Sababu za kuonekana na presha ya kupanda isiyo kweli wakati wa kipimo

Maelezo ya msingi

Habari daktari? je ni sababu gani zinaweza kufanya nikutwe na presha ya kupanda wakati huo sina presha?

Majibu

Asante kwa swali zuri. Shinikizo la damu ni kipimo kinachosaidia madaktari kujua kama moyo na mishipa yako vinafanya kazi vizuri. Lakini kuna wakati matokeo ya kipimo yanaweza kuonyesha kuwa una shinikizo la juu kumbe si kweli! Hii hujulikana kama majibu ya uongo, na inaweza kusababisha kuanza dawa bila sababu.

Visababishi

Sababu inazoweza kuongeza shinikizo la damu bila kuwepo kweli ni;

1. Mkanda wa kupimia ikiwa ndogo au haijafungwa vizuri

Mkanda wa kupimia shinikizo lazima uwe saizi sahihi kulingana na unene wa mkono. Mkanda mdogo husababisha damu kukandamizwa zaidi kuliko kawaida, na hivyo shinikizo kuonekana juu kuliko lilivyo. Pia, ikiwa mkanda haujafungwa vizuri au umelegea, unaweza kutoa matokeo yasiyo sahihi.

2. Kutopumzika dakika 5 kabla ya kipimo

Mwili unahitaji utulivu kabla ya kupima shinikizo. Kukimbilia kipimo ukiwa umetoka kutembea au kufanya shughuli yoyote ya mwili, hata ya kawaida, huufanya moyo kupiga haraka zaidi – na presha kuonekana juu.

3. Kuzungumza au kusogea wakati wa kipimo

Unapozungumza au kusogea wakati unapimwa, mwili huanza kutoa homoni za msongo (stress hormones) kama adrenaline. Hii huongeza mapigo ya moyo na kupandisha presha.

4. Kibofu kilichojaa

Ikiwa unajisikia kwenda chooni lakini ukapimwa kabla ya kujisaidia, presha yako inaweza kuongezeka. Kibofu kilichojaa huleta msongo mwilini, na hivyo kuongeza shinikizo kwa muda mfupi.

5. Hofu ya kliniki (Presha juu ya koti jeupe)

Baadhi ya watu hupatwa na hofu au mshtuko wanapofika kliniki au kumwona daktari, hata kama hawasikii maumivu. Hofu hii husababisha presha kupanda kwa muda. Hali hii huitwa presha ya juu ya koti jeupe.

6. Kunywa kahawa, sigara au kufanya mazoezi kabla ya kipimo

Kafeini (iliyopo kwenye kahawa, chai nyeusi, soda) na nikotini (kutoka sigara) huongeza shinikizo la damu kwa muda mfupi. Mazoezi pia yana athari hii. Unashauriwa kuepuka vitu hivi kwa angalau dakika 30 kabla ya kupimwa.

7. Maumivu ya mwili wakati wa kipimo

Maumivu yoyote – iwe ni kichwa, tumbo au sehemu nyingine ya mwili – huufanya mwili kutoa homoni za "kupambana na maumivu", ambazo pia huongeza mapigo ya moyo na presha.

8. Mkono kupimwa ukiwa chini ya moyo

Shinikizo la damu linatakiwa kupimwa wakati mkono wako umelazwa kwenye meza au kitu kingine chenye urefu wa moyo. Ikiwa mkono wako uko chini ya moyo, usomaji unaweza kuongezeka kwa karibu 10 mmHg au zaidi.

Kiasi gani shinikizo linaweza kuongezeka?

Jedwali lifuatalo linaonyesha kisi cha shinikizo kinachoongezeka kwa kila kisababishi;

Ushauri wa kuaminika kabla ya kupimwa

• Pumzika kimya kwa dakika 5 kabla ya kipimo

• Hakikisha mkono uko katika usawa wa moyo

• Usiongee wala kusogea wakati wa kipimo

• Jisaidie chooni kabla ya kupimwa

• Epuka kahawa, chai, sigara au mazoezi dakika 30 kabla

• Hakikisha kinga ya kupimia inatosha na imefungwa vizuri

• Pima presha nyumbani pia au uliza kuhusu "ambulatory BP monitoring" ya saa 24

Hitimisho

Kipimo cha shinikizo la damu si tu kuweka kinga mkononi na kusubiri namba. Kuna mambo mengi yanayoathiri matokeo yake. Ukiyazingatia, utasaidia kupata majibu sahihi na kuepuka dawa au matibabu yasiyo ya lazima.