Kutomwaga manii kwa mwanaume

Kutomwaga manii ni moja ya matatizo ya kijinsia kwa mwanaume, likijulikana pia kama an-ejakuleshen, mara nyingi huambatana na kutofika kileleni (anogasmia), ambapo mwanaume anapata ugumu au hushindwa kabisa kufikia kilele cha tendo la ndoa. Kwa baadhi ya wanaume, hali hii hujitokeza kama kuchelewa sana kufika kileleni (zaidi ya dakika 30) au kutofika kabisa licha ya msisimko wa kutosha.

Matatizo haya yanaweza kuwa ya muda mfupi au ya kudumu na yamegawanyika katika makundi mawili:

• Kutoanza kabisa kutofika kileleni (tangu kuzaliwa)

• Kuanza baada ya kipindi fulani cha maisha(ya kupata ukubwani)

Dalili za kutomwaga manii/ kutofika kileleni

Dalili kuu ni pamoja na:

• Kuchelewa kufika kileleni kwa muda mrefu (zaidi ya dakika 30)

• Kutofika kabisa kileleni licha ya kuchochewa kingono

• Kukosa kabisa kumwaga shahawa wakati wa kileleni

• Msongo wa mawazo unaohusiana na tatizo hili, kuathiri mahusiano ya kimapenzi

Kumbuka: Si kila kuchelewa kufika kileleni ni tatizo la kiafya. Ikiwa hali hii haiathiri afya ya kisaikolojia au mahusiano ya kimapenzi, huenda isiwe tatizo linalohitaji matibabu.

Visababishi vya kutomwaga manii na kutofika kileleni

Vihatarishi

Mambo yanayoongeza uwezekano wa kupata tatizo hili:

• Umri mkubwa

• Magonjwa sugu kama kisukari, msongo wa mawazo, na multiple sclerosis

• Matumizi ya muda mrefu ya dawa zinazodhoofisha nguvu za kiume

• Ulevi wa kupindukia

• Matatizo ya mahusiano ya kimapenzi

Vipimo na uchunguzi

• Historia ya kina ya mgonjwa (historia ya mahusiano, matendo ya ngono, historia ya magonjwa ya neva na dawa anazotumia)

• Uchunguzi wa mwili ukilenga mfumo wa uzazi na neva

• Vipimo vya maabara: kiwango cha homoni (testosterone, LH, FSH), uchunguzi wa mkojo, vipimo vya maambukizi (UTI)

• Uchunguzi wa shahawa ikiwa kuna hofu ya kutofika nje au retrograde ejaculation

Matibabu ya kutomwaga na kutofika kileleni

Matibabu hutegemea kisababishi. Njia mbalimbali hutumika:

1. Kubadilisha au kusitisha dawa zinazosababisha tatizo

Kwa mfano, kubadilisha antidepressants au antihypertensives

2. Tiba ya kisaikolojia na ushauri wa mahusiano

Kumwona mtaalamu wa saikolojia au tiba ya wanandoa

3. Dawa za kusaidia kufika kileleni

Kama vile dopamine agonists, au dawa zinazoongeza msisimko wa neva

4. Matibabu ya kiafya kwa visababishi vya msingi

Tiba ya kisukari, homoni (testosterone replacement), au matibabu ya UTI

5. Mikakati ya kusaidia uzazi kwa waliopoteza uwezo wa kumwaga

Kuvuna mbegu moja kwa moja kutoka kwenye korodani au epididymis (TESE, MESA)

Wakati gani wa kumwona daktari?

Ni muhimu kumwona daktari mapema endapo unakumbwa na moja au zaidi ya hali zifuatazo:

• Unashindwa kabisa kumwaga shahawa licha ya kupata msisimko wa kingono au kufika kileleni

• Dalili zimekuwepo kwa muda mrefu (zaidi ya miezi mitatu) bila kubadilika

• Tatizo linaathiri mahusiano yako ya kimapenzi au linakusababishia msongo wa mawazo

• Unatumia dawa fulani na umeanza kuona mabadiliko katika uwezo wa kumwaga

• Una historia ya upasuaji wa tezi dume, ajali ya nyonga, au matatizo ya uti wa mgongo

• Unataka kupata mtoto lakini unashindwa kutoa shahawa kwa njia ya kawaida

• Unahisi maumivu, usumbufu, au dalili nyingine za kiafya zinazoambatana na tatizo hili

Usichelewe kumwona mtaalamu wa afya ya uzazi au daktari wa magonjwa ya mfumo wa mkojo na uzazi. Matibabu ya mapema huongeza uwezekano wa kupata suluhisho bora.

Nini cha kufanya nyumbani?

Kabla au sambamba na matibabu ya hospitalini, kuna hatua mbalimbali za kujisaidia ambazo unaweza kuanza kuzifanya nyumbani:

Epuka pombe kupita kiasi

Pombe huathiri mishipa ya fahamu na kupunguza uwezo wa kufikia kileleni au kumwaga shahawa.

Punguza msongo wa mawazo

Jaribu mbinu za utulivu kama mazoezi ya kupumua kwa kina, kutafakari (meditation), au yoga. Msaada wa kisaikolojia unaweza kusaidia sana.

Ongea na mwenzi wako

Uwazi katika mawasiliano na mwenzi wako huondoa shinikizo lisilo la lazima na huimarisha msaada wa kihisia.

Epuka kujichua kupita kiasi au kutegemea sana ponografia

Matumizi ya muda mrefu ya kujichua au kutazama ponografia kunaweza kuathiri mwitikio wa kawaida wa mwili wakati wa tendo la ndoa.

Fanya mazoezi ya mwili

Mazoezi ya mara kwa mara huimarisha mzunguko wa damu, kupunguza msongo wa mawazo, na kuongeza uwezo wa kijinsia.

Kuwa na ratiba nzuri ya kulala

Usingizi wa kutosha (angalau masaa 8 mfululizo kwa siku) huongeza uzalishaji wa homoni ya testosterone, ambayo ni muhimu katika afya ya kijinsia ya mwanaume.

Hitimisho

Kutomwaga manii na kutofika kileleni kwa mwanaume ni matatizo ya kijinsia yanayoweza kuwa na athari kubwa kiafya na kisaikolojia. Matibabu hufanikiwa zaidi pale ambapo kisababishi halisi kinagunduliwa mapema na kushughulikiwa ipasavyo. Ushirikiano kati ya daktari, mtaalamu wa saikolojia, na mpenzi wa mgonjwa ni muhimu sana katika matibabu ya tatizo hili.