Mimba isiyo na dalili

Swali la msingi

Habari za leo daktari, nina swali. Ukiwa na mimba , kipimo kinasoma chanya akini huonyeshi dalili hapo unakuwa na shida gani?

Majibu

Wakati mwingine mwanamke anaweza kupata majibu chanya ya ujauzito kupitia kipimo cha mkojo au damu, lakini asione dalili zozote za mimba kama kichefuchefu, kutapika, uchovu, au kuongezeka kwa haja ndogo. Hali hii huleta maswali mengi na wasiwasi: Je, mimba hiyo ni salama? Kuna shida gani?

Katika makala hii, tutachambua sababu zinazowezekana na hatua unazopaswa kuchukua ikiwa unapitia hali kama hii.

Visababishi vya kuwa na mimba isiyo na dalili

1. Mimba changa

Katika wiki za mwanzo za mimba, si kila mwanamke ataanza kuhisi dalili mara moja. Dalili kama kichefuchefu, uchovu au kuvimba matiti huweza kuchukua muda kuonekana, wakati mwingine hadi wiki ya 6 au 7 ya ujauzito.

Hali hii ni ya kawaida na si dalili ya tatizo. Mwili wa kila mwanamke huwa na tofauti katika kujibu mabadiliko ya homoni za ujauzito.

2. Tofauti za kiasili kati ya wanawake

Kuna baadhi ya wanawake ambao hata kipindi chote cha ujauzito hawasikii dalili kali. Wengine hujihisi kawaida kabisa kwa miezi mingi bila kichefuchefu au maumivu yoyote. Hii haitafsiri kuwa kuna shida ni tofauti ya kawaida ya mwili.

3. Muda wa dalili haujafika

Kipimo cha mimba hupima homoni ya mimba inayoitwa hCG (human chorionic gonadotropin) inayozalishwa baada ya yai kurutubishwa na kujipandikiza kwenye ukuta wa mfuko wa uzazi. Homoni hii huonekana mapema kabla hata ya dalili kuanza. Hivyo, unaweza kuwa na ujauzito wa kweli hata bila dalili zozote.

4. Ujauzito ulioharibika kimya

Mara chache, ujauzito unaweza kuharibika kimya kimya bila kuleta dalili kama maumivu au kutokwa damu. Kipimo cha mimba huendelea kuonyesha unamimba kwa muda hadi wa wiki mbili hata baada ya mimba kuharibika kwa sababu homoni za hCG huendelea kuwepo mwilini. Dalili zinazoweza kuonyesha mimba haiko salama ni pamoja na:

• Kukoma kwa dalili zote ghafla

• Maumivu makali ya tumbo

• Kutokwa damu ukeniKatika hali kama hii, ni muhimu kufanya ultrasound kuthibitisha kama kiinitete kinakuwa kama inavyotakiwa.

5. Mimba ya nje ya mfuko wa uzazi

Mimba ya ectopic hutokea pale ambapo yai lililorutubishwa linajipandikiza nje ya mfuko wa uzazi, mara nyingi kwenye mirija ya falopia.Hii inaweza kusababisha mimba kuonekana kwa kipimo lakini bila dalili za kawaida, au kwa dalili zisizo za moja kwa moja kama:

• Maumivu upande mmoja wa tumbo

• Kutokwa na damu kidogo ukeni

• Kizunguzungu au hali ya karibu kupoteza fahamu

Hali hii ni dharura ya kitabibu na inahitaji matibabu ya haraka.

6. Kipimo kuwa na makosa

Ingawa ni nadra, kunaweza kutokea hali ambapo kipimo kinaonyesha ujauzito lakini kwa kweli hakuna mimba. Sababu zinaweza kuwa:

• Dawa fulani (kama zinazotumika kwenye matibabu ya uzazi)

• Matatizo ya homoni

• Mabadiliko baada ya mimba kuharibika

7. Mimba isiyo na kiinitete

Mimba isiyo na kiinitete ni hali ambapo yai lililorutubishwa linajipandikiza kwenye mfuko wa uzazi, lakini halikui kuwa kiinitete (mtoto). Mfuko wa mimba huendelea kukua, na homoni ya ujauzito (hCG) huendelea kuzalishwa kwa muda, ndiyo maana kipimo cha ujauzito kinaweza kuonyesha chanya.

Kwa sababu hakuna mtoto anayekua, mwili haupati mabadiliko makubwa yanayohitaji kuonyesha dalili kama kichefuchefu, uchovu, au maumivu ya matiti. Dalili zinaweza kuwa hafifu sana au zisiwepo kabisa.

Dalili zinazoweza kuonekana baadaye ni:

• Kukoma ghafla kwa dalili za mimba

• Kutokwa na damu nyepesi ukeni

• Maumivu madogo ya tumbo

• Kipimo cha mimba kubaki chanya kwa muda mrefu bila maendeleo ya ujauzito

Unapaswa kufanya nini ikiwa huna dalili lakini kipimo kimeonyesha una mimba?

• Usihofu mara moja. Kukosa dalili haina maana kwamba mimba si salama.

• Tembelea kituo cha afya. Daktari anaweza kupendekeza kufanya kipimo cha damu cha hCG au ultrasound ili kuthibitisha maendeleo ya mimba.

• Endelea kujitunza. Tumia virutubisho vya folik asid na epuka sigara, pombe, au dawa bila ushauri wa daktari.

• Angalia dalili za hatari. Kama utapata maumivu makali ya tumbo, kutokwa damu ukeni, au kizunguzungu, tafuta huduma ya dharura.

Hitimisho

Kuwa na ujauzito bila dalili si jambo la kushangaza, na mara nyingi ni hali ya kawaida – hasa mwanzoni. Hata hivyo, ni muhimu kuendelea kufuatilia hali yako kiafya kwa usalama wako na wa mtoto anayeendelea kukua. Kufanya uchunguzi wa kitaalamu mapema ni njia bora ya kuhakikisha kila kitu kiko sawa.