Nguvu ya akili kwenye Kinga na Uponyaji wa Mwili: Mwongozo kamili

Mwili wa binadamu hauishi kwa dawa pekee. Unaitikia kwa nguvu kubwa mawazo, hisia na mtazamo wa mtu kuhusu ugonjwa wake. Tafiti nyingi za kitabibu zimeonyesha kuwa akili na mwili hufanya kazi kwa ukaribu sana kiasi kwamba namna mtu anavyowaza kuhusu afya yake huweza kuathiri:

• Ukali wa dalili

• Kasi ya kupona

• Ufanisi wa dawa

• Nguvu ya kinga ya mwili

Ndiyo maana watu wawili wenye ugonjwa unaofanana wanaweza kuugua kwa viwango tofauti kabisa—mmoja akaumia sana, mwingine akaonekana “ana nguvu” licha ya ugonjwa huo huo. Tofauti kubwa mara nyingi ipo kwenye hali ya akili na namna wanavyoitikia ugonjwa wao.

Uhusiano wa Akili, Msongo wa mawazo na Kinga ya Mwili

Akili inapokumbwa na:

• Hofu

• Kukata tamaa

• Mawazo ya “nitaumwa zaidi”

• Msongo wa mawazo wa muda mrefu

mwili huanza kutoa homoni za msongo kama kotiso na adrenalini kwa kiwango kikubwa. Homoni hizi:

• Hupunguza uwezo wa kinga kupambana na magonjwa

• Huongeza maumivu

• Huchelewesha kupona kwa vidonda na tishu

• Huongeza uwezekano wa magonjwa sugu

Kwa maneno mengine, mawazo hasi ya muda mrefu huufanya mwili uishi kama uko kwenye hatari ya kudumu, hali inayochosha mfumo wa kinga.

Mawazo Chanya hufanyaje kazi kwenye mwili?

Mawazo chanya hayamaanishi kupuuza ugonjwa au kujidanganya kuwa haupo. Maana yake ni:

• Kukubali hali ya ugonjwa bila hofu kupita kiasi

• Kuamini kuwa matibabu yanafanya kazi

• Kujitia moyo kuwa mwili una uwezo wa kupona

• Kudhibiti msongo wa mawazo

Wakati mtu ana mtazamo chanya:

• Ubongo hutoa homoni za ustawi kama endofini na serotonin

• Maumivu hupungua

• Usingizi huboreka

• Kinga ya mwili huimarika

• Mwili huingia katika hali ya “uponyaji” badala ya “mapambano”

Sayansi ya “saikoimyunolojia” (PNI)

Kitaalamu, uhusiano huu hujulikana kama saikoimyunolojia, taaluma inayochunguza jinsi mawazo, mfumo wa neva (mfumo wa fahamu) na mfumo wa kinga (imunolojia) vinavyoshirikiana.

Tafiti zimeonyesha kuwa:

• Wagonjwa wenye mtazamo chanya hupona haraka baada ya upasuaji

• Wagonjwa wa magonjwa sugu hupata dalili nyepesi wanapodhibiti msongo

• Wagonjwa wanaoamini matibabu yao wana mwitikio bora wa dawa (dawa bandia yenye msingi wa kibaolojia)

Hii haimaanishi ugonjwa ni wa mawazo pekee, bali mawazo yanaweza kuongeza au kupunguza athari za ugonjwa halisi.

Kwa nini baadhi ya magonjwa huonekana “Hayana Chanzo”?

Kuna wagonjwa wanaopata:

• Maumivu ya tumbo yasiyoeleweka

• Maumivu ya kifua bila tatizo la moyo

• Maumivu ya kichwa ya mara kwa mara

• Kuchoka sana bila sababu ya wazi

Mara nyingi, vipimo vyote huwa vya kawaida. Katika hali kama hizi:

• Msongo wa mawazo wa muda mrefu

• Huzuni

• Wasiwasi

• Mshtuko wa kihisia

huweza kujionyesha kama dalili za kimwili (saikosomatiki). Huu si ugonjwa wa kufikirika, bali ni mwili unaoonyesha mateso ya akili.

Nguvu ya kujitia moyo wakati wa ugonjwa

Kujitia moyo hakubadilishi ugonjwa papo hapo, lakini:

• Huboresha ushirikiano wa mgonjwa na matibabu

• Hupunguza hofu inayoongeza dalili

• Husaidia mwili kuitikia dawa vizuri

• Huongeza nidhamu ya kufuata ushauri wa daktari

Mgonjwa anayesema “Ninaumwa lakini nitapona” mara nyingi hupata matokeo bora kuliko anayesema “Hii itaniua”, hata kama wote wanapata matibabu yale yale.

Mambo ya kivitendo ya kuimarisha Mawazo Chanya kwa wagonjwa

1. Kubali ugonjwa bila kujilaumu, ugonjwa si kosa lako.

2. Epuka kusoma taarifa zinazokutisha bila mwongozo wa mtaalamu

3. Zungumza na watu wanaokuinua, si wanaokukatisha tamaa

4. Pumzika vizuri na fanya mazoezi mepesi inapowezekana

5. Tumia mbinu za kupunguza msongo(kupumua kwa kina, sala, kutafakari, muziki)

6. Fuata matibabu ya kitabibu kikamilifuMawazo chanya hayachukui nafasi ya dawa yanaiunga mkono.

Je, Mawazo Chanya pekee yanaweza kutibu ugonjwa?

Hapana. Hili ni jambo muhimu sana kuelewa.

Mawazo chanya:

• Hayabadilishi bakteria kuwa hawapo

• Hayayeyushi saratani

• Hayachukui nafasi ya upasuaji au dawa

Lakini:

• Huongeza uwezo wa mwili kupambana

• Hupunguza madhara ya ugonjwa

• Huongeza ubora wa maisha

• Huharakisha kupona pale inapowezekana

Ni nyongeza muhimu ya tiba, si mbadala wake.

Wapi uanweza kupata maelezo zaidi?

“Soma pia: Namna Sahihi ya Kufanya Tafakuri kwa Wagonjwa na Wanaoanza – Mwongozo Kamili wa ULY Clinic.”

Hitimisho

Mwili na akili ni mfumo mmoja uliounganishwa. Kumlinda mgonjwa hakumaanishi kumpa dawa pekee, bali pia kusaidia akili yake iwe katika hali ya matumaini, utulivu na imani ya kupona. Mawazo chanya, yanapotumika pamoja na matibabu sahihi, yanaweza kuwa nguzo muhimu ya afya njema na uponyaji wa haraka.

Maswali yaliyoulizwa mara kwa mara na majibu yake