Mimba kutishia kutoka: Dalili, Visababishi, Uchunguzi na Matibabu

Mimba inayotishia kutoka ni hali inayotokea pale mama mjamzito anapoanza kutokwa na damu au kuhisi maumivu ya tumbo katika miezi ya mwanzo ya ujauzito (kabla ya kufikisha wiki 20), lakini mimba bado ipo na inaweza kuendelea. Hali hii huwa ya kutisha kwa mama, lakini si kila damu wakati wa ujauzito humaanisha mimba itatoka. Wanawake wengi hupata hali hii na baadaye huendelea kujifungua salama.

Mimba inayotishia kutoka ni nini?

Ni hali ambapo:

• Mama ana ujauzito wa chini ya wiki 20

• Kuna kutokwa na damu ukeni, maumivu ya tumbo au mgongo

• Lakini mimba bado ipo ndani ya mfuko wa uzazi

Hii si sawa na mimba kutoka kabisa. Ni ishara kwamba mimba inahitaji uangalizi wa karibu.

Dalili za mimba inayotishia kutoka

• Kutokwa na damu kidogo au nyingi ukeni

• Damu inaweza kuwa ya kahawia au nyekundu

• Maumivu ya tumbo la chini kama hedhi

• Maumivu ya mgongo wa chini

• Wengine hawana maumivu, damu tu

Dalili hizi zinaweza kuwa nyepesi au kali, ndiyo maana uchunguzi wa hospitali ni muhimu.

Visababishi

Mara nyingi si kosa la mama, sababu zinaweza kuwa:

• Mabadiliko yasiyo ya kawaida ya uumbaji wa kijusi tumboni (hutokea mapema sana)

• Mabadiliko ya homoni, hasa projesteroni

• Uchovu mkubwa au msongo wa mawazo

• Maambukizi

• Umri mkubwa wa mama

• Historia ya mimba kutoka mara kwa mara

Uchunguzi hufanywaje hospitalini?

Daktari atafanya:

1. Kuuliza historia ya tatizo

• Mimba ni ya wiki ngapi

• Damu ni kiasi gani na kwa muda gani

• Maumivu yapo au hayapo

• Historia ya mimba zilizopita

2. Kipimo cha Ultrasound

• Kuangalia kama mimba ipo ndani ya mfuko wa uzazi

• Kuangalia kama mtoto ana mapigo ya moyo

• Kuangalia kama kuna dalili za mimba kutoka au mimba nje ya mfuko wa uzazi

3. Kipimo cha damu cha homoni ya ujauzito

• Kuangalia kama kiwango cha homoni ya ujauzito (hCG) kinaongezeka vizuri

• Kipimo hiki hufanywa mara zaidi ya moja

Matibabu ya mimba inayotishia kutoka

Matibabu hutegemea hali ya mama na majibu ya vipimo.

1. Ufuatiliaji na kupumzika

Kwa mama wengi:

• Hakuna dawa maalum hutolewa

• Hufuatiliwa kwa ultrasound na vipimo vya damu

• Mama huendelea na maisha kwa tahadhari

2. Dawa ya homoni (Projesteroni)

Kwa baadhi ya mama:

• Daktari anaweza kutoa dawa ya kusaidia kushikilia mimba

• Hutolewa hasa kama mama ana historia ya mimba kutoka

• Dawa hii husaidia mfuko wa uzazi kuendelea kubeba mimba

Dawa hii hutolewa kwa ushauri wa daktari pekee

3. Endapo hali itazidi

• Kama damu inaongezeka sana

• Kama mimba imeharibika

Daktari ataeleza njia salama ya kusaidia afya ya mama (dawa au taratibu nyingine)

Matibabu ya nyumbani: Mambo muhimu ya kufanya ukiwa nyumbani

Matibabu ya nyumbani yana lengo la kupunguza hatari ya mimba kutoka, kumsaidia mama kupumzika, na kuruhusu mwili kuendelea kuilea mimba vizuri. Mambo haya hayabadilishi matibabu ya hospitali, bali husaidia kuyakamilisha. Jedwali 1 limeorodhesha mambo hayo;

Jedwali 1: Matibabu ya nyumbani kwa mimba inayotishia kutoka

Dalili hatarishi

Ukipata dalili hizi wakati upo kwenye matibabu, onana na daktari mara moja;

• Kutokwa damu nyingi sana (kubadilisha taulo ya kike kila saa)

• Maumivu makali ya tumbo au bega

• Kizunguzungu au kuzimia

• Homa au harufu mbaya ukeni

• Kutoka kwa mabonge makubwa

Hitimisho

Mimba inayotishia kutoka si mwisho wa matumaini. Kwa uchunguzi wa mapema, uangalizi mzuri na kufuata maelekezo ya daktari, wanawake wengi huendelea na ujauzito salama.

Maswali yaliyoulizwa mara kwa mara na majibu yake;