Kucheza kwa mtoto tumboni

Kucheza kwa mtoto tumboni ni pale mama anapohisi mtoto akipiga teke, ngumi, kujigeuza, kujinyoosha au kushtuka kwa mdundo kama kwikwi. Ni ishara muhimu kwamba mtoto yuko hai na anapata oksijeni na chakula cha kutosha kutoka kwa kondo la nyuma. Mama wa mimba ya kwanza kwa kawaida huanza kuhisi kati ya wiki 18 na 24, na wa mimba zinazofuata mapema zaidi, kuanzia wiki 16.

Harakati huongezeka hadi karibu wiki 32, kisha huendelea kwa kiwango hicho hadi kujifungua. Si kweli kwamba mtoto hupunguza kucheza kabla ya uchungu. Hakuna idadi moja sahihi kwa kila mtoto: muhimu ni kujua mpangilio wa mtoto wako. Harakati zikipungua, zikibadilika au zikikosekana, nenda kituo cha afya siku hiyo hiyo, usisubiri hadi kesho na usijaribu kumwamsha mtoto kwa vinywaji vitamu au baridi.

Kwa nini ni muhimu kufuatilia kucheza kwa mtoto?

Mtoto anayepata oksijeni na chakula cha kutosha huwa na vipindi vya kucheza na vipindi vya kulala. Kondo la nyuma likishindwa kufanya kazi vizuri, mtoto huanza kuhifadhi nguvu kwa kupunguza harakati. Kwa hiyo kupungua kwa harakati mara nyingi ni ishara ya mapema kwamba mtoto yuko hatarini, siku kadhaa kabla ya madhara makubwa kutokea.

Tafiti kubwa zimeonyesha kwamba wanawake wengi waliopoteza mtoto tumboni baada ya wiki 28 waliona harakati zikipungua kabla ya tukio hilo. Mama anayemjua mtoto wake na kwenda hospitali mapema anapoona mabadiliko anampa mtoto nafasi ya kusaidiwa kwa wakati.

Mtoto huanza kucheza ujauzito ukiwa na wiki ngapi?

Mwanzoni harakati huwa hafifu kama kipepeo, mapovu au gesi tumboni, na ni rahisi kuzichanganya na gesi. Kadiri mtoto anavyokua zinakuwa wazi zaidi, na baadaye unaweza kuhisi au hata kuona teke ukiweka mkono tumboni.

Kama umefikisha wiki 24 na bado hujawahi kuhisi mtoto akicheza, mwambie mtoa huduma wa kliniki. Atasikiliza mapigo ya moyo wa mtoto na, ikihitajika, kufanya ultrasound.

Kucheza kwa mtoto kunavyobadilika wiki kwa wiki

Wengi huhisi mtoto akicheza zaidi jioni na usiku, wakiwa wamelala chali au ubavu, na baada ya kula. Mtoto pia hupata kwikwi: mishtuko midogo ya mdundo unaojirudia kwa dakika kadhaa. Hiyo ni kawaida.

Mtoto anatakiwa kucheza mara ngapi?

Hakuna idadi moja inayowafaa watoto wote. Kila mtoto ana mpangilio wake wa kucheza na kulala, na ushauri wa kisasa ni kwamba mama ajifunze mpangilio wa mtoto wake kuanzia wiki 24 hadi 28, kisha ajali mabadiliko yoyote.

Kama mwongozo wa jumla, mama wengi huhisi harakati 10 au zaidi ndani ya saa 2 wakiwa wamelala ubavu na kuweka akili kwenye kuhesabu, mara nyingi ndani ya muda mfupi zaidi. Ukihisi harakati chache kuliko 10 ndani ya saa 2, au chache kuliko kawaida ya mtoto wako, usisubiri: nenda kituo cha afya siku hiyo hiyo.

Mtoto hulala tumboni kwa vipindi vya dakika 20 hadi 40, mara chache hadi dakika 90. Kipindi hiki hutahisi harakati, lakini mtoto mwenye afya hurudi kucheza baadaye. Kukosa harakati kwa muda mrefu zaidi ya hapo si usingizi wa kawaida.

Jinsi ya kumfuatilia mtoto wako

• Chagua muda ambao mtoto huwa anacheza, mara nyingi jioni au baada ya kula.

• Lala ubavu, wa kushoto au wa kulia, na weka mikono tumboni.

• Hisi teke, ngumi, kujigeuza, kujinyoosha na kusukuma. Kwikwi nazo ni harakati.

• Fahamu kiasi chake cha kawaida ili uweze kugundua mapema harakati zikipungua au zikibadilika.

• Kama kliniki imekupa kadi au jedwali la kuandika harakati, liandike kila siku na ulionyeshe kwenye mahudhurio.

Kuanzia wiki 28, lala ubavu badala ya kulala chali, hasa usingizi mrefu wa usiku. Tafiti zimeonyesha kwamba kulala chali kwa muda mrefu katika miezi ya mwisho kunahusishwa na hatari kubwa zaidi ya mtoto kufia tumboni, kwa sababu uzito wa kizazi unabana mishipa mikubwa ya damu.

Kwa nini usijaribu kumwamsha mtoto ukiwa na wasiwasi

Zamani wanawake walishauriwa kunywa maji baridi, soda au juisi tamu, kumulika tochi tumboni, au kupapasa tumbo ili mtoto aamke. Miongozo ya sasa ya wataalamu wa uzazi haishauri tena kufanya hivyo pale unapohisi harakati zimepungua.

Sababu ni kwamba mtoto aliye hatarini anaweza kucheza kidogo baada ya kushtushwa, na mama akatulia na kuchelewa kwenda hospitali. Mtihani sahihi ni wa mtoa huduma: kusikiliza mapigo ya moyo wa mtoto na kufanya vipimo vingine. Ukiona harakati zimepungua, nenda kituo cha afya mara moja, hata usiku.

Visababishi vya kupungua kwa harakati

Mara nyingi harakati zinapopungua kwa muda mfupi ni kwa sababu mtoto amelala, mama amekuwa na shughuli nyingi hakuweza kuhisi, au kondo la nyuma liko mbele ya kizazi. Hata hivyo, kwa kuwa hakuna njia ya kujua nyumbani, kila mabadiliko yachunguzwe. Visababishi vya hatari ni pamoja na:

• Kondo la nyuma kushindwa kufanya kazi vizuri, kwa mfano kwa sababu ya shinikizo la damu la ujauzito au kifafa cha mimba.

• Mtoto kukua chini ya kiwango au kuwa na uzito mdogo.

• Maji kidogo kwenye chupa ya uzazi.

• Kitovu kubanwa au kujifunga.

• Kondo la nyuma kuachia kabla ya wakati, hasa likiambatana na maumivu ya tumbo na damu.

• Damu ya mtoto kuvuja kwenda kwenye mzunguko wa mama.

• Maambukizi ndani ya mfuko wa kizazi.

• Mimba kupitiliza tarehe ya kujifungua kwa muda mrefu.

• Baadhi ya dawa za usingizi au za kutuliza zinazotumiwa na mama, na pombe au uvutaji wa sigara.

Hospitalini utafanyiwa nini?

• Kusikiliza mapigo ya moyo wa mtoto kwa kifaa cha kusikiliza au mashine ya Doppler.

• Kufuatilia mapigo ya moyo wa mtoto kwa muda kwa mashine ya CTG, kama inapatikana.

• Kupima shinikizo la damu, mkojo na ukubwa wa tumbo lako.

• Ultrasound kuangalia ukuaji wa mtoto, kiasi cha maji ya chupa ya uzazi na mzunguko wa damu kwenye kitovu.

Vipimo vikiwa vizuri, utarudi nyumbani na kuendelea kufuatilia. Harakati zikipungua tena, rudi tena, hata kama mara iliyopita kila kitu kilikuwa sawa. Vipimo vikionyesha mtoto yuko hatarini, daktari anaweza kuamua kuanzisha uchungu au kufanya upasuaji ili kumtoa mtoto mapema.

Madhara ya kupungua kwa harakati kusikoshughulikiwa

Kupungua kwa harakati kunakotokana na tatizo halisi na kusikochunguzwa mapema kumehusishwa na mtoto kuzaliwa na uzito mdogo, kujifungua kabla ya wakati, mtoto kukosa oksijeni na kupata madhara ya ubongo, alama ndogo za Apgar wakati wa kuzaliwa, haja ya kujifungua kwa upasuaji au kuanzishiwa uchungu, na hatari ya mtoto kufia tumboni au muda mfupi baada ya kuzaliwa. Ndiyo maana jibu la kupungua kwa harakati ni moja tu: kwenda kituo cha afya siku hiyo hiyo.

Kucheza kwa mtoto na jinsia yake

Watu wengi huamini kwamba mtoto wa kiume hucheza zaidi au kwa nguvu zaidi kuliko wa kike. Tafiti hazijaonyesha tofauti inayoweza kutumika kutabiri jinsia. Soma zaidi Je, mtoto wa kiume hucheza zaidi ya wa kike tumboni? na Mtoto wa kike kucheza tumboni. Kwa muda wa kujifungua soma Wiki za kujifungua ni ngapi?

Maswali yanayoulizwa mara kwa mara