwa uwiano wa kiwango cha homoni estrojeni na projesteroni kunaweza kusababisha damu kutoka bila mpangilio. Hii huonekana sana kwa wanawake waliotoka mimba, waliopata msongo wa mawazo au waliobadilika uzito ghafla.

6. Saratani ya shingo au Mji wa mimba

Hutoa damu isiyo ya kawaida, hasa nje ya siku za hedhi. Dalili nyingine ni:

• Kutokwa damu baada ya tendo la ndoa

• Maumivu ya kiuno au mgongo

• Kutokwa na uchafu ukeni

Uchunguzi unaoweza kufanyika

Kama damu imerudi upya baada ya muda mrefu, mtoa huduma ya afya anaweza kupendekeza:

• Ultrasound ya mji wa mimba – kuchunguza kama kuna fibroids, mabaki ya ujauzito, au polyp

• Pap smia – kuangalia afya ya shingo ya kizazi

• Kipimo vha homoni – kupima viwango vya homoni

• Pregnancy test – kuondoa uwezekano wa mimba nyingine mpya

• Hesabu kamili ya damu – kupima upungufu wa damu

Lini umwone daktari haraka?

Mwone mtoa huduma ya afya haraka kama:

• Damu inaambatana na maumivu makali

• Unapoteza damu nyingi (pedi moja kila saa)

• Damu inaendelea zaidi ya siku 7

• Unahisi kizunguzungu au kuzimia

• Damu inatoka baada ya tendo la ndoa

• Ulishawahi kutoa mimba na sasa una dalili mpya

Nini Cha kufanya wakati ukisubiri huduma

• Tumia pedi safi na si tampon

• Kunywa maji ya kutosha

• Epuka kushiriki tendo la ndoa

• Usitumie dawa bila ushauri wa kitaalamu

Matibabu

Matibabu hutegemea kisababishi, jedwali lifuatalo lina maelezo ya matibabu kwa visababishi vilivyotajwa:

Matunzo ya nyumbani

Ikiwa unatokwa na damu upya miezi baada ya kutoa mimba na tayari umeonana na mtaalamu wa afya au bado unasubiri kwenda hospitali, unaweza kujitunza nyumbani kwa njia zifuatazo:

1. Fuatilia kiasi na aina ya damu inayotoka

• Tumia pedi zenye uwezo mkubwa wa kufyonza damu.

• Badilisha pedi kila baada ya masaa 3–4 au mapema zaidi ikiwa imejaa.

• Epuka kutumia tampon au kuosha uke kwa ndani (vaginal douching) kwani huongeza hatari ya maambukizi.

2. Pumzika vya kutosha

• Epuka kazi nzito au mazoezi makali wakati unatokwa damu.

• Pumzika nyumbani kadri ya uwezo wako, hasa ikiwa unahisi uchovu au kizunguzungu.

3. Kunywa Maji ya Kutosha

• Damu inapopotea, mwili pia hupoteza maji. Hakikisha unakunywa angalau glasi 8 za maji kwa siku.

• Unaweza pia kutumia juisi asilia na supu zenye virutubisho ili kuimarisha mwili.

4. Kula lishe bora

• Kula vyakula vyenye chuma kama maini, mboga za majani yenye kijani kibichi (kama mchicha, sukuma wiki), maharage na dengu ili kusaidia kurejesha damu iliyopotea.

• Epuka vyakula vya kusababisha gesi au kutanuka kwa tumbo, kama soda au vyakula vya mafuta mengi.

5. Tumia dawa kwa usahihi

• Ikiwa umepewa dawa na mtoa huduma ya afya (kama dawa ya kuzuia maambukizi au kurekebisha homoni), hakikisha unazitumia kikamilifu kwa muda ulioelekezwa.

• Usitumie dawa za uzazi wa mpango au za kusimamisha damu bila ushauri wa daktari.

6. Fuatilia dalili hatari

• Angalia kama damu inazidi kuwa nyingi au inaambatana na homa, maumivu makali ya tumbo, au harufu mbaya.

• Kama dalili hizi zitatokea, nenda hospitali haraka.

7. Andika kumbukumbu za mzunguko wako

• Andika tarehe damu ilianza, ilikoma, ilikuaje (kiasi, rangi, harufu), na kama ulihisi dalili zingine.

• Kumbukumbu hizi zitamsaidia daktari kufanya tathmini bora wakati wa uchunguzi.

Hitimisho

Kutokwa damu tena baada ya kutoa mimba kwa dawa, hasa miezi kadhaa baadaye, si jambo la kupuuzia. Ingawa inaweza kuwa mabadiliko ya kawaida ya hedhi, inaweza pia kuwa ishara ya matatizo kama fibroids, maambukizi, au hata saratani katika hatua za mwanzo. Hali hii inahitaji uchunguzi wa kitaalamu ili kujua chanzo halisi na kupata tiba sahihi. Kujitunza, kufuatilia mzunguko wa hedhi, na kutafuta ushauri wa daktari mapema ni hatua muhimu za kulinda afya ya uzazi.

Maswali yaliyoulizwa mara kwa mara