Kuwashwa ukeni wakati wa kukojoa: Dalili, Visababishi na Matibabu

Swali la msingi

Habari daktari, naomba kufahamu kuwashwa ukeni wakati wa kukojoa kwa mwanamke husababishwa na nini na tiba yake ni nini?

Majibu

Kuwashwa ukeni wakati wa kukojoa ni tatizo linaloathiri wanawake wa rika mbalimbali. Hali hii inaweza kuambatana na maumivu, kuchoma, au hisia ya moto wakati wa kutoa mkojo. Wakati mwingine, huweza kuashiria tatizo dogo kama mzio wa sabuni, lakini pia inaweza kuwa ishara ya maambukizi yanayohitaji matibabu ya haraka.

Visababishi

Sababu kuu za kuwashwa ukeni wakati wa kukojoa ni pamoja na;

1. Maambukizi ya njia ya mkojo (UTI)

Haya hutokea pale bakteria wanapoingia kwenye njia ya mkojo (urethra) na kuenea kwenye kibofu. Dalili: Maumivu au moto wakati wa kukojoa, haja ndogo mara kwa mara, na mkojo wenye harufu mbaya.

2. Maambukizi ya fangasi

Fangasi huongezeka kwa kasi kutokana na unyevunyevu, nguo za kubana, au mabadiliko ya homoni. Dalili: Kuwashwa sana ukeni, uchafu mweupe mzito kama maziwa, na maumivu wakati wa kukojoa au tendo la ndoa.

3. Maambukizi ya magonjwa ya zinaa

Magonjwa kama chlamydia, gonorrhea, na trichomoniasis yanaweza kusababisha muwasho na maumivu wakati wa kukojoa. Dalili: Harufu mbaya, uchafu wa njano au kijani, maumivu tumboni chini, na kuwashwa ndani ya uke.

4. Mzio au muwasho wa ngozi (aleji au demataitis ya mguso)

Baadhi ya wanawake hupata muwasho kutokana na sabuni, dawa za kuoshea uke, barakoa za uke, au kondomu zenye kemikali.Dalili: Kuwashwa, kuchoma, na uwekundu bila uchafu wa ukeni.

5. Ukavu wa uke

Kwa wanawake waliokoma hedhi au wanaotumia dawa fulani, uke hukosa unyevu wa kutosha, hivyo husababisha muwasho wakati wa kukojoa.

6. Matumizi ya antibiotik kwa muda mrefu

Dawa hizi huua bakteria wazuri wa ukeni, kuruhusu fangasi kuongezeka na kusababisha muwasho.

Uchunguzi

Daktari anaweza kupendekeza vipimo vifuatavyo:

• Kipimo cha mkojo na kuotesha vimelea kwenye mkojo – kuchunguza maambukizi ya njia ya mkojo.

• Kipimo cha ute wa uke – kubaini aina ya bakteria au fangasi.

• Kipimo cha magonjwa ya zinaa – ikiwa kuna dalili zinazofanana na magonjwa ya zinaa.

• Kipimo cha pH ya uke – kutathmini usawa wa tindikali wa uke.

Matibabu

Matibabu hutegemea chanzo cha tatizo:

• UTI: Antibiotiki maalum kama kwa maelekezo ya daktari.

• Fangasi: Dawa za kuua fangasi kama fluconazole au clotrimazole baada ya uchunguzi.

• Magonjwa ya zinaa: Dawa za antibiotiki au za kuua protozoa kulingana na tatizo kwa maelekezo ya daktari

• Mzio: Epuka kemikali, sabuni zenye manukato, na tumia sabuni laini isiyo na harufu.

• Ukavu: Tumia gel za kulainisha uke au tiba ya homoni (kwa ushauri wa daktari).

  
  

Tiba za nyumbani na kinga

• Osha sehemu za siri kwa maji safi bila sabuni zenye harufu.

• Va nguo za pamba zisizobana.

• Kunywa maji mengi kusaidia kusafisha mkojo.

• Epuka kutumia dawa za kuoshea uke bila ushauri wa daktari.

• Weka usafi kabla na baada ya tendo la ndoa.

• Tumia kondomu kwa uhusiano salama.

Wakati wa kumwona daktari

Muone daktari haraka ikiwa:

• Kuwashwa hakuishi ndani ya siku 3–5.

• Kuna maumivu makali au uchafu usio wa kawaida.

• Mkojo una damu au harufu kali.

• Unapata homa au maumivu makali ya tumbo chini.

Maswali yanayoulizwa Mara kwa Mara