Ute wa maziwa mgando bila harufu wala muwasho ukeni: Je kuna tatizo?

Swali la msingi

"Habari daktari. Mimi ni msichana wa miaka 27, si mjamzito, lakini kwa wiki kadhaa sasa nimekuwa nikiona ute mweupe mzito kama maziwa mgando unatoka ukeni. Hauna harufu, haunipi muwasho wala maumivu. Je, hali hii ni ya kawaida au inaashiria tatizo kwenye mwili wangu?"

Majibu

Kutokwa na ute ukeni ni hali ya kawaida kwa mwanamke, lakini mabadiliko ya rangi, wingi au muundo wake huweza kuashiria mabadiliko ya kimwili au kiafya. Ute mweupe unaofanana na maziwa mgando, bila harufu wala muwasho, unaweza kuwa wa kawaida au wa kuashiria hali fulani ya kiafya kulingana na muda na mazingira ya kutokea kwake.

Je, ute huu ni wa kawaida?

Kwa wanawake waliovunja ungo, kutokwa na ute ukeni ni sehemu ya kawaida ya mfumo wa uzazi. Lakini ute:

• Unapobadilika muundo (kuwa mzito kama maziwa mgando)

• Hata kama hauna harufu wala muwasho, unaweza kuashiria mabadiliko ya homoni au uwepo wa maambukizi ya ya awali  au hali zisizo hatarishi kiafya.

Visababishi

Visababishi vinavyowezekana ni pamoja na;

1. Mabadiliko ya kawaida ya homoni

• Hutokea katikati ya mzunguko wa hedhi (uovuleshaji)

• Ute huwa mweupe, mzito au laini

• Hauna harufu, huja na huchukua siku chache kupotea

2. Maambukizi ya fangasi ukeni

• Kandida ni fangasi wa kawaida mwilini

• Katika hali ya kuongezeka kiasi ukeni, huweza kusababisha kutokwa na ute mweupe kama maziwa mgando

• Hakusababishi muwasho awali, lakini baadaye huweza kuendelea na kuwasha

3. Athari za mabadiliko ya vyakula, msongo au dawa

• Kutumia dawa jamii ya antibayotiki kwa muda mrefu

• Msongo wa mawazo

• Sukari nyingi mwilini – fangasi hupenda mazingira haya

• Sabuni zenye kemikali kwenye maeneo ya siri

4. Dawa za uzazi wa mpango

• Baadhi ya dawa (hasa za homoni) huongeza ute mweupe

• Hii si dalili ya ugonjwa isipokuwa ukianza kuhisi hali isiyo ya kawaida

5. Dalili ya awali ya magonjwa ya zinaa

• Ingawa si ya kawaida, ute wa maziwa mgando unaweza kutangulia dalili zingine za magonjwa ya zinaa kama trikomoniasis au klamidia

• Hasa kama umeambatana na kubadilika kwa mzunguko wa hedhi au maumivu ya nyonga

Tofauti ya ute wa kawaida na wa maambukizi

Unachotakiwa kufanya

• Usijisafishe ndani ya uke kwa sabuni au kemikali – huua bakteria wa kawaida wanaolinda uke

• Epuka sabuni zenye kemikali kali sehemu za siri

• Vaa chupi safi, ya pamba na zisizobana

• Angalia kama ute unaongezeka au kuambatana na dalili zingine

• Muone daktari kama ute utaendelea kwa zaidi ya siku 5–7 bila kubadilika, au ukianza kupata muwasho, harufu au maumivu

Je unatakiwa kupima?

Ndiyo, unapopata ute usio wa kawaida unaodumu:

• Inashauriwa kupima vaginal swab au

• Kupimwa magonjwa ya fangasi na magonjwa ya zinaa

Maabara inaweza kusaidia kutofautisha kama ni Kandida ya kawaida au maambukizi ya kina zaidi.

Hitimisho

Kutokwa na ute mweupe kama maziwa mgando usio na harufu wala muwasho kunaweza kuwa jambo la kawaida la homoni, au maambukizi ya fangasi ya awali. Hali hii ikidumu au kubadilika, inashauriwa kufanyiwa uchunguzi. Usisite kumwona daktari kwa usalama na amani ya afya yako.